ខេត្តព្រះសីហនុនៅរសៀលថ្ងៃទី១៥ ខែឧសភា ឆ្នាំ២០១៥ កងរាជអាវុធហត្ថខេត្តព្រះសីហនុ បានបញ្ជូនស្រីម៉ាហ្សាចំនួន៣នាក់ ខ្មែរ០២នាក់ និងវៀតណាមម្នាក់ ទៅសាលាដំបូងខេត្តព្រះសីហនុ ពីករណីប្រើអំពើហឹង្សាដោយចេតនានៅលើស្រី្តរងគ្រោះ នៅចំណុចឆ្នេរអូត្រេះស្ថិតនៅក្រុមទី០៨ ភូមិ០៦ សង្កាត់លេខ៤ ក្រុងព្រះសីហនុ។
លោកវរសេនីយត្រី វ៉ា ចាន់ថន នាយការិយាល័យស្រាវជ្រាវបទល្មើសព្រហ្មទណ្ឌនិងជាមន្ត្រីនគរបាលយុត្តិធម៌នៃអង្គភាពកងរាជអាវុធហត្ថខេត្តព្រះសីហនុ បានឪ្យដឹងថា ដោយមានបណ្តឹងរបស់ឈ្មោះ រស់ វុធារ៉ា ភេទស្រី អាយុ៣៥ឆ្នាំ រស់នៅរាជធានីភ្នំពេញអំពីករណីរប្រើអំពើហឹង្សាដោយចេតនា កាលពីថ្ងៃទី១៤ ខែឧសភា ឆ្នាំ២០១៥ កម្លាំងជំនាញចុះទៅដល់កន្លែងកើតហេតុ និងធ្វើការឃាត់ខ្លួនជនសង្ស័យទាំង០៣នាក់ បានជាបន្តបន្ទាប់កាលពីវេលាម៉ោង ១៦ និង៤៥នាទី ។
ជនសង្ស័យទី១មានឈ្មោះ ហ្វាង ធីអៀង ភេទស្រី អាយុ៣៧ឆ្នាំ ជនជាតិវៀតណាម មុខរបម៉ាស្សានៅអាហារដ្ឋានហ្វីនកូ មានស្រុកកំណើតប្រទេសវៀតណាម ។ទី២ សុខ ស្រីមុំ ភេទស្រី អាយុ ២០ឆ្នាំ ជនជាតិខ្មែរ មុខរបរម៉ាស្សានៅអាហាដ្ឋានហ្វីនកូ ស្រុកកំណើត ឃុំត្រពាំងល្ពៅ ស្រុកទឹកឈូរ ខេត្តកំពត ទី៣ សួន សៀកថា ហៅ ម៉ាយ ភេទស្រីអាយុ ៣៥ឆ្នាំ ជនជាតិខ្មែរ មុខរបរម៉ាស្សា ស្រុកកំណើតភូមិ៣ សង្កាត់លេខ៤ ក្រុងព្រះសីហនុ។ បានធ្វើសកម្មភាពវាយទៅលើជនរងគ្រោះកាលពីវេលាម៉ោង១៦ និង៤៥នាទីថ្ងៃទី១៤ ខែ ឧសភា ឆ្នាំ២០១៥ នៅចំណុចឆ្នេរអូត្រេះបណ្តាលឪ្យរងរបួសដាច់រលាត់ក្រោមបំពង់ក ផ្នែកខាងមុខជាច្រើនកន្លែង និងដាច់រលាត់ត្រចៀកខាងឆ្វេង និងមានស្នាមជាំនៅលើក្បាលជង្គង់ខាងស្តាំ និងបណ្តាលឪ្យបាត់ខ្សែកលោហធាតុពណ៌ទង់ដែងចំនួន០១ខ្សែ និងក្រវិលម៉ាកប៉ែកមានដាំត្បូងពេជ្រចំនួន០១ចំហៀង ។
លោកវរសេនីយត្រី វ៉ា ចាន់ថន បានឪ្យដឹងថា តាមការសាកសួរ និងតាមបណ្តឹងជនរងគ្រោះ សមត្ថកិច្ចអាចសន្និដ្ឋានថា ជនសង្ស័យទាំង០៣នាក់ ពិតជាសមគំនិតគ្នាប្រើអំពើហឹង្សាដោយចេតនា ទៅលើជនរងគ្រោះពិតប្រកដមែន ព្រមទាំងក៌សាងសំណុំរឿងបញ្ជូនជនសង្ស័យទាំង០៣នាក់ ទៅសាលាដំបូងខេត្តព្រះសីហនុ ដើម្បីចាត់វិធានការទៅតាមផ្លូវច្បាប់ ៕