> បាត់ដំបង: នៅព្រឹកថ្ងៃទី13-5-15 នេះសាលាស្រុកសង្កែបានចេញលិខិតគាស់អញ្ជើញតំណាងប្រជាពលរដ្ឋទាំង67គ្រួសារក្នុងសហគមន៍នឹងតាអឿ ដែលស្ថិតក្នុងភូមិក្បាលថ្នល់ ឃុំកំពង់ព្រៀងស្រុកសង្កែ ខេត្តបាត់ដំបង អោយចូលខ្លួនដើម្បីពិភាក្សានិងរកដំណោះស្រាយ អំពីបញ្ហារវាងដីបឹង ដែលប្រជាពលរដ្ឋទាមទាអោយទុកជាសម្បត្តិរដ្ឋ និងភាគីម្ខាងទៀតដែលកំពុងទាមទាយកដីបឹងនេះធ្វើជាកម្មសិទ្ធិឯកជន ដែលទំនងជាមានការឃុបឃិតគ្នាជាមួយនឹងមន្ត្រីជំនាញណាមួយផង។ កន្លងមកគេសង្គេតឃើញថាការរកដំណោះស្រាយរឿងដីបឹងតាអឿដែលស្ថិតនៅចំនុចខាងលើ គឺបានធ្វើឡើងជាញឹកញាប់ តាំងពីមូលដ្ឋានរហូតដល់ថ្នាក់ខេត្តប៉ុន្តែនៅតែមិនបានសម្រេចអោយចប់ចុង ចប់ដើមឡើយ មានន័យថានៅតែមានការអូសបន្លាយពេលរាប់ឆ្នាំមកហើយ។បញ្ហាដែលកើតមានឡើងនេះគឺដោយសារតែមានបុគ្គលមួយក្តាប់តូចបានឃុបឃិតត្រូវរ៉ូវគ្នាយកប្លង់ដែលមានក្បាលដីលេខ67ដែលមន្ទីររៀបចំដែនដីនគរូបនីយកម្មពីមុន បានចេញប្លង់ចងក្រងជាប្រព័ន្ធដោយបានបញ្ជាក់ថាជាដីបឹង
> គឺជាដីរបស់រដ្ឋនោះមកពុសជាពីដែលមានក្បាលដីលេខ1338និង1339វិញហើយបានកំណត់ថាជាដីលំនៅដ្ឋាន បន្ទាប់ពីមានការផ្លាស់ប្តូរប្រធានមន្ទីរថ្មី ដែលលោកប្រធានមន្ទីរចាស់បានឡើងទៅជាអភិបាលខេត្តរងទៅហើយនោះ។ អ្វីដែលសំខាន់នឹងធ្វើអោយប្រជាពលរដ្ឋមានការងឿងឆ្ងល់នោះគឺទឺតាំងបឹងតាអឿនេះលោកអភិបាលខេត្តបានចេញលិខិតអនុញ្ញាតិមួយអោយដល់ប្រជាពលរដ្ឋនៅក្នុងសហគមន៍ធ្វើការស្តារបឹង នេះឡើងវិញក្នុងទំហំ40ម៉ែត្រគុណ70ម៉ែត្រនិងជំរៅ5ម៉ែត្រ ដោយមានវ៉ៃត្រាក្រហមឆ្អៅ ក្នុងគោលបំនង រក្សាទឹកទុកស្រោចស្រពស្រូវនារដូវប្រាំង នឹងអាចរំដោះទឹកជំនន់នារដូវវស្សា លុះពេលដែលប្រជាពលរដ្ឋធ្វើការស្តារបឹងបានប្រហែល40ភាគរយក៏ស្រាប់តែមានការអោយផ្អាកជាបណ្តោះអាសន្នទៅវិញ ដូច្នេះតើត្រាលោកអភិបាលខេត្តអាចមានប្រសិទ្ធិភាពដែរឬទេ?
> នៅក្នុងជំនួបនៃការរកដំណោះស្រាយនៅក្នុងសាលាស្រុកសង្កែគេសង្គេតឃើញមានវត្តមាន
> លោកអ៊ូ ដារី ប្រធានមន្ទីររៀបចំដែនដីនគរូបនីយកម្ម(ឡើងថ្មី) លោកសួន សាវ៉េត អភិបាលស្រុកសង្កែលោកនាង ចាន់ខារ៉ា នាយកទីចាត់ការអន្តរវិស័យនៃសាលាខេត្ត លោកង៉ែត មករា មន្ត្រីការិយាល័យកិច្ចការច្បាប់ខេត្តនិងអាជ្ញាធរមូលដ្ឋាន ព្រមទាំងតំណាងប្រជាពលរដ្ឋនៅក្នុងសហគមន៍បឹងតាអឿពីររូប។ជាកិច្ចលើកឡើងដំបូងគឺលោកអ៊ូ ដារី ពុំមានពាក្យអ្វីនឹងថ្លែងក្រៅពីផ្លូវច្បាប់របស់ភូមិបាល តែប៉ុណ្ណោះ ដូចកាលដែលលោកចុះទៅដោះស្រាយនៅឯសាលាឃុំកំពង់ព្រៀងនោះដែរ ដែលសំដៅទៅលើដីគ្មានទិន្នន័យដើម្បីយកមកធ្វើជាគោលក្នុងទិសដៅជំរុញអោយប្រជាពលរដ្ឋធ្វើការសម្បទាន។ប៉ុន្តែលោកអ៊ូ ដារី មិនបានពិចារណាាហេតុអ្វីបានជាប្លង់រឹងទាំងអស់របស់ប្រជាពលរដ្ឋបានបញ្ជាក់យ៉ាងច្បាស់ថាក្បាលដីលេខ67គឺជាដីបឹងតាអឿ ហើយគឺជាដីរដ្ឋ ដូច្នេះមានន័យថាមន្ទីរតែមួយតែនៅពេលដែលមានការផ្លាស់ប្តូរប្រធាន នោះការអនុវត្តច្បាប់មានការខុសគ្នាឬយ៉ាងណា? ហេតុអ្វីបានជាលោកអ៊ូ ដារី
