សៀមរាប នាព្រឹកថ្ងៃទី០១ មិថុនា ឆ្នាំ២០១៥នេះ នៅខេត្តសៀមរាប មានរៀបចំពិធីអបអរសាទរខួបលើកទី៦៦ ទិវាកុមារអន្តរជាតិ ១ មិថុនា និង ខួបលើកទី១៣ ទិវាពិភពលោកប្រឆាំងពលកម្មកុមារ ១២មិថុនា ក្រោមប្រធានបទ យើងទាំងអស់គ្នា ដើម្បីកុមារ)ក្រោមអធិបតីភាពរបស់លោកឃឹមប៊ុនសុង អភិបាលនៃគណៈអភិបាលខេត្តសៀមរាប និង លោកជំទាវ ដោយមានវត្តមានចូលរួមរបស់លោក ឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប និងលោក អ៊ឹង ហឿន សមាជិកក្រុមប្រឹក្សាខេត្ត លោកឧកញ៉ា សុខ ចំរើន សមាជិកគណៈកម្មាធិការកាក បាទក្រហមកម្ពុជា និង ជាប្រធានក្រុមហ៊ុនទូរទស្សន៍ខ្សែកាប និង លោកជំទាវ ព្រមទាំងមានការអញ្ជើញចូលរួមពីថ្នាក់ដឹកនាំមន្ទីរ អង្គភាព និង មន្ត្រីរាជការជុំវិញខេត្ត និង ក្មួយៗកុមារកំព្រា និងទីទ័លក្រ មកពីបណ្តាអង្គការចំនួន៣០ ក្នុង ខេត្តដែលបានចូលរួមចំនួន ១ពាន់៥០០នាក់ ។ ពិធីនេះបានរៀបចំឡើងដោយក្រុមហ៊ុនស្ថានីយ៍ទូរទស្សន៍ខ្សែកាបអង្គរ នៅភោជនីយដ្ឋានអាប៉ូឡូផ្លាហ្សាខេត្តសៀមរាប ។
ក្នុងកិច្ចស្វាគមន៍របស់លោក ឧកញ៉ា សុខ ចំរើន បានគូសបញ្ជាក់ថា ថ្ងៃនេះជាព្រឹត្តិការណ៍យ៉ាងសម្ខាន់ សម្រាប់ក្មួយៗជាកុមារកំព្រា កុមារងាយរងគ្រោះ និងទីទ័លក្រក្នុងខេត្តសៀមរាប ព្រមទាំងមានការចូលរួមពីថ្នាក់ដឹក នាំខេត្ត បងប្អូនជាពាណិជ្ជករអាជ្ញាធរមូលដ្ឋានលោកគ្រូអ្នកគ្រូនិងបណ្តាអង្គការសង្គមស៊ីវិល ក្នុងការសបញ្ជាក់ឲ្យដឹង ថា ស្ថានភាពកុមារ ត្រូវមានការយកចិត្តទុកដាក់ខ្ពស់ ពីថ្នាក់ដឹកនាំគ្រប់លំដាប់ថ្នាក់ ប្រជាពលរដ្ឋ សង្គមស៊ីវិល ទៅលើ សិទ្ធិសេរីភាព និង គ្រប់សកម្មភាព ក្នុងគោលបំណងគាំពារ ថែរក្សា ជម្រុញការអភិវឌ្ឍន៍ ដើម្បីឲ្យក្លាយជាយុវជនល្អ ពលរដ្ឋល្អរបស់សង្គមជាតិ ទៅពេលអនាគត ។
បន្ទាប់ពីចំណាប់អារម្មណ៍របស់តំណាងអង្គការទាំង៣០ និង ការធ្វើចំណាប់អារម្មណ៍របស់ ឯកឧត្តមឧកញ៉ា សៀង ណាំ រួចមក ប្រសាសន៍សំណេះសំណាលនោះដែរ លោក ឃឹម ប៊ុនសុង បានគូសបញ្ជាក់ថា ជារៀងរាល់ឆ្នាំនៅលើសកលលោក តែងតែប្រារព្ធទិវាកុមារអន្តរជាតិ ១មិថុនា និង ទិវាពិភពលោកប្រឆាំងពលកម្មកុមារ ដើម្បីលើកកម្ពស់ដល់ការអនុវត្ត សិទ្ធិជាមូលដ្ឋានរបស់កុមារស្របតាមកម្មវិធីនយោបាយរបស់រាជរដ្ឋាភិបាល និង អនុសញ្ញាលេខ១៨២ អង្គការសហប្រជាជាតិ ស្ដីពីការហាមប្រាម និង សកម្ម ភាពបន្ទាន់សម្រាប់ការលុប
