កំពង់ធំៈ នៅភូមិអណ្តោតថ្មីខាងកើត មានហេតុការណ៍មួយបានកើតឡើងបណ្តាលអោយបុរសវ័យអាយុ ៥១ឆ្នាំ ស្លាប់ភ្លាមៗដោយសារតែកូនប្រុសបង្កើតកាប់មួយកាំបិតព្រោះតែឪពុកស្តីបន្ទោសបន្តិចបន្តួច ពីបញ្ហារាំធុងបាស់ ជុំវិញករណីកូនបង្កើតកាប់ឪពុកខ្លួនឯងបណ្តាល
អោយស្លាប់នេះបើតាមបងស្រីដែលជាប្រពន្ធបុរសគ្រោះឈ្មោះ អិន និម អាយុ ៥៥ឆ្នាំ ដែលត្រូវជាម្តាយបង្កើតរបស់ជនដៃដល់ បាននិយាយរៀបរាប់ទាំងអួលដើមករប្រាប់អ្នកយកពត៌មានយើងអោយដឹងថា មុនពេលឈានដល់ការឈ្លោះប្រកែកគ្នារវាងឪពុក និងកូន គឺផ្តើមឡើងដោយសារកូនរបស់គាត់បានជិះម៉ូតូ ទៅរាំធុងបាសកាលពីយប់ថ្ងៃទី ១២ ខែឧសភា ឆ្នាំ ២០១៥ លុះដល់ព្រឹកឡើងថ្ងៃទី ១៣ ឪពុកបានឃើញម៉ូតូ បែកស្តុបខាងក្រោយ និង ខាងមុខ ទើបគាត់សួរទៅកាន់កូនដែលជាជនដៃដល់ ហេតុអ្វីបានជាម៉ូតូបែកស្តុបទាំងមុខទាំងក្រោយ ទើបកូនឆ្លើយប្រាប់ឪពុកវិញថា ស្តុបម៉ូតូបែកនោះមិនដឹងអ្នកណាវាយទេព្រោះខ្ញុំកំពុងចូលរាំ ក្រោយមកកូនក៏បានយកម៉ូតូទៅអោយជាងធ្វើនៅក្នុងភូមិបាក់ស្នា តែលុះដល់វេលាម៉ោង ១៧ និង ៣០នាទី ល្ងាចថ្ងៃទី ១៣ ខែឧសភា ឆ្នាំ ២០១៥ ឪពុកឃើញកូនមកដល់ផ្ទះក៏បានស្តីបន្ទោស ទើបមានការតមាត់គ្នារវាងឪពុកនិងកូន ទើបឪពុកបានពោលពាក្យទៅកាន់កូនថា បើឯងនៅធ្វើអីចឹងទៀតយើងនឹងវាយឯង ទើបឪពុកស្ទុះចុះពីលើផ្ទះមករកវាយកូន តែអកុសល ចុះដល់កាំជណ្តើរជាន់ទីបី ក៏ត្រូវកូន ដិរច្ឆាន កាន់ឪពុកមួយកាំបិត ចំឆ្អឹងជំនី ខាងឆ្វេង បណ្តាលអោយប្រកាច់ស្លាប់ដេកស្លាប់ក្នុងថ្លុកឈាម ។
ភ្លាមៗនោះ អ្នកជិតខាងក៏បានទូរស័ព្ទប្តឹងសមត្ថកិច្ចនគរបាលប៉ុស្តិ៍បាក់ស្នា ភ្លាមៗនោះ គេឃើញលោក នុត សុផល នាយប៉ុស្តិ៍បាក់ស្នា ដឹកនាំកម្លាំងទៅកន្លែងកើតហេតុ ហើយលោកក៏បាន ដេញតាមពីក្រោយជនដៃដល់ហើយលោកបានបញ្ជាក់បន្ថែមថា ដោយសារតែភូមិសាស្ត្រនោះមាន ព្រៃច្រើនពេកទើបកម្លាំងរបស់លោកពិបាកក្នុងការរុករក តែប្រហែលជាប៉ុន្មានម៉ោងក្រោយមកកម្លាំងរបស់លោកក៏ប្រទះឃើញជនដៃដល់ជិះម៉ូតូមួយគ្រឿងអត់បើកភ្លើង ទើបលោកបញ្ជាអោយកូនចៅធ្វើការស្ទាក់ជនដៃដល់ឃើញមានកម្លាំងសមត្ថកិច្ចនៅពីមុខក៏ផ្តួលម៉ូតូហើយរត់គេចខ្លួនបាត់តែម្តង លោក នុត សុផល នាយប៉ុស្តិ៍នគរបាលបាក់ស្នា លោកថា ម៉ូតូដែលជនដៃដល់ជិះនោះគឺលួចពីម្ចាស់ចំការដែលធ្វើចំការនៅក្បែរភូមិនេះ យកមកជិះដើម្បីគេចខ្លួន តែត្រូវសមត្ថកិច្ចយើងធើ្វការស្ទាក់ចាប់បានម៉ូតូ ប្រគល់អោយម្ចាស់ដើមវិញ ។
ជុំវិញករណីកូនចិត្តដិរច្ឆានកាប់ឪពុកខ្លួនឯងបណ្តាលអោយស្លាប់នេះ លោកបានបញ្ជាក់ពីអត្តសញ្ញាណ របស់ជនដៃដល់ ឈ្មោះ ម៉េស មិ ភេទប្រុស អាយុ ២១ឆ្នាំ បានកាប់ទៅលើឪពុកបង្កើតខ្លួនឯងឈ្មោះ គី មន ភេទប្រុស អាយុ ៥១ឆ្នាំ រស់នៅភូមិអណ្តោតថ្មីខាងកើត ភូមិបាក់ស្នា ស្រុកបារាយណ៍ ខេត្តកំពង់ធំ ចំនែកម្តាយជនដៃដល់ ឈ្មោះ អិន និម អាយុ ៥៥ឆ្នាំ មានកូនបង្កើតបីនាក់ កូនដិរច្ឆានជាកូនទីពីរ បច្ចុប្បន្នសាកសពបុរសខាងលើត្រូវបានយកទៅធ្វើបុណ្យទៅតាមប្រពៃណី ចំណែកឯកូន ដិរច្ឆាន កាប់ឪពុកសម្លាប់ត្រូវបានសមត្ថកិច្ចកំពុងដុតដៃដុតជើង ធ្វើការតាមប្រមាញ់ដើម្បីចាប់ខ្លួនដើម្បីបន្ទាទោសទៅតាមផ្លូវច្បាប់៕ ប៊ុនរិទ្ធី
