នៅវេលាម៉ោង៧និង០៥នាទីព្រឹក ថ្ងៃទី២៧ ខែមិនា ឆ្នាំ២០១៥ អ្នកបើកបររថយន្តម្នាក់ បានរបួសរយះស្លឹកត្រចៀក នៅក្នុងគ្រោះថ្នាក់ចរាចរណ៍មួយ ដោយរថយន្តហ៊ីយ៉ាន់ដាយដឹកក្បឿង បានដាច់កង់ក្រោយ ទៅបុករថយន្តដឹកដំឡូងមី ក្នុងទិសដៅបញ្ច្រាស់គ្នា បណ្តាលអោយ
រថយន្តដឹកដំឡូងមី ក្រឡាប់បះជើងធ្លាក់ក្នុងស្រែ នៅលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ៩៨និង៩៩ ស្ថិតក្នុងភូមិខ្វិត ឃុំពង្រ ស្រុករលាប្អៀរ ខេត្តកំពង់ឆ្នាំង ។
នគរបាលចរាចរណ៍ស្រុករលាប្អៀរ បានអោយដឹងថា រថយន្តរងគ្រោះ ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ តាកែវ 3A-1088 បើកបរដោយឈ្មោះ ខេង រ៉ា អាយុ៣៨ឆ្នាំ រស់នៅភូមិដំណាក់ត្រាច ឃុំរំលិច ស្រុកបាកាន ខេត្តពោធិសាត់ បានរងរបួសរយះស្លឹកត្រចៀកខាងឆ្វេង បើករថយន្តដឹកដំឡូងមី ពីជើងទៅត្បូង ។ ចំណែករថយន្តបង្ក ម៉ាកហ៊ីយ៉ាន់ដាយ ពណ៌ស្លែ ពាក់ស្លាកលេខ ន.០១៨៩ ភព៣ បើកបរដោយឈ្មោះ ជា សាវុន អាយុ២៦ឆ្នាំ រស់នៅភូមិព្រៃទទឹង ឃុំស្វាយប្រទាល ស្រុកស្អាង ខេត្តកណ្តាល ដឹកក្បឿងពេញរថយន្តបើកបរទិសដៅពីត្បូងទៅជើង ។
ក្រោយពេលពិនិត្យកន្លែងកើតហេតុ សមត្ថកិច្ចបានអោយដឹងថា ក្នុងពេលកើតហេតុ រថយន្តដឹកក្បឿង កំពុងបើកបរ បានដាច់កង់ក្រោយផ្នែកខាងឆ្វេង ហើយបានរេចង្កូតទៅបុករថយន្តដឹកដំឡូងមី ក្រឡាប់បះជើងធ្លាក់ក្នុងស្រែតែម្តង ។ ករណីនេះសមត្ថកិច្ចសន្និដ្ឋានថា មកពីរថយន្តដឹកក្បឿងដឹកលើសចំណុះ និងម្យ៉ាង ប្រហែលជាខ្ចៅបូឡុងតាកេចុងដុំកង់រថយន្តរលុងផង ទើបបណ្តាលអោយខ្ចៅដាច់ និងបង្កអោយមានគ្រោះថ្នាក់ដូចខាងលើនេះតែម្តង ។
គ្រោះថ្នាក់នេះ ជាមេរៀនមួយសំរាប់អ្នកបើកបររថយន្តទាំងឡាយ គួរតែប្រុងប្រយត្ន័ផង ដែលក្នុងពេលដឹកឥវ៉ាន់ធ្ងន់ៗ រថយន្តទាំង២គ្រឿង ត្រូវបានសមត្ថកិច្ច យកមករក្សាទុក នៅក្នុងស្នងការដ្ឋាននគរបាលខេត្ត ដោះស្រាយគ្នាតាមនិតិវិធីច្បាប់ ៕
