បាត់ដំបង: ក្រោយពីមានការបង្ក្រាបជាបន្តបន្ទាប់របស់កំលាំងសមត្ថកិច្ចទៅលើល្បែងហ្គេមរួចមកគេសង្គេតឃើញថា ល្បែងទាំងនេះមានការថយចុះគួរអោយកត់សំគាល់ ផ្ទុយទៅវិញនៅពេលថ្មីៗនេះស្រាប់តែល្បែងហ្គេមបាញ់ត្រីបានបង្ហាញខ្លួនព្រោងព្រាតនៅតាមទីកន្លែងលាក់លៀម ដោយល្បែងនេះអាចទាក់ទាញអារម្មណ៍អ្នកលេង ពិសេសគឺសិស្សានុសិស្សអាចគេចមិនព្រមចូលសាលាដោយសារល្បែងនេះហើយល្បែងនេះគឺគេបើក24ម៉ោងលើ24ម៉ោងថែមទៀតផង ។
បច្ចុប្បន្នក្នុងក្រុងបាត់ដំបងទាំងមូលគេសង្គេតឃើញថាមានល្បែងជាច្រើនដែលបានបង្ហាញខ្លួនដូចជា ល្បែងចាក់បាល់ ល្បែងហ្គេម ល្បែងឆ្នោត ល្បែងភ្នាល់កីឡាប្រដាល់ និងល្បែងថ្មីចុងក្រោយនេះគឺល្បែងបាញ់ត្រី ត្រូវបានផុសព្រោងព្រាតហាក់បីដូចជាមានច្បាប់ទំលាប់ត្រឹមត្រូវយ៉ាងដូច្នេះដែរប៉ុន្តែបើតាមការរៀបរាប់ពីប្រភពមួយចំនួន ពិសេសគឺមេល្បែងទាំងនោះបានអោយកម្ពុជាថ្មីដឹងថាប្រការដែលធ្វើអោយពួកគេបើកល្បែងទាំងនេះបាន គឺដោយសារតែមានមន្ត្រីកងរាជអាវុធហត្ថនិងមន្ត្រីប៉ូលីសមួយចំនួនបានចុះទៅចរចារដាក់ខែគ្រប់ទីកន្លែងទាំងអស់ ដូច្នេះហើយទើបធ្វើអោយពួកគេមិនសូវខ្លាចក្នុងការបង្ក្រាបឡើយ ព្រោះគេបានបង់លុយអស់ហើយ ។
ប្រភពដដែលបានសង្កត់ធ្ងន់ថា អ្នកដែលចុះទៅយកលុយដាក់ខែនោះគឺមានសមត្ថកិច្ចខេត្ត
ជាច្រើនផ្នែកដែលពាក់ព័ន្ធគ្រាន់តែតំលៃទាបតែប៉ុណ្ណោះ ប៉ុន្តែចំពោះលោកយឹម វិចិត្រ អធិការនគរបាលក្រុងបាត់ដំបងទើបជាអ្នកជាន់ក ដកស្លាបតែម្តង ដូចជាមេល្បែងចាក់បាល់គេហ៊ានកំណត់មួយកន្លែងរហូតដល់200ដុល្លារឯណោះ នេះមិនរាប់ល្បែងផ្សេងៗទៀតផងដែលគេបានចរចារដាក់ខែទាំងអស់។
គួរបញ្ជាក់ថា ហ្គេមបាញ់ត្រីគឺជាប្រភេទល្បែងសុីសងមួយដែលបោះលុយទៅវិញទៅមក
និងស៊ីសងទៅតាមពិន្ទុឈ្នះឬចាញ់ ហើយក៏ជាល្បែងមួយអារ ក ស្រស់ៗថែមទៀតរហូតធ្វើអោយអាណាព្យាបាលសិស្សមួយចំនួនបញ្ចេញនូវប្រតិកម្មយ៉ាងខ្លាំងផងដែរដោយសារតែការពង្វក់ស្មារតីមិនអោយកូនរបស់គាត់បានចូលសាលារៀន។
រយ:ពេលប៉ុន្មានថ្ងៃនេះគេសង្គេតឃើញមានបទបញ្ជាថ្មីមួយចេញពីការិយាល័យជំនាញ