> មិនស្តាប់ចាស់ព្រឹទ្ធាចារ្យនៅក្នុងភូមិ និងមិនស្តាប់លោកអភិបាលស្រុកដែលជាអាជ្ញាធរដែនដីខ្លះផង? ដើម្បីយកចំនុចនេះទៅសិក្សា ដើម្បីធ្វើការសម្រេច? ឬមួយក៏លោកប្រធានមន្ទីរថ្មីត្រូវបានឥទ្ធិពលអ្វីម្យ៉ាងមកបាំងមុខធ្វើអោយលោកគិតអ្វីលែងឃើញ? នៅក្នុងឱកាសនោះដែរតំណាងប្រជាពលរដ្ឋបានធ្វើការជំទាស់យ៉ាងដាច់ខាត ដោយប្រកាន់ជំហរយ៉ាងរឹងមាំក្នុងការទាមទាយកដីបឹងតាអឿនេះមកទុកជាសម្បត្តិរដ្ឋ ដោយមិនអនុញ្ញាតិអោយបុគ្គលណាម្នាក់យកដីបឹងនេះទៅធ្វើជាកម្មសិទ្ធិឯកជនបានឡើយដោយសារតែពួកគេមានឯកសារក្នុងដៃគ្រប់គ្រាន់ក្នុងការអះអាងថាក្បាលដីលេខ67គឺជាបឹងបុរាណ ដែលកើតមានឡើងជាយូរមកហើយ។បន្ទាប់ពីតំណាងប្រជាពលរដ្ឋបានលើកឡើង យ៉ាងក្បោះក្បាយពាក់ព័ន្ធទៅនឹងដីបឹងនេះរួចមក លោកអភិបាលស្រុកសួន សាវ៉េត ដែលកន្លងមកបានឈរលើជំហររបស់ប្រជាពលរដ្ឋនោះបានលើកឡើងបញ្ជាក់ទៅក្រុមការងារដែលមកពីសាលាខេត្តថាគួរណាស់តែអនុញ្ញាតិអោយប្រជាពលរដ្ឋធ្វើការស្តារបឹងនេះបន្តទៅទៀតព្រោះរដូវវស្សាកាន់តែខិតជិតមកដល់ហើយ ម្យ៉ាងវិញទៀតលោកក៏បានស្គាល់ យ៉ាងច្បាស់ដែរថាទីតាំងនេះពិតប្រាកដជាបឹងតាអឿមែន។ មានប្រភពអ្នកយល់ច្បាប់មួយបានលើកឡើងថាតំបន់ណាដែលមន្ទីររៀបចំដែនដីនគរូបនីយកម្មបានចងក្រងជាប្រព័ន្ធនិងចេញជាប្លង់រឹងហើយនោះ គឺមិនអាចមានការកែប្រែបានឡើយ ព្រោះគេបាន កំណត់ព្រំដីរួចទៅហើយ ដូច្នេះការដែលយកដីបឹងមកពុសបែងចែកជាដីកម្មសិទ្ធិតាមក្រោយ ហើយភាគី ដែលបំពាននោះប្លង់រឹងក៏គ្មាន ឯការផ្តិតមេដៃទទួលស្គាល់ព្រំដីពីសំណាក់ប្រជាពលរដ្ឋដែលនៅជិតខាងក៏គ្មាន គឺមិនអាចយកជាផ្លូវការបានទេ។ក្នុងនោះលោកអ៊ូ ដារីបានគំរាមប្រជាពលរដ្ឋថាបើដោះស្រាយមិនចេញរឿងនេះនឹងត្រូវបញ្ជូនទៅកាន់តុលាការ តែទោះបីជាយ៉ាងណាក៏ប្រជាពលរដ្ឋនៅតែបន្តការទាមទាបឹងនេះមកទុកជាសម្បត្តិរដ្ឋដដែលទោះបីជាទៅដល់ទីណាក៏ដោយព្រោះពួកគេយល់ថាការទាមទានេះពុំមែនយកមកទុកជាសម្បត្តិរបស់បុគ្គលណាម្នាក់ឡើយ ដោយគ្រាន់តែចង់បានទឹកយកមកប្រើប្រាស់នៅក្នុងសហគមន៍តែប៉ុណ្ណោះ ព្រោះនៅតំបន់នេះគ្មានប្រភពទឹកទាល់តែសោះ។
> ដោយមិនអាចជំនះចិត្តប្រជាពលរដ្ឋដែលនៅក្នុងសហគមន៍បឹងតាអឿបានទើបការជួបគ្នា
> ដើម្បីរកដំណោះស្រាយត្រូវបានប្រកាសរំសាយ ដោយក្រុមការងារសាលាខេត្តនឹងធ្វើការគាស់ហៅ ភាគីម្ខាងទៀតអោយចូលខ្លួនមកសាលាស្រុកជាក្រោយដើម្បីធ្វើការសាកសួរម្តង ក្នុងន័យប្រមូលព័ត៌មាននេះយកទៅជូនលោកអភិបាលខេត្តដើម្បីពិចារណានិងសម្រេចជាក្រោយ៕