> បាត់ដំបង: ការរុករក និងការធ្វើអាជីវកម្មថ្មកែវ នៅចំនុចជួរភ្នំ150 ស្ថិតនៅក្បែវត្តគិរីសិលាកែវ
> ក្នុងភូមិអន្លង់ស្វាយ ឃុំតាគ្រាម ស្រុកបាណន់ ខេត្តបាត់ដំបង ដែលក្តោបក្តាប់ដោយលោកឧកញ៉ាដ៏វ័យក្មេងម្នាក់ប្រចាំខេត្តបាត់ដំបង ត្រូវបាននិងកំពុងឈានទៅធ្វើអាជីវកម្មនៅលើជួរភ្នំថ្មក្រហមមួយកន្លែងទៀតហើយ ដើម្បីប្រមូលយកប្រភេទថ្មព៌ណម្តង បន្ទាប់ពីបានប្រមូលយកថ្មកែវសឹងតែរលាយតួភ្នំ150អស់មួយចំហៀងរួចមក។គួរបញ្ជាក់ថា កាលពីដើមឡើយជួរភ្នំ150ទាំងមូលមានការការពារ និងអភិរក្សយ៉ាងល្អទៅលើដើមរុក្ខជាតិនានា ពីសំណាក់ប្រជាពលរដ្ឋដែលរស់នៅក្នុងតំបន់នេះ រហូតធ្វើអោយតួភ្នំទាំងមូលមានភាពស្រស់បំព្រង និងមានព៌ណខៀវស្រងាត់ ដែលជាចំណែកមួយក្នុងការលើកនូវសោភ័ណភាពរបស់អាងទឹកកំពីងពួយផងដែរ។ប៉ុន្តែមួយរយ:ក្រោយមកនេះក៏មានបញ្ហាមួយបានកើតឡើង និងធ្វើអោយ
ប្រជាពលរដ្ឋដែលរស់នៅក្នុងតំបន់នេះមានការខកចិត្តយ៉ាងខ្លាំងព្រោះអ្វីៗដែលពួកគេខំប្រឹងថែ ត្រូវបានក្រុមហ៊ុនមួយដែលដឹកនាំដោយលោកឧកញ៉ាវ័យក្មេងម្នាក់ ដាក់គ្រឿងចក្រចូលទៅទន្ទ្រាន ឈូសឆាយដោយធ្វើការដាក់គ្រាប់បំផ្ទុះ បំបុើងដុំថ្មធំៗ ដើម្បីទាញយកនូវប្រភេទថ្មម្យ៉ាងដែលមានឈ្មោះថា”ថ្មកែវ”ដោយគេបានដាក់ម៉ាសុីនកែច្នៃនៅនឹងជើងភ្នំតែម្តងក្នុងការ
ពុស ជ្រៀកដុំថ្មទាំងនោះអោយទៅជាការ៉ូផ្ទាំងៗ ងាយស្រួលក្នុងការនាំចេញទៅកាន់ទីផ្សារនានានៅក្រៅប្រទេស។ប្រជាពលរដ្ឋដែលរស់នៅទីនោះបានលើកឡើងថា ពួកគាត់មានការព្រួយបារម្ភយ៉ាងខ្លាំងអំពីសុវត្ថិភាព ព្រោះពេលដែលគេដាក់គ្រាប់ដើម្បីបំផ្ទុះម្តងៗ ដុំថ្មជាច្រើនបានហោះហើរព្រោងព្រាតដោយឆ្លងកាត់លើដំបូលផ្ទះទៅធ្លាក់ដល់ផ្លូវថ្នល់ ហើយម្យ៉ាងទៀតព្រៃឈើដែលធ្លាប់តែមានភាពស្រស់បំព្រង ឥឡូវស្ទើរតែក្លាយជាទីរហោដ្ឋានទៅហើយ ព្រោះវិសាលភាពនែការធ្វើអាជីវកម្មរបស់ពួកគេ មានទំហំធំធេងណាស់នៅលើខ្នងភ្នំនេះ។
> ប្រភពដដែលបានសង្កាត់ធ្ងន់ថា រយ:ពេលប្រហែលជិតមួយខែកន្លងទៅនេះ គេបានឃើញក្រុមហ៊ុននេះ បានលើកគ្រឿងចក្រចេញទៅចំនុចមួយផ្សេងទៀតហើយដោយទុកកំលាំងខ្លះនៅចាំកន្លែង គឺចំនុចថ្មីដែលគេទៅឈរជើងនេះស្ថិតនៅខាងលិចភ្នំតាគ្រាម គឺនៅលើជួរភ្នំថ្មក្រហម បើគេសំលឹងមើលពីផ្លូវគឺមិនអាចមើលឃើញឡើយ ព្រោះវាស្ថិតនៅខាងក្រោយភ្នំតាគ្រាម ដូច្នេះគេអាចមានលទ្ធភាពធ្វើយ៉ាងឆ្ងាញ់ដៃ ហើយនៅទីតាំងទីពីរនេះ គឺប្រភពគ្រាន់តែដឹងថាជាការធ្វើអាជីវកម្មយកប្រភេទថ្មព៌ណ។
ពាក់ព័ន្ធនឹងការធ្វើអាជីវកម្មលើសម្បត្តិធម្មជាតិទាំងនេះ លោកជឺ ឈាង ប្រធានមន្ទីររ៉ែ និងថាមពល បានលើកឡើងថា គេមានឡាយសិនត្រឹមត្រូវ តែចំពោះវិសាលភាពនែការធ្វើអាជីវកម្មលោកមិនបានចាំទេ។
> ជួបជាមួយកម្ពុជាថ្មីតាមរយ:ទូរស័ព្ទនាព្រឹកថ្ងៃទី28ខែមីនានេះ លោកអភិបាលខេត្ត
> ច័ន្ទ សុផល បានលើកឡើងយ៉ាងខ្លីខណ:ដែលរូបលោកកំពុងស្ថិតនៅក្នុងអង្គប្រជុំថា លោកក្តាប់ មិនជុំទេក្នុងរឿងនេះ ទាល់តែសួរទៅខាងមន្ទីរជំនាញទើបគេដឹង។ប្រភពមួយចំនួនបាននិយាយថា បើច្បាប់មិនបានកំណត់វិសាលភាពនៃការធ្វើអាជីវកម្មអោយបានច្បាស់លាស់ទេនោះ អនាគតជួរភ្នំទាំងនេះប្រាកដជារលាយ ហើយភោគផលរ៉ែធម្មជាតិ
ក៏នឹងវិនាសទៅដែរ៕
