ក្រុងកំពង់ឆ្នាំង៖ យុវជន៣នាក់ បានរបួសធ្ងន់ធ្ងរ ក្នុងករណីគ្រោះថ្នាក់ចរាចរណ៍មួយ ដោយសារអ្នកបើកម៉ូតូមកពីហូបការគេ២នាក់ បានជិះបុកកង់ពីក្រោយពេញទំហឹង ក្នុងទិសដៅស្របគ្នា លើផ្លូវជាតិលេខ៥ ក្នុងភូមិទី៨ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង នៅម៉ោង៨និង៣០នាទីយប់ ថ្ងៃទី១៣ ខែឧសភា ឆ្នាំ២០១៥ ។
សមត្ថកិច្ចនគរបាលចរាចរណ៍ ក្រុងកំពង់ឆ្នាំង បានអោយដឹងថា មុនពេលកើតហេតុ យុវជន២នាក់ មានឈ្មោះ យូ សុខខេង អាយុ២៧ឆ្នាំ ជាអ្នកបើកម៉ូតូម៉ាកហុងដាឌ្រីម ពណ៌ខ្មៅ ពាក់ផ្លាកលេខ កំពង់ឆ្នាំង 1B-3852 ក្នុងល្បឿនលឿន ចេញពីស៊ីការដោយឌុបឈ្មោះ សំ រិទ្ធ អាយុ២៦ឆ្នាំ គេទាំង២នាក់ រស់នៅភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ ។ លុះមកដល់ចំណុចកើតហេតុ ទំនងជាគេបើកជែងយានយន្តណាមួយ ក៏បានជ្រុលចង្កូតទៅបុកកង់មួយគ្រឿង កំពុងជិះដោយយុវជនឈ្មោះ ដុង ឧត្តម អាយុ២៥ឆ្នាំ រស់នៅភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំ ពីក្រោយពេញទំហឹង បណ្តាលអោយពួកគេទាំង៣នាក់ ដួលបោកក្បាលផ្ទប់នឹងផ្លូវជាតិ រងរបួសធ្ងន់ធ្ងរទាំង៣នាក់ ដោយសារអត់បានពាក់មួកសុវត្តិភាព ។
ភ្លាមៗនោះដែរ សមត្ថកិច្ចបានហៅរថយន្តសង្គ្រោះ មកដឹកជនរងគ្រោះទាំង៣នាក់ ទៅកាន់មន្ទីរពេទ្យខេត្តកំពង់ឆ្នាំង ដើម្បីសង្គ្រោះព្យាបាលបន្ទាន់ផងដែរ ។
ក្រោយពេលកើតហេតុ ម៉ូតូនិងកង់ ត្រូវបានសមត្ថកិច្ច ដឹកយកមករក្សាទុក នៅក្នុងអធិការដ្ឋាននគរបាល ក្រុងកំពង់ឆ្នាំង កសាងសំណុំរឿងតាមនិតិវិធី ។ ករណីគ្រោះថ្នាក់ចរាចរណ៍ខាងលើនេះ ត្រូវបានសមត្ថកិច្ចសន្និដ្ឋានថា បណ្តាលមកពីបើកបរក្នុងស្ថានភាពស្រវឹង និងបើកជែងក្នុងស្ថានភាពគ្រោះថ្នាក់ និងមិនបានពាក់មួកសុវត្តិភាព ទើបបង្កអោយមានគ្រោះថ្នាក់ រងរបួសក្បាលធ្ងន់ធ្ងរបែបនេះ ៕