នៅវេលាម៉ោង២និង៣០នាទីរសៀលថ្ងៃទី២៤ ខែមិនា ឆ្នាំ២១០៥ ភ្លើងឆេះព្រៃបានគំរាមកំហែងប្រជាលពលរដ្ឋជាង៥០គ្រួសារព្រួយបារម្ភជាលើកទី២ដោយភ្លើងព្រៃនោះបានឆាបឆេះ នៅវាលព្រៃបន្លាយួន ស្ថិតក្នុងភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង ។ នៅក្នុងហេតុការណ៏នេះ ដោយសារមានការភ័យខ្លាចឆេះរាលដាលដល់ផ្ទះប្រជាពលរដ្ឋដែលនៅតំបន់នោះ សមត្ថកិច្ចនគរបាលមូលដ្ឋានបានហៅរថយន្តបន្លត់អគ្គីភ័យ របស់ស្នងការដ្ឋាននគរបាលខេត្ត មកជួយបាញ់ទឹកពន្លត់អគ្គីភ័យ។
ប្រជាពលរដ្ឋដែលរស់នៅតំបន់ភ្លើងឆេះព្រៃនោះបាននិយាយអោយដឹងថា៖ ដីព្រៃដែលដុះព្រៃជុំជិត សម្បូរណ៏ដោយដើមបន្លាយួន ដើមអញ្ជាញ នោះមានប្រមាណ៦ហិកតាដែលនៅពីក្រោយផ្ទះរបស់ពួកគាត់គឺបានឆេះជារៀងរាល់ឆ្នាំ និងឆ្នាំខ្លះបានឆេះ២ទៅ៣ដង ហើយក៏ធ្លាប់ប៉ើងកំទេចភ្លើងឆេះផ្ទះស្លឹក១ខ្នងផងដែរតែត្រូវបានអ្នកស្រុកជួយពន្លត់ទាន់។
ដោយឡែកនៅឆ្នាំនេះ ភ្លើងឆេះព្រៃនៅទីនេះបានឆាបឆេះជាលើកទី២ហើយ ដែលកាលពីលើកទី១បានឆេះកាលពីថ្ងៃទី១០ខែមិនាម្តងរួចមកហើយ នៅថ្ងៃនេះដែរបើកុំតែបានរថយន្តពន្លត់អគ្គីភ័យរបស់ស្នងការដ្ឋាននគរបាលខេត្តជួយបាញ់ទឹកពន្លត់ទប់ស្កាត់អស់ចំនួន២រថយន្តទេនោះ ប្រហែលជាភ្លើងព្រៃនេះនឹងឆាបឆេះរាលដាលដល់ផ្ទះពួកគាត់ដែលរស់នៅម្តុំនេះជាង៥០គ្រួសារជាពុំខានឡើយ។
ប្រជាពលរដ្ឋបាននិយាយអោយដឹងថា៖ ដីព្រៃដែលគេទុកអោយព្រៃដុះយ៉ាងក្រាស់នេះ
ជាកម្មសិទ្ឋរបស់ លោក រុន រ័ត្នវាសនា អតីតនាយកងរាជអាវុធហត្ថម្នាក់នៅរាជធានីភ្នំពេញ តែបច្ចុប្បន្នបានផ្លាស់មកជានាយនគរបាលម្នាក់ មិនដឹងថានៅខេត្តក្រុងណាទេ ហើយពួកគាត់ក៏មិនបានដឹងថា តើដីនេះគេបានលក់បន្តទៅម្ចាស់ថ្មីទៀតដែរឬនៅទេ ពួកគាត់សំណូមពរអោយម្ចាស់ដីជួយកាប់ឆ្កាព្រៃទាំងអស់នេះចោលផង ព្រោះពួកគាត់ភ័យព្រួយខ្លាំងណាស់ នេះឆេះនៅពេលថ្ងៃ បើឆេះពេលយប់វិញពិបាកក្នុងការជួយអន្តរាគមន៏ជាពុំខានឡើយ។
សមត្ថកិច្ចបាននិយាយអោយដឹងថា៖ការឆេះព្រៃនេះ អាចបណ្តាលមកពីអ្នកបោះកន្ទុយបារីចោលឬយកឃ្មុំមិនពន្លត់ភ្លើងគុប ទើបបង្កអោយមានការឆាបឆេះព្រៃម្តងហើយម្តងទៀតបែបនេះ៕