សៀមរាប លោកស្រី សែរី នួន ដុនខេន-ចន ប្រធានការិយាល័យអប់រំ និង សុខភាពសាធារណៈ របស់ទីភ្នាក់ងារសហរដ្ឋអាមេរិកសម្រាប់អភិវឌ្ឍអន្តរជាតិ បានបង្ហាញថា ៖ ក្នុងទស្សវត្សកន្លងទៅ ផ្នែកសុខាភិបាលនៅប្រទេសកម្ពុជា មានការរីកចម្រើនគួរកត់សម្គាល់ ! អត្រាស្លាប់របស់មាតានិងកុមារ មានការថយចុះយ៉ាងច្រើន ! គោលដៅអភិវឌ្ឍន៍សហ្សវត្សរ៍ជាច្រើន ត្រូវបានសម្រេចមុនផែនការកំណត់ ! ក៏ប៉ុន្តែ បើតាមការបង្ហាញទិន្នន័យថ្មីៗនេះ មានកុមារកម្ពុជាម្នាក់ ក្នុងចំណោមបីនាក់ កំពុងប្រឈមទៅនឹងបញ្ហាកង្វះអាហារូបត្ថម្ភ ។ការលើកឡើងយ៉ាងដូច្នេះ របស់លោកស្រី សែរី នួន ដុនខេន-ចន បានធ្វើឡើងនៅក្នុងពិធីបើកសម្ពោធការិយាល័យ និង ដាក់ឲ្យដំណើរការ កម្មវិធីអាហាររូបត្ថម្ភនិងអនាម័យ(NOURISH Project)នៅខេត្តសៀមរាប ដែលរៀបចំឡើងដោយ អង្គការទ្រទ្រង់កុមារ និងមានជំនួយឧបត្ថម្ភពីទីភ្នាក់ងារសហរដ្ឋអាមេរិក សម្រាប់អភិវឌ្ឍអន្តរជាតិ។ ពិធីនេះបានដំណើរការ នាព្រឹកថ្ងៃទី០៣ ខែមិថុនា ឆ្នាំ២០១៥ ក្រោមការចូលរួមពីសំណាក់ មន្ត្រីថ្នាក់មូលដ្ឋានស្រុកឃុំគោលដៅ អស់លោកប្រធានមន្ទីរពាក់ព័ន្ធ និង អង្គការជាដៃគូសហការ ដែលជាមួយគ្នានោះ គឺមានវត្តមានរបស់ ឯកឧត្តម ម៉ៅ វុឌ្ឍី អភិបាលរងខេត្តសៀមរាប ជាអធិបតី និងជាសក្ខីភាពនៃការស្វាគមន៍ គាំទ្រកម្មវិធី ដ៏មានអត្ថប្រយោជន៍នេះ ។
លោកស្រី ហូស្នា នាយិកាប្រចាំប្រទេសកម្ពុជានៃអង្គការទ្រង់កុមារ បានលើកឡើងថា ៖ ភាពក្រេះក្រិន ដែលបណ្តាលមកពីកង្វះអាហាររូបត្ថម្ភ បានបន្សល់ទុកនូវការគម្រាមកំហែងដ៏ធំមួយសម្រាប់ប្រទេសកម្ពុជា ហើយយើងត្រូវធ្វើការរួមគ្នា និង រៀនសូត្រជាមួយគ្នា ដើម្បីធ្វើឲ្យប្រសើរឡើង នូវស្ថានភាពអាហារូបត្ថម្ភរបស់ស្ត្រី និង កុមារ ។ លោកស្រីបានបញ្ជាក់ថា កម្មវិធីអាហារូបត្ថម្ភនិងអនាម័យ គឺជាការចាប់ផ្តើមអនុវត្ត ដោយក្រុមការងាររបស់អង្គការទ្រទ្រង់កុមារ ជាមួយអង្គការភាពជាដៃគូផ្សេងៗទៀត ។ គោលដៅជារួម កម្មវិធីអាហារូបត្ថម្ភនិងអនាម័យមានរយៈពេល៥ឆ្នាំ និងត្រូវអនុវត្តទៅលើ ១៣៨ភូមិ ស្មើនឹង ១៤ឃុំ នៅក្នុងបណ្តាខេត្តចំនួន៣ ( សៀមរាប បាត់ដំបង និងខេត្តពោធិសាត់ ) ក្នុងនេះសម្រាប់ខេត្តសៀមរាប មានមូលដ្ឋានគ្របដណ្តប់ចំនួន ៧ឃុំ នៅក្នុងស្រុកពួក និងស្រុកអង្គរជុំ ។
