ខេត្តប៉ៃលិន៖ គេសង្កេតឃើញមន្ត្រីសាខាកាំកុងត្រួល សហការជាមួយមន្ត្រីនៃមន្ទីរពាណិជ្ជកម្មខេត្តប៉ៃលិន ចុះត្រួតពិនិត្យទំនិញហួសសុពលភាព និងអត់ស្លាកយីហោ ព្រមទាំងចំណីអាហាមួយចំនួន ដែលក្រុមអាជីវករ យកមកតាំងលក់នៅតាមផ្សារឬតាមសាលារៀន ជាបន្តបន្ទាប់ ដោយមានរយៈ៣លើក ក្នុងខែមិនានេះ ។ ជាក់ស្តែងកាលពីព្រឹកថ្ងៃទី២៦ ខែមិនា ឆ្នាំ២០១៥ លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្តប៉ៃលិន សហការជាមួយមន្ត្រីនៃមន្ទីរពាណិជ្ជកម្មខេត្ត បានចុះត្រួតពិនិត្យទំនិញហួសសុពលភាព និងអត់ស្លាកយីហោត្រឹមត្រួវ ។ ការចុះត្រួតពិនិត្យទំនិញដែលហួសសុពលភាព ដែលក្រុមអាជីវករ ដាក់តាំងលក់តាមទីផ្សារនេះ ស្ថិតក្នុងផ្សារប៉ាហ៊ី ,តូបលក់ក្នុងសាលាបឋមសិក្សាប៉ាហ៊ី ,តូបលក់ក្នុងវិទ្យាល័យ ហ៊ុន សែន ក្រុងទេពនិមិត្តប៉ៃលិន និងតូបលក់តាមផ្ទះមួយចំនួនផងដែរ ។
ក្នុងការចុះត្រួតពិនិត្យទំនិញហួសសុពលភាព នេះដែរ មន្ត្រីជំនាញដក់ហូត បានទំនិញជាច្រើនប្រភេទ ដូចជា៖ មីកញ្ចប់តូចៗ ,តៅហ៊ួស្អុយ, ទឹកក្រូចដបតូច ធំ,នំកញ្ចប់, ដំណាប់ម្ជូរដែលលក់តាមសាលារៀន និងទំនិញមួយចំនួនទៀត ។
លោក សាន វិជ្ជាសារ៉ាវុធ ប្រធានសាខាកាំកុងត្រួលខេត្តប៉ៃលិន បានឲ្យដឹងថា៖ មន្ត្រីជំនាញចុះត្រួតពិនិត្យ ដែលធ្វើឡើងនៅពេលនេះ គឺដើម្បីបង្ការទប់ស្កាត់ទំនិញដែលចរាចរណ៏លក់ នៅលើទីផ្សារដែលច្បាប់ហាមឃាត់ និងដើម្បីជៀសវាងប្រជាពលរដ្ឋទិញទំនិញខូចគុណភាព យកទៅប្រើប្រាស់ដែលជាហេតុបង្កឲ្យមានផលប៉ះពាល់ដល់សុខភាព និងកើតជំងឺផ្សេងៗ ធ្វើឲ្យខាតបង់ថវិការគ្រួសារ និងថវិកាជាតិ ។
លោកបន្តទៀតថា៖ នេះមិនមែនជាលើកទី១ទេ ដែលមន្ត្រីកាំកុងត្រូល និងមន្ទីរជំនាញចុះត្រួតពិនិត្យនៅក្នុងផ្សារនានាក្នុងខេត្តប៉ៃលិន ,រាល់ការចុះត្រួតពិនិត្យម្តងៗ មន្ត្រីជំនាញតែងតែដក់ហូតបាន នូវទំនិញខូចគុណភាព និងទំនិញអត់ស្លាកយីហោត្រឹមត្រួវ បានជាហូរហែរ ។
លោកក៏បានអំពាវនាវឲ្យអាជីវករ និងម្ចាស់ហាងលក់ទំនិញ ត្រួវតែចូលរួមទាំងអស់គ្នា ដើម្បីទប់ស្កាត់ទំនិញខូចគុណភាព នៅលើទីផ្សារដើម្បីផលប្រយោជន៏ និងសុវត្ថិភាពជូនដល់ប្រជាពលរដ្ឋទូទៅទិញយកទៅបរិភោគ ។
សូមបញ្ជាក់ថា៖ប្រជាពលរដ្ឋក្នុងខេត្តប៉ៃលិន បានលើកជាសំនួរថា តើនេះជាកំហុសអ្នកណា? ឬជាកំហុសរបស់មន្ត្រីចម្រុះប្រចាំច្រកទ្វារអន្តរជាតិព្រំ នៃខេត្តប៉ៃលិន ?ឬឈ្មួញលោតឆ័ត្រលួចនាំចូលតាមច្រករបៀង ៕ អត្ថបទ សេង សុវណ្ណារិទ្ធ