ភ្នំពេញ ៖ បុរសដែលជាអ្នករត់រ៉ឺម៉កកង់បីម្នាក់ បានរងរបួសធ្ងន់ ត្រូវបានរថយន្ដសាមុយ ដឹកយកទៅសង្គ្រោះនៅ មន្ទីរពេទ្យភ្លាមៗ ដោយសារតែត្រូវរថយន្តដឹកសាំង របស់ក្រុមហ៊ុនតូតាល់ បានបើកបុករ៉ឺម៉កកង់បី ខណះកំពុងឈប់តថ្លៃភ្ញៀវ កាលពីវេលាម៉ោង២នឹង៥០នាទីយប់រំលអាធ្រាត ឈានចូលថ្ងៃទី១៣ ខែឧសភា ឆ្នាំ២០១៥ មុខសាលាបឋមសិក្សា ហ៊ុន នាង តាមបណ្តោយផ្លូវលេខ២៧១ ស្ថិតក្នុងសង្កាត់ទួលទំពូងទី២ ខណ្ឌចំការមន ។
សាក្សីនៅកន្លែងកើតហេតុ បានឱ្យដឹងថា នៅមុនពេលកើតហេតុ គេបានឃើញរថយន្តដឹកសាំង របស់ក្រុមហ៊ុនតូតាល់ បើកបរតាមបណ្តោយផ្លូវលេខ២៧១ ទិសដៅពីជើងទៅត្បូង ក្នុងល្បឿនយ៉ាងលឿន ខណះមកដល់ ចំណុចកើតហេតុ ក៏បានជ្រុលបុករ៉ឺម៉កម៉ូតូកង់បី ដែលកំពុងឈប់តថ្លៃជាមួយភ្ញៀវ បណ្តាលឱ្យក្រឡាប់ផ្ងារជើង និងម្ចាស់រ៉ឺម៉ករងរបួសធ្ងន់ ត្រូវបានរថយន្តសាមុយ ដឹកយកទៅសង្គ្រោះនៅមន្ទីរពេទ្យភ្លាម ៗ ។
ប្រភពបន្តថា ក្រោយបង្កហេតុ រថយន្តបង្កបានព្យាយាមបើករត់ បានប្រមាណជា១៥០ម៉ែត្រ ត្រូវបានអ្នកដំណើរដែលបានឃើញហេតុការណ៍នេះ ដេញឃាត់បានផងដែរ ។
ក្រោយមកសមត្ថកិច្ចមូលដ្ឋាន បានចុះមកដល់កន្លែងកើតហេតុ និងបានសហជាមួយជំនាញ យករថយន្ត និងរ៉ឺម៉កកង់បី ទៅរក្សាទុកនៅអធិការដ្ឋាននគរបាល ខណ្ឌចំការមន រង់ចាំដោះស្រាយបន្ត ៕