សៀមរាបៈ មានរឿងហួសចិត្តចំពោះរថយន្តតូរីមួយគ្រឿង ដែលជារថយន្តខូច បើកជ្រុលល្បឿនទៅបុករថយន្ត តូរីស ដែលសណ្តោងក្រឡាប់ធ្លាក់ស្ពាន កាលពីវេលាម៉ោង ៣.៣០នាទី នៅចំណុចស្ពានតូច ឃុំឬស្សីលោក ស្រុកជីក្រែង ខេត្តសៀមរាប នៅថ្ងៃទី ១២ ខែ ឧសភា ឆ្នាំ ២០១៥។
តាមការឲ្យដឹងពី អ្នកបើករថយន្តខាងក្រោយរថយន្តកើតហេតុ ដែលបានឃើញហេតុការ ឲ្យដឹងថា មុនពេលកើតហេតុ មានរថយន្តតូរី ២គ្រឿង ដែលជារថយន្តរបស់ ក្រុមហ៊ុន ZIFAM SUDIMA PHARMACEUTICAL CO .,LTD ជាក្រុមហ៊ុនដឹកថ្នាំពេទ្យចែកចាយ តាមហ្វាមស៊ី បណ្តាខេត្តក្រុង ដែលមានទីលំនៅ ផ្ទះលេខ ៣៩ ផ្លូវ៣៧៦ សង្កាត់បឹងកេងកង ខណ្ទចំការមន ភ្នំពេញ បានសណ្តោងគ្នាចេញពីស្រុកក្រឡាញ់ ខេត្តសៀមរាប ក្នុងគោលបំណងយកទៅជួសជុល នៅភ្នំពេញ លុះមកដល់ចំនុចកើតហេតុ ដែលជាចំនុចស្ពាន មានស្ថានភាពដីទួល
ឡើងស្ពាន ដែលគ្មានបង្កាន់ដៃ ខណៈពេលដែលផ្លូវកំពុងតែធ្វើការជួសជុល ក៏ស្រាប់តែរថយន្តដែលជាអ្នកសណ្តោងម៉ាកតូរី ពណ៌ ស ពាក់ស្លាកលេខ ភ្នំពេញ 2B- 5954 បានបើកលឿនពេកព្រោះភ្លេចគិតថាដីមិនរៀបស្មើរ ដល់ចុះទួល ដល់ឡើងទួល វិញក៏បានចាប់ហ្វ្រាង បណ្តាលឲ្យរថយន្តដែលខូច ពាក់ស្លាកលេខ ភ្នំពេញ 2C- 2552 សន្តោងនៅពីក្រោយមិនទាន់អស់ ល្បឿនបានជ្រុកបុកពីក្រោយរថយន្ត សណ្តោងបណ្តាលឲ្យរថយន្តសណ្តោងជ្រុលធ្លាក់ទៅនៅក្រោមស្ពាន ក្នុងរថយន្ត បានមនុស្សប្រុសស្រី៥នាក់រងរបួសស្រាល ចំណែករថយន្តខូចខាតទាំងស្រុង ។
ករណីគ្រោះថ្នាក់ដោយគ្នាឯងនោះ បានធ្វើឲ្យប្រជាពលរដ្ឋ លាន់មាត់ថា នេះជាសំណាងល្អក្នុងមួយពាន់គ្រោះថ្នាក់ ដោយសារតែខ្សែសណ្តោងបានដាច់ទាន់ កុំអីរថយន្តតូរីសដែលខូច ធ្លាក់សង្កត់ពីលើទៀត ប្រាកដធ្វើឲ្យមានមនុស្ស គ្រោះថ្នាកធ្ងន់ធ្ងន់ដល់ជីវិតក៏មិនដឹង ។
ដោយ ប៊ុន រដ្ឋា
