បាត់ដំបង: យ៉ាងហោចណាស់ក៏មានប្រជាពលរដ្ឋប្រមាណជាង300នាក់ដែរ ដែលត្រូវបានអាជ្ញាធរថៃចាប់បញ្ជូនអោយវិលត្រឡប់មកស្រុកកំណើតវិញកាលពីថ្ងៃទី7-5-15 ចាប់ពីម៉ោង2,35នាទីរហូតដល់ម៉ោង4,56នាទីល្ងាច តាមបណ្តាច្រករបៀងមួយចំនួនក្នុងស្រុកសំពៅលូន ខេត្តបាត់ដំបងខណ:ដែលកងទ័ពថៃកំពុងធ្វើការពង្រឹងសន្តិសុខផ្ទៃក្នុងរបតាមសេចក្តីរាយការពីប្រភពដែលស្ថិតនៅតាមខ្សែបន្ទាត់ព្រំដែនកម្ពុជា ថៃ ក្នុងស្រុកសំពៅលូនបានអោយដឹងថា នៅតាមច្រករបៀងមួយចំនួនដែលស្ថិតនៅតាមបណ្តោយព្រំដែនថៃដូចជាច្រករបៀង63 ហៅច្រកអង់តែន ត្រង់ចំនុចភូមិពោធិជ្រៃ ឃុំសិរីមានជ័យ មានប្រជាពលរដ្ឋជាច្រើនដែលកំពុងសំរុកចេញទៅធ្វើការនៅក្នុងប្រទេសថៃ ត្រូវបានអាជ្ញាធរថៃរារាំង និងចាប់បញ្ជូនអោយវិលត្រឡប់មកក្នុងទឹកដីរបស់ខ្លួនវិញ ក្នុងនោះមានស្រី មានប្រុស ព្រមទាំងកុមារជាច្រើននាក់ផងដែរដែលសរុបមានចំនួន303នាក់ ក្នុងនោះកុមារដែលជាអនីតិជនមានចំនួន74នាក់។ ការឆ្លងដែនទៅធ្វើការនៅប្រទេសថៃរបស់ពលករខ្មែរ គេសង្គេតឃើញថា មានសន្ទុះខ្លាំងក្លា
ចាប់តាំងពីក្រោយថ្ងៃចូលឆ្នាំខ្មែរមកម្ល៉េះ ព្រោះនៅមុនថ្ងៃចុលឆ្នាំពួកគេទាំងអស់គ្នាបានត្រឡប់មក កម្ពុជាវិញក្នុងគោលបំនងជួបជុំក្រុមគ្រួសារ សាច់ញាតិ និងបងប្អូននៅឯស្រុកកំណើត។លុះនៅក្រោយពេលចូលឆ្នាំ ទើបពួកគេនាំគ្នាសំរុកវិលចូលទៅក្នុងទឹកដិថៃវិញដោយក្នុងនោះខ្លះក៏មានច្បាប់ត្រឹមត្រូវ រីឯខ្លះទៀតគឺជាពលករខុសច្បាប់ផងដែរ ដូច្នេះហើយបានជាពួកគេនាំគ្នាចេញចូលតាមច្រករបៀងបែបនេះដើម្បីគេចអំពីការរារាំងរបស់ទាហានថៃ និងអាជ្ញាធរដែនដីរបស់ពួកគេ។បើតាមការអះអាងពីប្រភពមួយនៅក្នុងប្រទេសថៃបានអោយដឹងថា នៅព្រឹកថ្ងៃទី8ឧសភានេះលោកឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃបានធ្វើដំណើរទៅកាន់ច្រកក្លងលឹក(អូរជ្រៅ) ដូច្នេះហើយបានជាពួកគេធ្វើការរឹតបន្តឹងទៅលើសន្តិសុខតាមខ្សែបន្ទាត់ព្រំដែន ដើម្បីរក្សានូវសណ្តាប់ធ្នាប់តាមខ្សែបន្ទាត់។ម្យ៉ាងវិញទៀត ភាគីថៃបានស្នើសុំអោយប្រជាពលរដ្ឋទាំងអស់ដែលវិលត្រឡប់មកវិញត្រូវធ្វើយ៉ាងណាគឺការចេញចូលត្រូវមានលិខិតស្របច្បាប់របស់គ្រប់រូប។បច្ចុប្បន្នពលករទាំងអស់នោះកំពុងធ្វើដំណើរទៅកាន់ស្រុកកំណើតរៀងៗខ្លួនវិញហើយដោយមិនមានការវាយដំ ឬទទួលរងនូវអំពើហឹង្សាណាមួយពីសំណាក់ទាហានថៃឡើយ៕