ខេត្តសៀមរាបៈ នារីម្នាក់ត្រូវបានរថយន្តម៉ាកកាមម៉ាស់បើកកៀររួចកិនបែកក្បាលបណ្តាលឲ្យស្លាប់យ៉ាងអាណោចអាធម័នៅកណ្តាលផ្លូវ រីឯអ្នកបើកបរបានកេចខ្លួនបាត់ស្រមោល។
ហេតុការគ្រោះថ្នាក់ចរាចរនេះកើនឡើងនៅម៉ោង៦និង៤៥នាទីព្រឹកថ្ងៃទី២៨ខែមិនាឆ្នាំ២០១៥នៅចំនុចលើដងផ្លូវជាតិលេខ៦ក្នុងភូមិគោកជួន ឃុំពួក ស្រុកពួក ខេត្តសៀមរាប។
លោកវរសេនីយត្រី ទេព ពុំសែន អធិការនគរបាលស្រុកពួកបានប្រាប់ឲ្យដឹងថា ហេតុការគ្រោះថ្នាក់ចរាចរគឺបណ្តាលមកពីរថយន្តម៉ាកកាមម៉ាស់បានបើកក្នុងល្បឿនលឿនទៅកៀរនឹងជាន់អ្នកបើកបរម៉ូតូម៉ាកធូដេរបែកក្បាលស្លាប់ភ្លាមៗនៅនឹងកន្លែងក្នុងទិសដៅស្របទិសគ្នា
ពីលិចមកកើត។លោកបន្តថា រថយន្តបង្កម៉ាកកាមម៉ាស់ពណ៌ត្រាវ ពាក់ស្លាកលេខ ក ៥២៩៦ភ្នំពេញ៣ បើកបរដោយឈ្មោះ ពៅ ភេទប្រុសមានទីលំនៅភូមិថ្មគោល ខេត្តបាត់ដំបង បានគេចខ្លួនបាត់។លោកបន្តទៀតថា ជនរងគ្រោះមានឈ្មោះ សាំងម៉ាឡៃ ភេទស្រី អាយុ២៣ឆ្នាំរស់នៅភូមិគោកថ្មី ឃុំពួក ស្រុកពួក ខេត្តសៀមរាប បើកម៉ូតូម៉ាកធូដេរពណ៌ឈាមជ្រូក ពាក់ស្លាកលេខសៀមរាប ១Q.៩៧០៧។លោកបន្តទៀតថា មូលហេតុនៃការគ្រោះថ្នាក់ចរាចរនេះគឺបណ្តាលមកពីអ្នកបើកបររថយន្តនេះខ្វះការប្រុងប្រយ័ត្ន។
បច្ចុប្បន្ននេះកម្លាំងសមត្ថកិច្ចបានបញ្ជូនរថយន្តបង្កនិងម៉ូតូជនរងគ្រោះទៅកាន់អធិការនគរបាលស្រុកពួកដើម្បីរងចាំការដោះស្រាយតាមផ្លូវច្បាប់។ចំណែកសាកសពជនរងគ្រោះត្រូវបានសមត្ថកិច្ចប្រគល់ឲ្យក្រុមគ្រួសារដើម្បីយកទៅធ្វើបុណ្យតាមប្រពៃណី៕