សៀមរាប៖ថ្ងៃទី១៤ខែឧសភាឆ្នាំ២០១៥វេលាម៉ោង៣.៥០នាទីល្ងាចរថយន្តដឹកថ្មក្រុមហ៊ុនចិនម៉ាកពុយសូគ្មានផ្លាកលេខបើកបរមកពីទិសខាងជើងផ្ទុកថ្មពេញបើកក្នុងល្បឿនលឿនវ៉ាគ្នាជ្រុលចង្កូតធ្លាក់ចិញ្ចើមថ្នល់បុកតូបលក់អីវ៉ាន់ប្រជាពលរដ្ឋភូមិខ្វាវ ឃុំខ្វាវ ស្រុកជីក្រែង ខេត្តសៀមរាប។
លោកអនុសេនីយ៏ឯកហុក វ៉ាន់ មេប៉ុស្តិ៍រដ្ឋបាលឃុំខ្វាវបានឲ្យយើងដឹងថា រថយន្តក្រុមហ៊ុនចិនដឹកថ្មរនេះបើកបរមកពីទិសខាងជើងទៅទិសខាងត្បូង បានបើកបរប្រជែងគ្នាយកចង្កូតមិនទាន់ជ្រុលធ្លាក់ចិញ្ចើមថ្នល់ទៅបុកតូបលក់អីវ៉ាន់របស់ប្រជាពលរដ្ឋចំនួន២តូបបណ្តាលឲ្យខូចខាតតូបនឹងសម្ភារះអស់ទាំងស្រុង ម្ចាស់ដែលត្រូវបាន គេស្គាល់ឈ្មោះ គឹម ហ៊ន ភេទស្រីមានទីលំនៅភូមិខ្វាវឃុំខ្វាវ ស្រុកជីក្រែងខេត្តសៀមរាបទី ២. ឈ្មោះ ថុង ណេង ភេទប្រុសមានទីលំនៅភូមិ ឃុំជាមួយគ្នា។
លោកបានបន្តរទៀតថា ការបង្ករគ្រោះថ្នាក់ចរាចរនេះមិនបណ្តាលឲ្យគ្រោះថ្នាក់ដល់អាយុជីវិតអ្នកណាម្នាក់ទេ តែវាជាការធ្វេសប្រហែសរបស់អ្នកបើកបរ ក្នុងការបើកប្រជែងគ្នា ចំណែកឯអ្នកបើកបររថយន្តក្រោយពីកើតហេតុក៏ពន្លត់រថយន្តរួចចុះពីលើរថយន្តរត់ឡើងរថយន្តមួយទៀតបន្តរដំណើរទៅកាន់ការដ្ឋានរបស់គេនៅក្នុងស្រុកជីក្រែងដោយសុវត្ថិភាព។
សូមបញ្ជាក់ផងដែរថា ករណីគ្រោះថ្នាក់ដែលបង្ករឡើង រថយន្តរបស់ក្រុមហ៊ុនដឹកដីនេះ កាលពីដើមខែកន្លងមក ក៏បានបុកម៉ូតូបុរសម្នាក់ បណ្តាលឲ្យស្លាប់ម្នាក់ផងដែរ រហូតមកដល់ពេលនេះគឺជាករណីគ្រោះថ្នាក់ម្តង ទៀតដោយបើករថយន្តចូលទៅ ក្នុងតូបលក់អ៊ីវ៉ាន់ ទាំងកំរោល តែមិនបណ្តាលឲ្យមានមនុស្សគ្រោះថ្នាក់នោះទេ តែសំណាងល្អក្នុងហេតុការណ៍នេះ មិនមានមនុស្សនៅក្នុងរោង និងរោងមួយទៀតមនុស្សបានរត់ចេញទាន់ កុំអីហេតុការណ៍នេះ និងក្លាយជាសោធវិនាសកម្មដ៏រន្ធត់ជាមិនខាន ក្រោយពីកើតហេតុ សមត្ថកិច្ចបាននាំរថយន្តបង្ករយកទៅរក្សាទុកប៉ុស្តិ៍រដ្ឋបាលដើម្បីដោះស្រាយតាមនិតិវិធីនៃច្បាប់។
ប្រជាពលរដ្ឋបានសំណូមពរ ឲ្យសមត្ថកិច្ចជួយធ្វើការណែនាំ រថយន្តរបស់ក្រុមហ៊ុនដឹកថ្ម តាមបណ្តោយផ្លូវលំមួយខ្សែនេះ ដោយសារតែការបើកបររបស់តៃកុងឡាន ពុំមានការប្រុងប្រយ័ត្ន និងមិនគិតពីសុវត្តិភាពរបស់ប្រជាពលរដ្ឋនៅតាមដងផ្លូវ បណ្តាលឲ្យដីហុយមើលគ្នាពុំឃើញ បង្ករឲ្យមានគ្រោះថ្នាក់ជាច្រើនករណី មកហើយ ដោយក្រុមហ៊ុនពុំមានការបាញ់ទឹកនោះទេ ។ដោយ ព្រុំ សុខា