បំបាត់ទម្រង់ធ្ងន់ធ្ងរបំផុតនៃ ពលកម្មកុមារ និងបទដ្ឋានជាតិ អន្តជាតិ ស្ដីពីសិទ្ធិកុមារផ្សេងៗទៀត ។ ម្យ៉ាងទៀតកុមារគឺជាសរសស្តម្ភដ៏រឹងមាំ ជាអ្នកបន្តវេនប្រទេសជាតិ ហើយកុមារ គឺជាទំពាំងស្នងឬស្សី ដូច្នេះចាំបាច់ត្រូវយកចិត្តទុកដាក់ថែទាំគាំទ្រពីក្រុមគ្រួសារសហគមន៍ និង សង្គមជាតិ ។ ក្នុងនោះដែរឯ.ឧ ឃឹម ប៊ុនសុង ក៏បានលើកនូវពីជីវប្រវត្តិ ទិវាកុមារអន្តរជាតិ១មិថុនា ជាព្រឹត្តិការណ៍នៅឆ្នាំ១៩៤២ ក្នុងសោកនាដកម្មដែលសាបព្រោះដោយពួកហ្វាស៊ីសហ៊ីត្លែរ នាថ្ងៃទី១០ ខែមិថុនា ប្រជាជននៅភូមិលីឌីស៊ែរចំនួន១៩២នាក់ ត្រូវគេសម្លាប់នៅក្នុងសួន កសិដ្ឋានអ៊ូរ៉ាក់កុមារចំនួន១០០នាក់ក៏ត្រូវគេសម្លាប់ ម្ដាយរបស់ប្អូនៗដែលនៅសេសសល់ត្រូវគេបញ្ជូនទៅជំរុំប្រមូលផ្ដុំ ភូមិដ្ឋានត្រូវគេឆក់ប្លន់ និង ដុតបំផ្លាញ ។ ជាក់ស្តែងកុមារកម្ពុជា ស្ថិតនៅក្នុងរបបកម្ពុជាប្រជាធិបតេយ្យ ប្រល័យពូជ សាសន៍ ប៉ុល ពត ត្រូវទទួលរងនូវទុក្ខទារណកម្ម ដោយបង្ខំធ្វើការជាទម្ងន់ហួសកម្លាំង បិទសិទ្ធសិរីភាពក្នុងការសិក្សា រៀនសូត្រ នឹងទទួលរងការកាប់សម្លាប់ទៀតផង ។ លោក ឃឹម ប៊ុនសុង ក៏បានផ្ដាំផ្ញើចំពោះក្មួយៗយុវជន និងកុមារត្រូវពង្រឹងស្មារតី ឆន្ទៈខិតខំរៀនសូត្រក្រេបយកចំណេះដឹង ហាត់ពត់លត់ដំខ្លួនទៅតាមតួនាទី និង ភារកិច្ចរបស់ខ្លួន រួមចំណែកក្នុងការអភិវឌ្ឍសង្គមជាតិ ឲ្យរីកចម្រើន គប្បីត្រងត្រាប់ស្ដាប់ដំបូន្មានឪពុកម្ដាយ លោកគ្រូអ្នកគ្រូ ធ្វើជាគំរូល្អ និង មានសីលធម៌រស់នៅល្អ ។ ដោយឡែកចំពោះសង្គមកុមារ និងយុវជនត្រូវជួយថែរក្សាទ្រព្យសម្បត្តិសាធារណៈគោរពច្បាប់រដ្ឋ ថែរក្សាប្រពៃណីទំនៀមទម្លាប់និងវប្បធម៌បរិស្ថាន ដើម្បីធ្វើឲ្យក្លាយខ្លួនជាកូនល្អ សិស្សល្អ មិត្តល្អនិងពលរដ្ឋល្អ។ ក្នុងនោះដែរលោក ក៏បានថ្លែងអំណរគុណ ដល់បងប្អូនសប្បុរសជន ដែលបានឧបត្ថម្ភគាំទ្រ ក្នុងការចូលរួម មូលនិធិ ទ្រទ្រង់ដល់កុមារកំព្រា កុមារងាយរងគ្រោះ និង កុមារទីទ័លក្រ ដែលកំពុងរស់នៅតាមអង្គការនានាក្នុងខេត្ត ដែលជួបការខ្វះខាត ។
ក្នុងនោះដែរលោក ឃឹម ប៊ុនសុង និងលោកជំទាវ បានឧបត្ថម្ភនូវគ្រឿងឧបភោគបរិភោគ សម្ភារៈសិក្សា និង កីឡាសម្ភារៈអនាម័យមាត់ឆ្មេញនិងអាវយឺតទោចក្រយានជូនដល់ក្មួយៗកុមារកំព្រាទាំង ៣០អង្គការដែលបានចូលរួម ក្នុងនោះអភិបាលខេត្តបានឧបត្ថម្ភនូវថវិកា ចំនួន៤លានរៀល រួមទាំងឯកឧត្តម លោកឧកញ៉ា លោកជំទាវ និង អស់លោក លោកស្រី សរុបចំនួន ៦លាន ១សែន៨ម៉ឺនរៀល ប្រាក់ដុល្លា ៨៧០ដុល្លា ដើម្បីប្រើប្រាស់ក្នុងកម្មវិធីផងដែរ ។
ក្នុងឱកាសជួបជុំនៃទិវាកុមារអន្តរជាតិ១មិថុនានេះដែរ ក៏មានរៀបចំនូវអាហារថ្ងៃត្រង់ជូនដល់ក្មួយៗដែលបានចូលរួមពិធីបានឆ្ងាញ់ពិសារព្រមទាំងមានការច្រៀងរាំ សប្បាយជាមិត្តភាព នៃមហាគ្រួសារខ្មែរតែមួយទៀត ផង ៕ ដោយគឿនវ៉េត