នៃស្នងការដ្ឋាននគរបាលខេត្តស្តីពីការចុះស្រង់ស្ថិតិនៃចំនួនទីតាំងរបស់ល្បែងគ្រប់ប្រភេទនៅក្នុងក្រុងបាត់ដំបង ក្នុងនោះផងដែរក៏មានទីតាំងមួយចំនួនបានបញ្ចេញនូវកាយវិការមិនខ្លាចរអារដល់សមត្ថកិច្ចណាមួយឡើយ ព្រោះគេយល់ថាពួកគេបានបង់លុយប្រចាំខែរួចរាល់អស់ហើយដល់ជំនាញគ្រប់ផ្នែក ដូច្នេះអ្វើក៏គេមិនខ្វល់ដែរ។
ពាក់ព័ន្ធនឹងឈ្មោះមន្ត្រីប៉ូលីសមួយចំនួនដែលបានដើរយកលុយដាក់ខែនេះលោក ម៉េង លៀងនាយការិយាល័ព្រហ្មទណ្ឌកំរិតស្រាលបានលើកឡើងថា រឿងទាំងអស់នេះគឺគ្មានពាក់ព័ន្ធនឹងរូបលោកឡើយ គឺលោកដឹងតែរឿងបង្ក្រាបតែប៉ុណ្ណោះ ហើយលោកក៏គ្មានសិទ្ធិអនុញ្ញាតិអោយទីតាំងណាមួយបើកលែងល្បែងទាំងនេះដែរ គឺដាច់ខាតលោកមិនអនុញ្ញាតិឡើយ ។
ដោយឡែកលោកវរ:សេនីយ៍ឯក ជេត វណ្ណនី ស្នងការរងទទួលការងារយុត្តិធ៌មបានសង្កត់ធ្ងន់
ទៅលើការអនុវត្តគោលនយោបាយភូមិ ឃុំមានសុវត្ថិភាព ដែលជាគោលការសំខាន់របស់សមត្ថកិច្ចដូច្នេះបើតាមគោលការរបស់លោកស្នងការ គឺដាច់ខាតត្រូវតែបង្ក្រាប ដូច្នេះជាគោលការរបស់កំលាំងដែលចុះទៅស្រង់ស្ថិតិគឺត្រូវអមទៅជាមួយនូវឯកសារសំរាប់អោយម្ចាស់អាជីវកម្មទាំងនោះធ្វើកិច្ចសន្យាដើម្បីបញ្ឈប់រាល់សកម្មភាពទាំងអស់ខាងលើជាបន្ទាន់ បើមិនដូច្នោះទេលោកនឹងសុំគោលការទៅលោកស្នងការដើម្បីធ្វើការបង្ក្រាបបើទោះបីជាមានមន្ត្រីប៉ូលីសណាម្នាក់ចុះទៅប្រមូលលុយដាក់ខែក៏ដោយគឺទុកអោយគេជាអ្នកទទួលខុសត្រូវនៅចំពោះមុខច្បាប់ទៅចុះ ហើយលោកក៏ទទួលស្គាល់ដែរ
អំពីការថយចុះរបស់ល្បែងហ្គេម និងការកើនឡើងរបស់ហ្គេមបាញ់ត្រីនេះ។
រាល់ពាក្យសំដីទាំងនេះក៏មានប្រភពជាច្រើនកំពុងរង់ចាំមើលថាតើសមត្ថកិច្ចអាចលុបបំបាត់
បានដែរឬទេ?បើបច្ចុប្បន្នវាហាក់បីដូចជាទឹកបាក់ទំនប់យ៉ាងដូច្នេះដែរអំពីល្បែងទាំងនេះដែលកំពុងតែវាយលុកយ៉ាងខ្លាំងនៅក្នុងក្រុងបាត់ដំបង ហើយប្រភពទាំងនោះកំពុងតែចោទសួរថា តើលោកស្នងការបានដឹងដែរឬទេរាល់ទង្វើក្នុងការដើរប្រមូលលុយរបស់លោក យឹម វិចិត្រ អធិការនគរបាលក្រុងបាត់ដំបងនាពេលកន្លងមក និងបច្ចុប្បន្ននេះ? ៕