ខេត្តប៉ៃលិន ៖ ក្រោយពីទទូលសេចក្តីរាយការណ៍ពីប្រជាពលរដ្ឋថា មានស្តង់ដំឡូងមួយចំនួនកំពុងបង្ហូរទឹកស្អុយមានជាតិពុលចូលក្នុងអូរ ធ្វើឲ្យប៉ះពាល់ដល់សុខភាពប្រជាពលរដ្ឋ និងបរិស្ថានយ៉ាងធ្ងន់ធ្ងរនោះ ទើបអាជ្ញាធរក្រុងប៉ៃលិន និងមន្ទីរបរិស្ថានខេត្តប៉ៃលិន សហការជាមួយអាជ្ញាធរស្រុករតនមណ្ឌលខេត្តបាត់ដំបង ដែលជាប់និងខេត្តប៉ៃលិន បានចុះទៅធ្វើការត្រួតពិនិត្យទឹកអូរ និងតាមស្តង់ដំឡូងមីនីមួយៗ ជាពិសេសស្តង់ឈ្មោះក្រុមហ៊ុនប៉ៃលិន អ៊ីនធើរថេត ខូ អិល ធី ឌី ដែលកំពុងតែមានការហូរទឹកស្អុយចូលក្នុងអូរ ។
ការចុះត្រួតពិនិត្យនេះ មានរយៈពេល២ថ្ងៃជាប់គ្នា គឺថ្ងៃទី២០និង២១ ខែមិនា ឆ្នាំ២០១៥ ដែលស្ថិតនៅតាមបណ្តោយផ្លូវជាតិលេខ៥៧ ក្នុងភូមិប៉ាងរលឹម និងភូមិសួស្តី សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
បើតាមប្រភពពីប្រជាពលរដ្ឋជាច្រើននាក់រស់នៅក្នុងភូមិសួស្តី សង្កាត់ប៉ៃលិន ក្រុងប៉ៃលិន និងភូមិតាគ្រក់ ភូមិជីនៀងលើ ភូមិជីនៀងក្រោម ឃុំត្រែង ស្រុករតនមណ្ឌល ខេត្តបាត់ដំបង ជាប់នឹងព្រំប្រទល់ខេត្តប៉ៃលិនបានរៀបរាប់ឱ្យដឹងថា ជារៀងរាល់ថ្ងៃពួកគាត់មានការលំបាកយ៉ាងខ្លាំង ដោយខ្វះទឹកប្រើប្រាស់ ដូចជាងូត ដាំបាយ ស្រោចស្រពបន្លែជាដើម ហើយពួកគាត់ត្រូវបង្ខំចិត្តនាំគ្នាជិះកង់ ម៉ូតូ អ្នកខ្លះដើរទៅដងទឹកស្រះមួយកន្លែងទៀត ដែលគ្មាន
សារធាតុពុលនៅខាងត្បូងអូរនេះចម្ងាយប្រហែល២ ទៅ៣គីឡូម៉ែត្រ ព្រោះអស់រយៈពេលជាងកន្លះខែមកនេះ ទឹកអូរដែលនៅជិតបង្កើយផ្ទះរបស់ពួកគាត់ត្រូវបានក្លាយទៅជាទឹកស្អុយអសោច៍ ថែមទាំងមានសារធាតុពុល ដោយសារម្ចាស់ស្តង់ដំឡូងមីមួយចំនួន ក្នុងក្រុងប៉ៃលិន មិនបានសាងសង់អាងសម្រាប់ស្តុកទឹកស្អុយ ដែលហូរចេញពីស្តង់ដំឡូងមីរបស់ខ្លួន ពោលគឺបណ្តែតបណ្តោយឱ្យទឹកស្អុយនេះ ហូរចូលទៅក្នុងអូរធម្មជាតិដោយសេរីតែម្តង ។