លោកស្រី សែរី នួន ដុនខេន-ចន មានប្រសាសន៍ថា ៖ ដើម្បីឲ្យប្រទេសកម្ពុជានៅតែបន្តការរីកចម្រើន ចាំបាច់ត្រូវតែធើ្វយ៉ាងណាឲ្យកុមារ រីកលូតលាស់ និងប្រកបដោយសុខភាពល្អ ។ លោកស្រី បានសង្កត់ធ្ងន់ថា បញ្ហាកង្វះអាហារូបត្ថម្ភ ត្រូវបានគេប៉ាន់ប្រមាណថា ជាបន្ទុកដល់ការចំណាយសេដ្ឋកិច្ចកម្ពុជាទាំងមូលប្រមាណ ពី ២៥០ ទៅដល់ ៤០០លានដុល្លា ជារៀងរាល់ឆ្នាំ ។ ជាមួយបញ្ហានេះ លោកស្រីបានលើកឡើងថា រាជរដ្ឋាភិបាលកម្ពុជា បានទទួលស្គាល់អំពីបញ្ហាកង្វះអាហារូបត្ថម្ភនេះ ដែលត្រូវបានក្លាយជាបន្ទុកដ៏សម្បើមចំពោះក្រុមគ្រួសារ សហគមន៍ និងសេដ្ឋកិច្ចជាតិ ដូច្នេះហើយទើបរាជរដ្ឋាភិបាល បានបង្កើតឡើងនូវយុទ្ធសាស្ត្រជាតិ សម្រាប់សន្តិសុខស្បៀង និងអាហារូបត្ថម្ភ ដែលដឹកនាំអនុវត្តដោយ ក្រុមប្រឹក្សាស្តារវិស័យអភិវឌ្ឍកសិកម្មនិងជនបទ ! ហើយរាជរដ្ឋាភិបាលកម្ពុជា ក៏បានដាក់ចេញ នូវផែនទីបង្ហាញផ្លូវដំបូងបំផុត ដើម្បីពន្លឿនផ្នែកអាហារូបត្ថម្ភ(២០១៤-២០២០ ) សម្រាប់វិស័យសុខាភិបាល លោកស្រីបានបន្តថា ទីភ្នាក់ងារសហរដ្ឋអាមេរិកសម្រាប់អភិវឌ្ឍអន្តរជាតិ បានបង្ហាញនូវការគាំទ្ររបស់ខ្លួន ចំពោះការខិតខំប្រឹងប្រែងរបស់រាជរដ្ឋាភិបាលកម្ពុជា ហើយកម្មវិធីអាហារូបត្ថម្ភ និង អនាម័យគឺជាសក្ខីភាព នៃគាំទ្រយុទ្ធសាស្ត្រជាតិ របស់រាជរដ្ឋាភិបាលកម្ពុជា ក្នុងការលើកកម្ពស់អាហារូបត្ថម្ភ ដែលជាមូលដ្ឋានគ្រឹះ ធ្វើឲ្យបានសម្រេច នូវបេសកកម្មដ៏ធំធេង នៃការបញ្ចប់ភាពក្រីក្រ ។
លោកម៉ៅ វុឌ្ឍី អភិបាលរងខេត្តសៀមរាប មានប្រសាសន៍ថា ៖ ក្រោមការដឹកនាំរបស់សម្តេចតេជោ ហ៊ុន សែន ជានាយករដ្ឋមន្ត្រី ដែលមានចក្ខុវិស័យដ៏ច្បាស់លាស់ ! ព្រះរាជាណាចក្រកម្ពុជា នឹងទទួលបាននូវជោគជ័យថ្មីៗបន្ថែមទៀត ! ប្រជាពលរដ្ឋគ្រប់រូប នឹងមានទឹកស្អាតប្រើប្រាស់គ្រប់គ្រាន់នៅក្នុងឆ្នាំ២០២៥ និងកាត់បន្ថយបាន អត្រាខ្វះអាហារូបត្ថម្ភសម្រាប់មាតានិងកុមារ នាពេលអនាគត ៕ ដោយគឿនវ៉េត