បាត់ដំបង: ក្មេងប្រុសម្នាក់ដែលទើបនឹងមានអាយុ12ឆ្នាំត្រូវបានរថយន្តកិនផ្ទប់ទៅនឹងមាត់លូ
បណ្តាលអោយផ្ទុះលលាដ៏ក្បាលកាលពីវេលាម៉ោង3,30នាទី ល្ងាចថ្ងៃទី7-5-15 តាមបណ្តោយផ្លូវជាតិលេខ5 ត្រង់ចំនុចភូមិអូរចារ សង្កាត់អូរចារ ក្រុងបាត់ដំបង ខណ:ដែលក្មេងប្រុសរូបនោះកំពុងជិះកង់តែម្នាក់ឯង ហើយត្រូវរថយន្តមកបុកចំពីក្រោយ។
ហេតុការណ៍ដ៏អាណោចអាធមនេះត្រូវបានប្រភពជាច្រើនដែលនៅទីនោះបាននិយាយថា
ដំបូងគេឃើញមានរថយន្តមួយគ្រឿងម៉ាកកាមរីព៌ណខ្មៅស៊ែរីឆ្នាំ93 ពាក់ស្លាកលេខក្រុងប៉ៃលិន2A0239 បានបើកបរយ៉ាងលឿនក្នុងទិសដៅពីលិចទៅកើតតាមបណ្តោយផ្លូវភ្លោះ។
ប្រភពដដែលបានបន្តទៀតថា លុះនៅពេលដែលរថយន្តបើកបរទៅដល់ត្រង់ចំនុចកើតហេតុខាងលើ ក៏ស្រាប់តែបានរេចង្កូតទៅបុកលើកង់មួយគ្រឿងដែលជិះដោយក្មេងប្រុសម្នាក់ បណ្តាលអោយក្មេងប្រុសនោះហោះផ្លោងទៅក្បែនឹងមាត់លូជាប់ចិញ្ចើមថ្នល់ ប៉ុន្តែរថយន្តមិនបានបង្អង់ល្បឿននោះទេ គេបែរជាជាន់ហ្គាបន្ថែម បណ្តាលអោយកង់រថយន្តខាងមុខកិនចំក្បាលក្មេងផ្ទប់ទៅនឹងជ្រុងគំរបលូធ្វើអោយផ្ទុះលលាដ៏តែម្តង ដែលមើលទៅការស្លាប់នេះគួរអោយសង្វេកក្រៃលែង។នៅពេលនោះដែរទាំងប្រជាពលរដ្ឋ ក៏ដូចជាសមត្ថកិច្ចបានមកចោមរោមមើល ព្រមទាំងបានឃាត់ខ្លួនអ្នកបើកបរដើម្បីប្រគល់ទៅអោយខាងសមត្ថកិច្ចជំនាញជាអ្នកដោះស្រាយ ចំណែកម្តាយក្មេងរងគ្រោះបានស្រែកទ្រហ៊ោយំយ៉ាងខ្លាំងដោយក្តីអាឡោះអាល័យទៅលើកូនប្រុសរបស់ខ្លួនដែលបានស្លាប់យ៉ាងវេទនា។ក្មេងប្រុសរងគ្រោះនោះមានឈ្មោះឃឿន ពុទ្ធាលី អាយុ12ឆ្នាំរស់នៅក្នុងសង្កាត់អូរចារនោះតែម្តង។
នៅចំពោះមុខសមត្ថកិច្ចចរាចរ អ្នកបើកបររថយន្តដែលមានឈ្មោះយឿន វាសនា ភេទប្រុសអាយុ32ឆ្នាំ រស់នៅភូមិអូរដំបង ឃុំអូរដំបង2 ស្រុកសង្កែបានទទួលស្គាល់ថាការបើកបររបស់ខ្លួន ពិតជាបានខុសទាំងស្រុង ដោយសារតែខ្លួនមានការងងុយដេកខ្លាំងពេកក៏បានរេចង្កូដោយមិនដឹងខ្លួនហើយនៅពេលបុកភ្លាម ខ្លួនហាក់ដូចជាភ្ញាក់កន្ត្រាក់ក៏ជាន់ហ្គាបន្ថែមទើបបណ្តាលអោយកិនក្បាលក្មេងប្រុសនោះបន្ថែមតែម្តង។លោកវរ:សេនីយ៍ឯកសាត គឹមសាន នាយការិយាល័ចរាចរផ្លូវគោកខេត្តបានគូសបញ្ជាក់ថានេះគឺជាកំហុសមួយយ៉ាងធ្ងន់ធ្ងរដោយសារតែការបើកបរខ្វះការប្រុងប្រយ័ត្ន ហើយខំប្រឹងបើកទាំងងងុយដេក មិនព្រមឈប់សំរាកសិន ដូច្នេះបច្ចុប្បន្នអ្នកបើកបរត្រូវបានឃាត់ខ្លួនជាបណ្តោះអាសន្នហើយនឹងកំពុងរៀបចំឯកសារដើម្បីបញ្ជូនខ្លួនទៅសាលាដំបូងតាមផ្លូវច្បាប់៕
