កំពង់ឆ្នាំង៖យុវជនសិស្សសាលា៣នាក់របួសធ្ងន់ស្រាលជាប់ជាមួយម៉ូតូនៅក្រោមរថយន្តខណៈដែលពួកគេជិះម៉ូតូឆ្លងផ្លូវបែកជា៤ ត្រូវរថយន្តបែនបុកអូសជិត១០ម៉ែត្រ។ហេតុការណ័នេះបានកើតឡើងវរលាម៉ោង២និង៤០នាទីរសៀលថ្ងៃទី១២ ខែឧសភា ឆ្នាំ២០១៥ នៅលើផ្លូវកៅស៊ូក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង។ ប្រជាពលរដ្ឋឃើញហេតុការណ៍នេះនៅកន្លែងកើតហេតុបានអោយដឹងថា៖មុនពេលកើតហេតុយុវជនទាំង៣នាក់បានជិះម៉ូតូ១គ្រឿងម៉ាកហុងដាឌ្រីមពណ៌ខ្មៅ ពាក់ផ្លាកលេខភ្នំពេញ 1AN-8219ពី
ជើងទៅត្បូង ឆ្លងផ្លូវបែកជា៤ ពេលនោះរថយន្តបែនម៉ាកហ៊ីយ៉ានដាយពាក់ផ្លាកលេខ កំពង់ឆ្នាំង 3A-0094 ពណ៌ខៀវបានបើកពីកើតមកលិចបុកអូសម៉ូតូនិងមនុស្សអូសពីក្រោមរថយន្តជិត១០ម៉ែត្រទើបអស់ល្បឿន ផ្ទប់និងជញ្ជាំងរបងផ្ទះប្រជាពលរដ្ឋ បណ្តាលអោយយុវជន២នាក់របួសស្រាល និងម្នាក់របួសធ្ងន់។ក្រោយពេលកើតហេតុអ្នកបើកបររថយន្តបានចុះរត់គេចខ្លួនបាត់ 
ចំណែកជនរងគ្រោះទាំង៣នាក់ត្រូវបានអ្នកស្រុកជួយអូសចេញពីក្រោមរថយន្ត ១ឈ្មោះ សេង វិរះ អាយុ១៨ឆ្នាំអ្នកបើកម៉ូតូរបួសបាក់កជើងឆ្វេង ២ឈ្មោះ ម៉ែន សុខ ហេង អាយុ១៨ឆ្នាំ របួសស្រាល ៣ឈ្មោះ ស៊ុន ចាន់ អាយុ១៩ឆ្នាំ របួសធ្ងន់ធ្ងរមិនដឹងខ្លួន ពួកគេរស់នៅភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង ត្រូវរថយន្តមន្ទីរពេទ្យដឹកយកទៅសង្គ្រោះនៅក្នុងមន្ទីរពេទ្យខេត្ត។រថយន្តនិងម៉ូតូខូចធ្ងន់ត្រូវបានសមត្ថកិច្ចអូសយកទៅរក្សាទុកនៅក្នុងអធិការដ្ឋាននគរបាលក្រុងកំពង់ឆ្នាំងកាសងសំណុំរឿងតាមផ្លូវច្បាប់៕
