ស្ទឹងត្រែង៖ប្រជាពលរដ្ឋរស់នៅក្នុងឃុំសេកុងនិងឃុំថ្មកែវជិត១០០០គ្រួសារបាននាំគ្នាសំដែងការត្រេកអរ ចំពោះអាជ្ញាធរស្រុកសៀមប៉ាង រួមនិងក្រុមកងវិស្វកម្មក្រសួងការពារជាតិបានចាប់ផ្តើម កសាងផ្លូវលំ ប្រវែងជាង៣០ គីឡូម៉ែត្រ ដើម្បីដោះស្រាយនូវភាពលំបាក ដែលពួកគាត់រងនូវភាពលំបានញ៉ុំ ញី ជាយូរឆ្នាំមកហើយនោះ។
ក្នុងពិធីបើកការរដ្ឋានសាងសងផ្លូវលំនៅស្រុកសៀមប៉ាង កន្លងមកថ្មីៗនេះ លោក អ៊ុន គង់អាយុ៧៣ឆ្នាំ ប្រជាពលរដ្ឋនៅ ឃុំថ្មកែវ ស្រុកសៀមប៉ាងបានលើកឡើងថា ៖ គាត់រស់នៅក្នុងឃុំនេះផ្លូវធ្វើដំណើរពិបាកយូរឆ្នាំមកហើយចង់ទៅណាមកណាច្រើនធ្វើដំណើរតាមទូកពីព្រោះផ្លូវគោកធ្វើដំណើរកាត់ព្រៃលំបាកពួកគាត់ចង់បានផ្លូវបែបនេះជាយូមកហើយ ទើបតែទទួលបាននៅក្នុងឆ្នាំនេះ កាលពីមុនវាពិបាកធ្វើដំណើរទៅខាងណាក៏ពិបាក ឥឡូវឃើញថាបានផ្លូវនេះសប្បាយហើយ មានចិត្តរីករាយសប្បាយដល់កូនចៅអនាគតទៅមុខ សូមឲ្យកូនចៅប្រើប្រាស់ថែរក្សា ថែទាំរក្សាផ្លូវនេះឲ្យបានស្អាត់ ដើម្បីឲ្យបានគង់វង់យូរឆ្នាំ ។
លោក ស៊ី សួន អភិបាលស្រុកសៀមប៉ាងមានប្រសាសន៍ថាៈ សមិទ្ធផលថ្មីយើងត្រូវតែការពារជាសម្បត្តិរបស់យើងទាំងអស់គ្នាដែលបានខិតខំស្នើសុំជាយូរមកហើយតែការអភិវឌ្ឍន៏រាជរដ្ឋាភិបាលផ្តល់ឲ្យទៅតាមជំហ៊ាននីមួយៗដូចនេះពេលទទួលបានហើយប្រជាពលរដ្ឋទាំងអស់ត្រូវតែសហការគ្នារួមគ្នាថែរក្សាប្រើប្រាស់ឲ្យបានយូរ បំរើឲ្យផលប្រយោជន៍រួមរបស់យើង ។
លោកឧត្តមសេនីយ៏ទោ ប៊ូ ផាន់សាវី អនុប្រធាននាយកដ្ឋានកងវិស្វកម្មក្រសួងការពារជាតិបានអះអាងថា ៖ ក្រុមការងារនឹងខិតខំប្រឹងប្រែង ស្ថាបនាឲ្យផ្លូវនេះឲ្យហើយក្នុងជំហានដំបូងចំនួន ១២ គីឡូម៉ែត្រ នៅមុនរដូវវស្សាចូលមកដល់ និងបន្តបន្ទាប់ទៀតអនុវត្តឲ្យហើយទៅតាមផែនការក្នុងទិសដៅចំនួន ៣៥ គីឡូម៉ែត្រ ចេញពីទីរួមស្រុកសៀមប៉ាងឆ្លងកាត់ឃុំថ្ម កែវ និងឃុំសេកុង ទៅដល់ទីវរៈបញ្ជាការកងទ័ពលេខ ១០១ ។
លោក ដួង ពៅ អភិបាលរងខេត្តមានប្រសាសន៍ទទួលស្គាល់ថា ៖ ការអភិវឌ្ឍន៍ផ្លូវនេះ ពិតជាមានភាពយឺតយ៉ាវមែន តែការមកធ្វើយឺតប្រសើរជាងមិនបានមកធ្វើសោះ ។
លោកអភិបាលរងមានប្រសាសន៍ទៀតថា ក្នុងដំណើរការអភិវឌ្ឍន៍ផ្លូវនេះ សូមឲ្យបងប្អូនប្រជាពលរដ្ឋយើងនៅក្នុងឃុំនិមួយៗ ត្រូវមានការអធ្យាស្រ័យ និងយោគយល់ទៅលើផលប៉ះពាល់ណាមួយ បើមានប៉ះពៀរទៅលើដីកម្មសិទ្ធរបស់បងប្អូន សូមឲ្យចូលរួមបរិច្ចាកដើម្បីយើងរួមគ្នាអភិវឌ្ឍន៍ភូមិ ឃុំរបស់យើងឲ្យមានការរីកចំរើនលើគ្រប់វិស័យ ៕
ងិន លីម