ភ្នំពេញ ៖ បុរសម្នាក់ស្រវឹងស្រាបានបើករថយន្តកែច្នៃ ក្នុងល្បឿនលឿន មិនបានមើលមុខ ចាប់ហ្វ្រាំងមិនទាន់ក៏ជ្រុលទៅបុករថយន្តសេរីទំនើប ម៉ាកMAZDA ពីក្រោយពេញទំហឹង តែសំណាងល្អ រងការខូចខាតតែបន្តិចបន្ទួច ប៉ុណ្ណោះ ចំណែករថយន្តបង្ក បានរងការខូចខាតផ្នែកខាងមុខយ៉ាងដំណំ ម្ចាស់រថយន្តMAZDA មិនចង់មានរឿង វែងឆ្ងាយ បានបើករថយន្តចេញទៅបាត់ ។ ហេតុការណ៍នេះ បានកើតឡើងកាលពីវេលាម៉ោង៩នឹង១៥នាទីយប់ ថ្ងៃទី១៦ ខែឧសភា ឆ្នាំ២០១៥ នៅចំណុចមុខខារ៉ាអូខេ LASVEGAS តាមបណ្តោយផ្លូវលេខ២៧១ ស្ថិតក្នុងសង្កាត់ផ្សារដើមថ្កូវ ខណ្ឌចំការមន ។
ប្រភពពត៌មានពីកន្លែងកើតហេតុ បានឱ្យដឹងថា នៅមុនពេលកើតហេតុ គេបានឃើញរថយន្តសេរីទំនើប ម៉ាកMAZDA ពណ៍ស ពាក់ស្លាកលេខភ្នំពេញ បើកបរតាមបណ្តោយផ្លូវលេខ២៧១ ទិសដៅពីលិចទៅកើត លុះមកដល់ចំណុចកើតហេតុមុខខារ៉ាអូខេ LASVEGAS ស្រាប់តែមានរថយន្តកែច្នៃពណ៍ក្រហម ពាក់ស្លាកលេខ បើកបរដោយបុរសម្នាក់ទំនងជាស្រវឹងស្រា បើកក្នុងល្បឿនលឿនទិសដៅស្របគ្នា ហើយមិនបានមើលមុខផងនោះ ចាប់ហ្វ្រាំងមិនទាន់ ក៏ជ្រុលបុករថយន្តMAZDA ពីក្រោយពេញទំហឹង ប៉ុន្តែខូចខាតបន្តិចបន្តួចតែប៉ុណ្ណោះ ចំណែកឯរថយន្តបង្ករងការខូចខាតផ្នែកខាងមុខយ៉ាងដំណំ ។
ប្រភពបន្តថា ដោយសារតែរថយន្ត MAZDA រងការខូចខាតតិចតួចនោះ ម្យ៉ាងវិញទៀតអ្នកបើករថយន្តបង្កបានធ្វើការសុំទោសផងនោះ ម្ចាស់រថយន្តMAZDA មិនចង់មានរឿងវែងឆ្ងាយបានបើករថយន្តចេញទៅបាត់ ៕
