ឡាហាវ៉ាន់៖ បន្ទាប់ពីការដកទណ្ឌកម្ម ចេញពីប្រទេសគុយបា ដោយសហរដ្ឋអាមេរិករួចមក ធ្វើឲ្យទឹកដីកោះមួយ នេះក្លាយជាទីចាប់អារម្មណ៍សម្រាប់ បណ្តាប្រទេសសេរីជាច្រើននៅលើ សកលលោក ដែលមានគោលដៅចម្បង ក្នុងការបង្កើតចំណងការទូត ជាពិសេសនោះ គឺ
វិស័យពាណិជ្ជកម្មតែម្តង ។
ទីភ្នាក់ងារព័ត៌មានចិនស៊ិនហួ ចេញផ្សាយនៅថ្ងៃពុធ ទី២៥ ខែមីនា ឆ្នាំ២០១៥ នេះថា ប្រធាននយោបាការបរទេស នៃសហភាពអឺរ៉ុប លោកស្រី ហ្វេដឺរីកា ម៉ូហ្គែរីនី បានបំពេញដំណើរ ទស្សនកិច្ចទៅកាន់រដ្ឋធានី ឡាហាវ៉ាន់ ដោយ ក្នុងនោះដែរ តំណាងកំពូលអឺរ៉ុបរូបនេះ ត្រូវបានទទួលស្វាគមន៍យ៉ាងកក់ក្តៅពីសំណាក់ រដ្ឋមន្ត្រីការបរទេសគុយបា លោក ប្រ៊ូណូ រ៉ូឌ្រីហ្គែស ។
លោកស្រី ម៉ូហ្គែរីនី បានមកដល់ទីក្រុង ឡាហាវ៉ាន់ កាលពីថ្ងៃអង្គារ នឹងគ្រោងបំពេញទស្សនកិច្ច នៅគុយបារយៈ ពេលពីរថ្ងៃ ក្នុងគោលបំណងបង្កើតទំនាក់ទំនងឲ្យប្រសើរ ក្រោយពី សហរដ្ឋអាមេរិក បានសម្រេចដកទណ្ឌកម្ម ចេញពីដែនដីកោះមួយនេះ កាលពីចុងឆ្នាំ ២០១៤ ។
គួរបញ្ជាក់ថា គុយបា ជាប្រជាជាតិមួយស្ថិតនៅក្នុងសមុទ្រការីប៊ៀន នៃទ្វីបអាមេរិកខាងជើង ដែលទទួលការដាក់ ទណ្ឌកម្ម ពីអាមេរិកជាង ៥០ឆ្នាំមកហើយ ។ បច្ចុប្បន្នគុយបាមានប្រជាជន ជាង ១១លាននាក់ និង ផ្ទៃដីប្រមាណ ១០៩.៨៨៤ គីឡូម៉ែត្រក្រឡា ។ ស្របពេលនៃសេដ្ឋកិច្ច កំពុងតែត្រូវការនូវការអភិវឌ្ឍជាចាំបាច់ ក្រោយទណ្ឌកម្ម ដកចេញនោះ ប្រទេសសេដ្ឋកិច្ចធំៗ ជាច្រើន បានសម្លឹងមើលឃើញគុយបា ជាឋានសួគ៌នៃការវិនិយោគសម្រាប់ ពេលអនាគត ៕