ប្រជាពលរដ្ឋបានបន្តទៀតថា កាលពីមុនទឹកអូរនេះ ហូររឹមៗថ្លាយង់ គ្មានក្លិនអ្វីទាំងអស់ អាចឱ្យប្រជាពលរដ្ឋប្រើប្រាស់បានយ៉ាងងាយស្រួល ។ ប៉ុន្តែប៉ុន្មានឆ្នាំចុងក្រោយនេះ បន្ទាប់ពីមានថៅកែធំៗជាជនជាតិខ្មែរ និងថៃ បានចូលមកសាងសង់ស្តង់ដំឡូងមីនៅក្នុងភូមិខាងលើ លុះដល់ពេលរដូវប្រមូលផលដំឡូងមីម្តងៗ ខណៈគេចិញ្ច្រាំដាក់ហាល លុះពេលភ្លៀងធ្លាក់មក បណ្តាលឱ្យរងការខូចខាត ហើយទឹកស្អុយនេះ ក៏ហូរធ្លាក់ទៅក្នុងអូរបង្កការប៉ះពាល់តែម្តង ។
ប្រជាពលរដ្ឋសំណូមពរឱ្យអាជ្ញាធរគិតគូរខ្ពស់ដល់សុខភាពរបស់ពួកគាត់ ដោយសាងសង់ជាអណ្តូងទឹក ឬរៀបចំឱ្យស្តង់នីមួយៗ បង្កើតអាងស្តុកសារធាតុពុលនេះ នៅក្នុងកន្លែងរបស់ខ្លួន កុំឱ្យហូរធ្លាក់ក្នុងអូរបន្តទៀត ។
លោក គឹម សុខា ប្រធានមន្ទីរបរិស្ថានខេត្តប៉ៃលិន បានឱ្យដឹងថា ខាងមន្ទីរ ក៏នឹងចាត់ការទៅលើបញ្ហានេះដែរ ព្រោះថាទឹកនេះ បង្កការប៉ះពាល់យ៉ាងខ្លាំងដល់បរិស្ថាន ជាពិសេសបើបងប្អូនប្រជាពលរដ្ឋណាម្នាក់រស់នៅភូមិទាំងនេះ ចុះទៅក្នុងទឹកអូរលាងដៃ លាងជើង អាចបង្កទៅជាកមរមាស់ និងពុលថែមទៀតផងដែរ ។ លោកបញ្ជាក់ទៀតថា ខាងមន្ទីរនឹងឱ្យម្ចាស់ស្តង់នីមួយៗ រៀបចំសារជាថ្មីឡើងវិញ ។
បើតាមការរៀបរាប់របស់លោក ឡូ លុយ អភិបាលរងក្រុងប៉ៃលិន មានប្រសាសន៏ថា ទឹកអូរជាប់ព្រំប្រទល់ខេត្តប៉ៃលិន និងបាត់ដំបង រហូតមកដល់ពេលនេះមានលក្ខណៈខ្មៅធុំក្លិនស្អុយមែន ខាងអាជ្ញាធរក្រុងប៉ៃលិន សហការជាមួយអាជ្ញាធរស្រុករតនមណ្ឌល បានចុះទៅធ្វើការត្រួតពិនិត្យរកឃើញថា ទឹកអូរនេះបង្កការប៉ះពាល់ដល់ប្រជាពលរដ្ឋជាច្រើនគ្រួសារ ។
លោកបានបន្តទៀតថា មូលហេតុនេះ ដោយសារតែម្ចាស់ស្តង់ដំឡូងមីសាងសង់ខុសលក្ខណៈបច្ចេកទេស ដោយអត់មានអាងស្តុកសារធាតុពុលត្រឹមត្រូវ ខណៈពេលភ្លៀងខ្លាំងម្តងៗ បណ្តាលឱ្យហូរជាតិពុលនេះ ចូលទៅក្នុងអូរធ្វើឱ្យពុលត្រី ក្តាម ខ្យង ងាប់អស់ សូម្បីតែយកទៅប្រើប្រាស់ធ្វើអ្វីក៏មិនកើតដែរ ។ លោកបញ្ជាក់ទៀតថា នៅថ្ងៃខាងមុខឆាប់ៗនេះ ខាងអាជ្ញាធរនឹងចាត់វិធានការ ដើម្បីមិនឱ្យបន្តការប៉ះពាល់ដល់ការប្រើប្រាស់របស់ប្រជាពលរដ្ឋតទៅទៀត ៕
