កម្លាំងនគរបាលរបស់មន្ទីរ ប្រឆាំងបទល្មើសគ្រឿងញៀន នៃអគ្គស្នងការនគរបាលជាតិ បានបើកប្រតិបត្តិការឆ្មក់ចុះបង្ក្រាប មេឃ្លោងជួញដូរគ្រឿងញៀនដ៏ធំម្នាក់ នៅចំណុចផ្ទះល្វែងលេខ1Bផ្លូវលូ៥ក្រុមទី១ ភូមិដំណាក់ ធំ៣ សង្កាត់ស្ទឹងមានជ័យ ខណ្ឌមានជ័យ នៅវេលាម៉ោង
ប្រមាណ២១និង០០នាទីយប់ថ្ងៃទី១៤ ខែឧសភា ឆ្នាំ២០១៥ ។
ការបើកប្រតិបត្តិការចុះបង្ក្រាបនេះ គឺធ្វើឡើងដោយមានការដឹកនាំកម្លាំង នឹងបញ្ជារផ្ទាល់ពីសំណាក់ លោកឧត្តមសេនីយ៍ត្រី វ៉ាន់ កុសល នាយករងមន្ទីរប្រឆាំងបទល្មើសគ្រឿងញៀន និងមានការឯកភាព ពីលោក សៀង សុខ ព្រះ រាជអាជ្ញារងអមសាលាដំបូងរាជធានីផងដែរ ។
ស្ត្រីជាមេឃ្លោងគ្រឿងញៀនខាងលើ មានឈ្មោះ ចាន់ សារ៉េត ( ហៅ តយ ) ភេទស្រី អាយុ៥០ឆ្នាំ បច្ចុប្បន្នស្នាក់នៅផ្ទះជួលខាងលើ ស្រុកកំណើតមិនពិតប្រាកដ ។
ឧត្តមសេនីយ៍ វ៉ាន់ កុសល បានអោយដឹងថាមុនឈានដល់ប្រតិបត្តិការចុះបង្ក្រាបស្ត្រីជាមេឃ្លោងគ្រឿងញៀនខាងលើនេះគឺកម្លាំងសមត្ថកិច្ចយើងបានធ្វើការចាប់ខ្លួនជនសង្ស័យជាច្រើននាក់ ដែលត្រូវជាបក្សពួករបស់ស្ត្រីជាមេឃ្លោង។ហើយក្រោយពីមានការសាកសួរនាំយ៉ាងលំអិតលំអន់ ហើយនោះក្រុមជនសង្ស័យជាបក្សពួកបានផ្តល់ចម្លើយពីទីតាំងលាក់ខ្លួនរបស់ស្ត្រីជាមេឃ្លោង។ ទើបនៅវេលាម៉ោង២១និង៣០នាទីយប់ថ្ងៃទី១៤ខែឧសភាឆ្នាំ២០១៥សមត្ថកិច្ចនៃមន្ទីរប្រឆាំងបទល្មើស គ្រឿងញៀនបានបើកប្រតិបត្តិការចុះធ្វើការឡោមព័ទ្ធបង្ក្រាប ទីតាំងខាងលើតែម្តងទៅ។
ជាលិទ្ធផលជាក់ស្តែងជុំវិញប្រតិបត្តិការចុះបង្ក្រាបនេះសមត្ថកិច្ចបានធ្វើការដកហូតបាននូវថ្នាំញៀនប្រភេទក្រាមសថ្លា ( ម៉ាទឹកកក ) ចំនួន១ថង់ធំដែលស្មើរនឹងជាង១គីឡូក្រាម , លុយដុល្លារCopy ជាង២ម៉ឺនដុល្លារ ( ក្នុងនោះក្រដាស២០ដុល្លារចំនួន១ម៉ឺនដុល្លារនិងក្រដាស៥០ចំនួន៩៧០០ដុល្លារ )ជញ្ជីងថ្លឹងគ្រឿងញៀន១គ្រឿង ឧបករណ៍សម្រាប់ជក់១និងធ្វើការឃាត់ខ្លួនស្ត្រីជាមេឃ្លោងគ្រឿងញឿនម្នាក់។
បច្ចុប្បន្នជនសង្ស័យនិងវត្ថុតាងដែលដកហូតបានត្រូវបានសមត្ថកិច្ចបញ្ចូនទៅកាន់មន្ទីរប្រឆាំងបទល្មើសគ្រឿងញឿននៃអគ្គស្នងការនគរបាលជាតិដើម្បីធ្វើការសាកសួរនាំបន្ថែមនិងត្រៀមកសាងសំណុំរឿងបញ្ចូនទៅតុលាការចាត់ការតាមនីតិវិធីនៃច្បាប់។ចំណែកទីតាំងផ្ទះល្វែងខាងលើត្រូវបានសមត្ថកិច្ចបិទទ្វារបណ្តោះអាសន្នរងចាំបើកការស៊ើបអង្គេតបន្តហើយនឹងបើកអោយដំណើរការវិញនៅពេលក្រោយ ៕
