ខេត្ដកំពង់ស្ពឺ ៖ យុវជនម្នាក់បានស្លាប់ ភ្លាមៗនៅកន្លែងកើតហេតុនិងពីរនាក់ ទៀតរងរបួសធ្ងន់នៅក្នុងករណីគ្រោះថ្នាក់ ចរាចរណ៍កាលពីវេលាម៉ោង៥និង៤៥ នាទី ល្ងាចថ្ងៃទី២៣ ខែមីនា ឆ្នាំ២០១៥ តាមបណ្ដោយផ្លូវជាតិលេខ៤ ស្ថិតក្នុង ភូមិពាណិជ្ជកម្ម សង្កាត់រកាធំ ក្រុងច្បារ មន 
ខេត្ដកំពង់ស្ពឺ ។នគរបាលបានឱ្យដឹងថា ជនរងគ្រោះ ដែលបាត់បង់ជីវិតមិនត្រូវបានស្គាល់ អត្ដសញ្ញាណតែជនរងគ្រោះរបួសធ្ងន់ ទី១-ឈ្មោះ ចន ឃាង អាយុ២០ឆ្នាំ និងទី២ -ឈ្មោះ ត្រឿង រាជ អាយុ២២ឆ្នាំ ។ ទាំងអ្នក ស្លាប់និងរងរបួសជាសិស្ស មានទីលំនៅ ភូមិត្រញំងដងទឹក ឃុំទ័ព មាន ស្រុកថ្ពង ខេត្ដកំពង់ស្ពឺ។
លោកវរសេនីយ៍ទោ មាស សុខុម នាយការិយាល័យចរាចរណ៍ផ្លូវគោកបានស្រង់សម្ដីសាក្សីនៅក្បែរកន្លែងកើត ហេតុថា មុនពេលកើតហេតុគេបាន ឃើញជនរងគ្រោះ៣នាក់ជិះម៉ូតូម៉ាក ហុងដាសេ១២៥ ពាក់ស្លាកលេខកំពង់ស្ពឺ 1E-3510ធ្វើដំណើរតាមផ្លូវជាតិលេខ៤ ក្នុងទិសដៅពីកើតទៅលិច។ លុះមកដល់ កន្លែងកើតហេតុបានបត់ឆ្វេងឆ្លងផ្លូវ ដល់ផ្លូវក្រួសក្រហមទៅហើយក៏ត្រូវរថយន្ដម៉ាកហ៊ីយ៉ាន់ដាយដឹក ស៊ីម៉ងត៍ ពណ៌ ក្រហម ពាក់ស្លាកលេខភ្នំពេញ 3C-3950 ធ្វើដំណើរបញ្ច្រាសទិសគ្នារេចង្កូតតាម ទៅបុកដល់ផ្លូវដីក្រហម ហើយកិនជនរង គ្រោះម្នាក់បណ្ដាលឱ្យស្លាប់នៅនឹងកន្លែងចំណែកពីរនាក់ទៀតរង របួសធ្ងន់។ ក្រោយបង្កហេតុអ្នកបើកបររថយន្ដបង្កមិនបានឈប់នោះទេគឺបានបន្ថែម ល្បឿនបើករត់គេចពីក្រុងច្បារមនរហូតដល់ ស្រុកសំរោងទងអូសទាំងម៉ូតូទៅជាមូយជិត៥គីឡូម៉ែត្រ ទើបអ្នកបើកបរឈប់ រថយន្ដចោលនៅទីនោះហើយរត់គេច ខ្លួនបាត់ស្រមោលឈឹង ។
លោក មាស សុខុម បន្ដថាជនរង គ្រោះត្រូវបានបញ្ជូនទៅសង្ក្រេះភ្លាមៗ ផងដែរចំណែកសពសមត្ថកិច្ចបានរុំហើយ ប្រកាសរកក្រុមគ្រួសារឱ្យមកទទួលយក ទៅធ្វើបុណ្យ ។ដោយះសុខសុភ័ណ្ឌ
