ភ្នំពេញ ជនល្មើសម្នាក់ក្នុងចំណោមបក្សពួកជាច្រើននាក់ បានរបួសជើងឆ្វេងមួយគ្រាប់ ដោយបានបាញ់តដៃជា មួយសមត្ថកិច្ចច្រើនគ្រាប់ បន្ទាប់ពីគេរួមជាមួយបក្សពួក បានធ្វើសកម្មភាពភ្ជង់ប្លន់យកម៉ូតូស្តុបពី ពីបុរសនារី២នាក់ជិតស្ថានទូតចិន ហើយត្រូវបានសមត្ថកិច្ចដែលកំពុងតែជិះល្បាត នៅក្នុងមូលដ្ឋានប្រទះឃើញ និងបានដេញតាមរហូតដល់ផ្សារញ៉ែរ ទើបជនល្មើសដួលតែម្តង ។
ហេតុការណ៍ភ្ញាក់ផ្អើលនេះ បានកើតឡើងកាលពីវេលាម៉ោងរំលងអាធ្រាត ឈានចូលថ្ងៃទី១៣ ខែឧសភា ឆ្នាំ២០១៥ តាមបណ្តោយផ្លូវលេខ២១៥ ស្ថិតក្នុងសង្កាត់ផ្សារដេប៉ូទី១ ខណ្ឌទួលគោក ដោយសមត្ថកិច្ចដកហូតបានកាំភ្លើងខ្លីមួយដើម និងម៉ូតូជនល្មើសម៉ាកនិចមួយគ្រឿង ចំណែកម៉ូតូជនរងគ្រោះ បក្សពួកជនល្មើសបានយកជិះគេចខ្លួនបាត់ ។
តាមសម្តីរៀបរាប់ពីបុរសដែលជាជនរងគ្រោះ បានឱ្យដឹងថា នៅមុនពេលកើត រូបគេបានជិះម៉ូតូម៉ាកស្តុបពីជាមួយនារីម្នាក់ជាសង្សារ ចេញពីជិតផ្សារសូរិយា ហើយបានជិះម៉ូតូឌុបគ្នាបំណងត្រឡប់ទៅផ្ទះវិញ នៅម្តុំបឹងទំពុន ខណះជិះដល់ផ្លូវលេខ១៧៣ ជិតនឹងស្ថានទូតចិន ក៏បានលិចមុខក្រុមជនសង្ស័យ ជិះម៉ូតូ៤គ្រឿង មានគ្នាប្រមាណជិត១០នាក់ បានជិះអែបជិត និងធ្វើសកម្មភាពដកកាំភ្លើងខ្លី ភ្ជង់ប្លន់យកម៉ូតូពីរូបគេ ថែមទាំងបានគំរាមបាញ់បើសិនជាហ៊ានស្រែក ។ ជនរងគ្រោះបានបន្តថា នៅពេលដែលពួកក្រុមជនល្មើស មិនទាន់បានជិះចេញផងនោះ ក៏មានកម្លាំងសមត្ថកិច្ច ដែលកំពុងជិះល្បាតមកឃើញ ប៉ុន្តែមិនបានចាប់អារម្មណ៍ក៏ជិះហួស ប៉ុន្តែត្រូវបានរូបគេស្រែកឱ្យជួយ ពេលនោះសមត្ថកិច្ចក៏បានធ្វើការដេញតាមតែម្តងទៅ ។
សមត្ថកិច្ចបានឱ្យដឹងថា បន្ទាប់ពីលឺដូច្នេះ កម្លាំងជាច្រើននាក់ បានជិះម៉ូតូដេញតាមជនល្មើសពីក្រោយ តាំងពីកន្លែងកើតហេតុ រហូតមានការផ្ទុះអាវុធជាច្រើនគ្រាប់ ហើយជនល្មើសបានបាញ់តដៃជាមួយសមត្ថកិច្ចផងដែរ ប៉ុន្តែជនល្មើស ត្រូវសមត្ថកិច្ចបាញ់ចំជើងឆ្វេងមួយគ្រាប់ បណ្តាលឱ្យហូរឈាមស្រោចរួចដួលម៉ូតូ នៅម្តុំផ្សារញ៉ែរ ទើបសមត្ថកិច្ចធ្វើការឃាត់ខ្លួន រួចដកហូតបានកាំភ្លើងខ្លីមួយដើម និងម៉ូតូធ្វើសកម្មភាពម៉ាកនិចមួយគ្រឿង ចំណែកម៉ូតូជនរងគ្រោះបក្សពួកជនល្មើស បានយកជិះគេចខ្លួនបាត់ ។ មិនតែប៉ុណ្ណោះ ជនល្មើសត្រូវបានប្រជាពលរដ្ឋវាយថែមមួយដៃមួយជើង ឡើងទ្រោមខ្លួន រួចត្រូវបានសមត្ថកិច្ចនាំខ្លួនយកទៅសួរនាំ នៅអធិការដ្ឋានខណ្ឌចំការមន រង់ចាំចាត់ការទៅតាមផ្លូវច្បាប់ និងតាមស្វែងរកបក្សពួក ដែលរត់គេចខ្លួនបន្ថែមទៀត ៕