បាត់ដំបង៖ មុខសញ្ញាប្រើប្រាស់ចំនួន3នាក់ត្រូវបានឃាត់ខ្លួន ព្រមទាំងបានឈានទៅធ្វើការឆែកឆេរ លំនៅដ្ឋានមុខសញ្ញាចែកចាយគ្រឿងញៀនមួយកន្លែង ដោយកិច្ចប្រតិបត្តិការនេះបានធ្វើឡើងកាលពីថ្ងៃទី 14-3-15 វេលាម៉ោង 7,30 នាទីយប់ ត្រង់ចំនុចក្នុងយឿត្រី ស្ថិតក្នុង
ភូមិស្លាកែតសង្កាត់ស្លាកែត ក្រុងបាត់ដំបង បន្ទាប់ពីជំនាញបានទទួលសេចក្តីរាយការពីកំលាំងសំងាត់រួចមក។
លោកស៊ាន សុណាល់ នាយការិយាល័យស្តីទី នៃការិយាល័យនគរបាលប្រឆាំងគ្រឿងញៀនបានលើកឡើងថា ក្រោយពីទទួលបានព័ត៌មានភ្លាម លោកបានដឹកនាំកំលាំង ដោយបានសហការ ជាមួយកំលាំងបង្ក្រាប ចេញប្រតិបត្តិការទៅចំនុចខាងលើ ដោយក្តោបបានមុខសញ្ញាប្រើប្រាស់គ្រឿងញៀនក្នុងករណីជាក់ស្តែងបានចំនួន3នាក់ ព្រមទាំងប្រមូលបាននូវវត្ថុតាងប្រើប្រាស់មួយចំនួន។
មុខសញ្ញាទាំង3នាក់នោះគឺមានឈ្មោះ 1 ម៉េត សាមឿន ភេទប្រុស អាយុ35ឆ្នាំ រស់នៅ
ភូមិតាកុយ សង្កាត់ក្តុលដូនទាវ 2 វង់ ចាន់សារ៉ាវី ហៅតង ភេទប្រុស អាយុ31ឆ្នាំ រស់នៅភូមិតាកុយ3 វឿត សាវឿន ភេទប្រុស អាយុ34ឆ្នាំ រស់នៅភូមិស្លាកែត ដោយសមត្ថកិច្ចដកហូតបានទូរស័ព្ទចំនួន3គ្រឿង និងសំភារ:ប្រើប្រាស់មួយចំនួន។
លោកនាយការិយាល័យស្តីទីបានបន្តថា ក្រោយពីបានសាកសួរ ព្រមទាំងបានទទួលនូវ
ចំលើយសារភាពរួចមក លោកបានសុំគោលការទៅលោកព្រះរាជអាជ្ញានួនសាន ដើម្បីបន្តការ
ឆែកឆេរទៅលើលំនៅដ្ឋានដែលស្ថិតនៅក្នុងយឿត្រីនោះ ដែលជារបស់ឈ្មោះ បូរ សក្តិវណ្ណា ហៅប៊ែរគឺរកឃើញគ្រឿងញៀនប្រភេទម៉ាទឹកកកចំនួន7កូនថង់តូច ស្មើនឹង17,20ក្រាម ស្លាកលេខម៉ូតូមួយ(ភ្នំពេញ ជ7896) ដាវសាំម៉ូរ៉ៃ មួយដើម និងសំភារ:វេចខ្ចប់ជាច្រើនថែមទៀត ដោយឡែកម្ចាស់ផ្ទះបានគេចខ្លួនមុនពេលដែលសមត្ថកិច្ចទៅដល់។
បច្ចុប្បន្នសមត្ថកិច្ចបានរៀបចំឯកសារ និងវត្ថុតាង ដើម្បីបញ្ជូនតាមផ្លូវច្បាប់ទៅកាន់សាលាដំបូងខេត្ត និងចាត់ការតាមនិតិវិធី ៕
