ខេត្តប៉ៃលិន ៖ ជនសង្ស័យជួញដូរគ្រឿងញៀនដ៏សកម្មម្នាក់ ត្រូវបានសមត្ថកិច្ចកងរាជអាវុធហត្ថខេត្ត ចាប់ឃាត់ខ្លួន ខណៈយកគ្រឿងញៀនជាង១០គ្រាប់បម្រុងទៅលក់បន្ត ឱ្យអ្នកផ្សេងទៀត ដែលហេតុការណ៍នេះបានកើតឡើងកាលពីវេលាម៉ោង៧ និង៤៥នាទីយប់ថ្ងៃទី២៣ ខែ
មីនា ឆ្នាំ២០១៥ ស្ថិតនៅចំណុចភូមិ អូរច្រាកើត សង្កាត់ទួលល្វា ក្រុងប៉ៃលិន ។
ប្រភពព័ត៌មានពីសមត្ថកិច្ចកងរាជអាវុធហត្ថខេត្តបានឱ្យដឹងថា ជនសង្ស័យ ឈ្មោះ យឿន ចាន់ថន ហៅហឹង ភេទប្រុស អាយុ៤២ឆ្នាំ រស់នៅភូមិបតាំងស៊ូ សង្កាត់បយ៉ាខា ក្រុងប៉ៃលិន ដោយរឹបអូសបានថ្នាំញៀនប្រភេទមេតំហ្វេតាមីន(យ៉ាម៉ា) ពណ៌ផ្កាឈូកចំនួន១១គ្រាប់ ទូរស័ព្ទ១គ្រឿង និងប្រដាប់ប្រដាប្រើប្រាស់គ្រឿងញៀនមួយចំនួនទៀតផងដែរ ។ ប្រភ ពបន្តទៀតថា មុនឈានដល់ធ្វើការចាប់ឃាត់ខ្លួននេះកម្លាំងសមត្ថកិច្ចរបស់យើងបានធ្វើការតាមដានស្រាវជ្រាវ និងដាក់ភ្នាក់ងារសម្ងាត់ជាច្រើនថ្ងៃមកហើយ លុះឃើញជនសង្ស័យកំពុងតែ ធ្វើសកម្មភាពដោះដូរថ្នាំញៀននេះ កម្លាំងយើងក៏ធ្វើការចាប់ឃាត់ខ្លួនតែម្តង ។
បើតាមជនសង្ស័យខាងលើ បានសារភាពថា រូបគេពិតជាបានប្រើប្រាស់ និងចែកចា យគ្រឿងញៀនមែន ដោយទិញពីបុរសមិនស្គាល់អត្តសញ្ញាណម្នាក់នៅក្រុងប៉ៃលិនក្នុង១គ្រាប់ ចំនួន២ម៉ឺនរៀល ហើយបានជូលបុរសម្នាក់ទៀតឱ្យយកមកឱ្យខ្លួន ក្នុង១គ្រាប់ឱ្យថ្លៃគេចំនួន២ពាន់រៀល ។ ប្រភពបន្តទៀតថា រូបគេធ្លាប់ចែកចាយគ្រឿងញៀនជាយូរមកហើយ តែគេមិនធ្លាប់ត្រូវបានសមត្ថកិច្ចចាប់ខ្លួនទេ លុះនៅថ្ងៃកើតហេតុខណៈកំពុងតែយកគ្រឿងបម្រុងលក់ឱ្យមិត្តភក្តិប្រើប្រាស់ក៏ត្រូវកងរាជអាវុធហត្ថខេត្តធ្វើការចាប់ឃាត់ខ្លួនតែម្តង ។
ទោះជាយ៉ាងណាក្តីជនសង្ស័យខាងលើ ត្រូវបានសមត្ថកិច្ចកងរាជអាវុធហត្ថខេត្ត កសាងសំនុំរឿង បញ្ជូនទៅតុលាការ ដើម្បីកាត់ទោសទៅតាមនិតិវិធីច្បាប់៕
