កំពង់ឆ្នាំង៖រថយន្តបែនដឹកដី៤គ្រឿងដែលបានដឹកដីកំពប់ពេញផ្លូវអត់គំរបនិងអត់ពាក់ផ្លាកលេខ ត្រូវបាននគរបាលរៀបចំសណ្តាប់ធ្នាប់ក្រុង ចាប់បញ្ជូនមកអធិការក្រុងកំពង់ឆ្នាំង ទាំងអ្នកបើកបរនិងរថយន្ត ដើម្បីធ្វើការផាកពិន័យជាការព្រមានកុំអោយរថយន្តផ្សេងទៀត
យកគំរូតាម។ការចាប់ឃាត់រថយន្តនេះ បានធ្វើឡើងនៅវេលាម៉ោង៩និង៣០នាទីព្រឹកថ្ងៃទី
១៦ ខែមិនា ឆ្នាំ២០១៥ នៅក្នុងសង្កាត់កំពង់ឆ្នាំង ក្រុងកំពង់ឆ្នាំង។
លោក ហង្ស ប៊ុនហាក់ អធិការរងនគរបាលក្រុងកំពង់ឆ្នាំងទទួលបន្ទុកសណ្តាប់ធ្នាប់ បានអោយដឹងថា៖រថយន្តដែលសមត្ថកិច្ចចាប់ឃាត់ផាកពិន័យទាំងនេះ ២គ្រឿងជាកម្ម សិទ្ធរបស់ លោក ចាយ ហេង មានទីលំនៅក្នុងភូមិក្តីត្នោត សង្កាត់ប្អេរ ក្រុងកំពង់ឆ្នាំង និង២គ្រឿងជារបស់អ្នករកស៊ីដឹកដីក្នុងខេត្ត។
នៅរៀងរាល់ថ្ងៃរថយន្តខាងលើនេះ និងរថយន្តមួយចំនួនទៀត បានដឹកដីខ្សាច់ ដឹក ដីក្រហម ដឹកថ្មល្អិតហៀរទ្រុង តាមផ្លូវកៅស៊ូនានាក្រុង និងផ្លូវជាតិក្នុងខេត្តដោយមិនមាន
គំរបគ្របជិតនោះឡើយ បណ្តាលអោយដីថ្មទាំងនោះជ្រុះរប៉ាត់រប៉ាយពេញដងផ្លូវធ្វើ
អោយបាត់សោភ័ណភាពតាមដងផ្លូវនៅក្នុងខេត្ត និងធ្វើអោយប៉ះពាល់ដល់អ្នកប្រើប្រាស់ ផ្លូវដូចជា ធ្វើអោយមានដីហុយ និងអាចបង្កអោយមានគ្រោះថ្នាក់ដល់អ្នកធ្វើដំណើរ ដោយសារតែដុំថ្មនិងដីជ្រុះនៅលើផ្លូវ។
សមត្ថកិច្ចបានអោយដឹងទៀតថា៖រថយន្តទាំង៤ខាងលើនេះ ខ្លះអត់ពាក់ស្លាកលេខ ខ្លះទៀតពាក់ស្លាកលេខតែខាងមុខ ដែលនៅពេលមានគ្រោះថ្នាក់ចរាចរណ៍កើតឡើងពួកគេអាចគេចខ្លួនបានយ៉ាងងាយ ដែលផ្ទយុពីច្បាប់ពីចរាចរណ៍ផ្លូវគោក។រថយន្តទាំង៤នេះត្រូវបានសមត្ថកិច្ចធ្វើការផាកពិន័យ៤ចំណុចគឺ ១.អត់ពាក់ស្លាកលេខពិន័យ២ម៉ឺនរៀល,២. អត់ប័ណ្ណសំគាល់យានយន្ត២ម៉ឺនរៀល,៣.អត់មានប័ណ្ណបើកបរ២ម៉ឺនរៀល, ៤.អត់ឈៀក អាជីវកម្ម២ម៉ឺនរៀល ដែលការផាកពិន័យនេះធ្វើតាមច្បាប់អនម្តរកាល។
គួរបញ្ជាក់ថា៖កន្លងមករថយន្តដឹកដីមួយចំនួន ដែលអត់ពាក់ផ្លាកលេខធ្លាប់បង្ក គ្រោះថ្នាក់ចរាចរណ៍ធ្វើអោយជនរងគ្រោះបាត់បង់ជីវិត និងរបួសពិការ ប៉ុន្តែរថយន្ត មួយ ចំនួននោះបានរត់គេចខ្លួនបាត់មិនទទួលខុសត្រូវឡើយ ដោយសាតែគ្មានផ្លាកលេខសំ គាល់ហេតុនេះហើយទើបពេលនេះសមត្ថកិច្ចរឹតបណ្តឹងចាប់ផាកពិន័យរថយន្តនិងអ្នកបើក
បរមិនគោរពច្បាប់។
ដោយឡែកនៅក្នុងច្បាប់ចរាចរណ៍ផ្លូវគោកថ្មីបានចែងនៅក្នុងជំពូកទី១០ នៃទោសប្បញ្ញត្តិមាត្រាទី៨២ចែងថា៖«ជនណាប្រើប្រាស់រថយន្តដោយគ្មានប័ណ្ណសំគាល់រថយន្ត ឬគ្មានផ្លាកលេខរថយន្ត ត្រូវផ្តន្ទាទោសដាក់ពន្ធនាគារ ពី៦ថ្ងៃទៅ១ខែ និងពិន័យ ជាប្រា ក់ពី១០ ម៉ឺនរៀល ទៅ៨០ម៉ឺនរៀល»៕
