ខេត្តប៉ៃលិន៖ ប្រជាពលរដ្ឋក្នុងភូមិអូរតាវ៉ៅជាច្រើននាក់ និងលោកគ្រូ អ្នកគ្រូ បានធ្វើលិខិតមួយច្បាប់ ស្នើរសុំឲ្យអាជ្ញាធរខេត្តធ្វើស្ពានឆ្លងផ្លួវ ដែលខូចខាតកាលពីគ្រោះទឹកជំនន់ក្នុងឆ្នាំកន្លងទៅ ព្រោះតែពួកគាត់ព្រួយបារម្ភអំពីសុវត្ថិភាពកូនៗរបស់គាត់ដែលធ្វើដំណើរទៅរៀនជា
រៀងរាល់ថ្ងៃ ។ ហើយស្ពានឆ្លងផ្លួវដែលប្រជាពលរដ្ឋស្នើរសុំនេះ ស្ថិតតាមដំណរភ្ជាប់ពីផ្លួវកៅស៊ូ ក្នុងភូមិអូរតាវ៉ៅ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ឆ្ពោះទៅសាលាបឋមសិក្សា ស ខេង អូរតាវ៉ៅ ។
ប្រភពពត៌ពីប្រជាពលរដ្ឋ រស់នៅភូមិអូរតាវ៉ៅ សង្កាត់អូរតាវ៉ៅ បានឲ្យអ្នកយកពត៌កម្ពុជាថ្មីដឹងថា៖ ផ្លូវចូលសាលាបឋមសិក្សា ស ខេង អូរតាវ៉ៅមួយខ្សែរនេះ មានប្រព័ន្ធលូមួយកន្លែង ហើយមានការខូចខ្ទេចខ្ទីរដោយសារគ្រោះទឹកជំនន់ក្នុងឆ្នាំកន្លងទៅ ។ ប្រភពបន្តថា៖ នៅមុនពេលបោះឆ្នោតតំណាងរាស្ត្រ មន្ត្រីជំនាញរបស់មន្ទីរសាធារណៈការខេត្ត បានយកស្ពានប៉ាលេ មកដាក់ ដើម្បីឲ្យប្រជាពលរដ្ឋក្នុងភូមិឆ្លងទៅបោះឆ្នោត ជាបណ្តោះអាសន្ន ។ ក្រោយមកដោយមានការពិបាក ក្នុងការធ្វើដំណើរ អាជ្ញាធរភូមិ រហូតដល់អាជ្ញាធរសង្កាត់ ព្រមទាំងលោកគ្រូ អ្នកគ្រូ បានធ្វើលិខិតស្នើរសុំទៅអាជ្ញាធរ ក្រុង/ខេត្ត សុំធ្វើស្ពានថ្មីដើម្បីឲ្យមានការឆ្លងទៅមកស្រួល ប៉ុន្តែរហូតមកដល់ពេលនេះ ពុំដែលឃើញមានមន្ទីរពាក់ព័ន្ធណាមួយមក មើលនោះទេ ។ ប្រភពបន្តទៀតថា៖ ស្ពានប៉ាលេដែលយកមកដាក់ជាបណ្តោះអាសន្ននេះ ឥឡូវត្រួវបានបាក់ស្រុត ជាហេតុធ្វើឲ្យពួកគាត់ ក៏ដូចលោកគ្រូ អ្នកគ្រូ មានការព្រួយបារម្ភយ៉ាងខ្លាំង ពីសុវត្ថភាព សិស្សតូចៗ ដែលធ្វើដំណើរឆ្លងទៅរៀនជារៀងរាល់ថ្ងៃនោះ ។ ពួកបានសំណូមពរដល់អាជ្ញាធរខេត្ត មេត្តាជួយធ្វើស្ពានថ្មី ដើម្បីឲ្យប្រជាពលរដ្ឋ និងសិស្សសាលា ឆ្លងទៅមកស្រួលផង ។
ប្រភពព័ត៌មានពីលោក លាង ចាន់វុទ្ធី នាយកសាលាបឋមសិក្សា ស ខេង អូរតាវ៉ៅ បានប្រាប់អ្នកយកព័ត៌មានកម្ពុជាថ្មីដឹងថា៖ កូនសិស្សដែលរៀននៅសាលាបឋមសិក្សា ស ខេង អូរតាវ៉ៅ នេះ មានចំនួន៣៧៨នាក់ ក្នុងនោះសិស្សស្រីចំនួន១៧៣នាក់ បច្ចុប្បន្នផ្លួវចូលសាលា មានចំនួនមួយខ្សែរ និងស្ពានមួយកន្លែង មានសភាពទ្រុឌទ្រោម ធ្វើឲ្យសិស្សានុសិស្ស និងលោកគ្រូ អ្នកគ្រូ ព្រមទាំងប្រជាពលរដ្ឋក្នុងភូមិ មានការលំបាកក្នុងការធ្វើដំណើរ ទៅសាលារៀន ដែលជាហេតុនាំសិស្សានុសិស្សមានការបោះបង់ ការសិក្សាមានការកើនឡើង ។
ប្រភពព័ត៌មានបន្តទៀតថា៖ នៅពេលនេះស្ពានដែលដាក់បណ្តោះអាសន្ននោះ ត្រួវបានបាក់ដែក ហើយដីចំហៀងក៏កាន់តែបាក់ស្រុតបណ្តើរៗ ជាហេតុធ្វើឲ្យមានការព្រួយបារម្ភៈយ៉ាងខ្លាំង ចំពោះសុវត្ថិភាពប្រជាពលរដ្ឋ លោកគ្រូ អ្នកគ្រូ ពិសេសក្មេងសិស្សសាលាតូចៗទាំងនោះ ។ ប្រភពព័ត៌បន្តឲ្យដឹងទៀតថា៖ យោងតាមលិខិតបង្គាប់ការរបស់សាលាខេត្តប៉ៃលិន លេខ ១២១១/១៤ លបក.បល ត្រួវបានចាត់តាំងក្រុមការងារ ដើម្បីចុះសិក្សាគម្រោងអភិវឌ្ឍន៏ខេត្ត ប៉ុន្តែមកដល់ពេលនេះ ឃើញមន្ត្រីទាំងនោះចុះមកតែម្តង រួចក៏បាត់រហូត ដូច្នោះលោកក៏សូមសំណូមពរដល់មន្ទីរជំនាញ មេត្តាជួយធ្វើស្ពានឲ្យពួកគាត់ឆ្លងទៅមក ស្រួលផង កុំធ្វើឲ្យប្រជាពលរដ្ឋអស់ជំនឿរទៅលើអាជ្ញាធរខេត្ត ព្រោះតែសន្យាខ្យល់ ៕
