ភ្នំពេញ ៖ ក្រុមក្មេងស្ទាវ២ក្រុម បានដេញវាយគ្នាបង្កឲ្យមានការភ្ញាក់ផ្អើល ដល់ប្រជាពលរដ្ឋ និងសមត្តកិច្ចចុះមកអន្តរាគមន៍ ខណៈដែលពួកគេចេញពីក្លឹប កាលពីវេលាម៉ោង២២និង២០នាទីយប់ ថ្ងៃទី៧ ខែមិថុនា ឆ្នាំ២០១៥ នៅចំណុចមុខវិទ្យាល័យ ទួលស្វាយព្រៃ តាមបណ្តោយផ្លូវលេខ១៩៩ ស្ថិតក្នុងសង្កាត់ទួលស្វាយព្រៃទី២ ខណ្ឌចំការមន។
តាមសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញយុវជន២ក្រុម ដោយម្ខាងជិះម៉ូតូ៤គ្រឿង មានគ្នា៦ទៅ៧មាក់ និងម្ខាងទៀតជិះម៉ូតូ៣គ្រឿង មានគ្នា៤ទៅ៥នាក់ បានជិះម៉ូតូដេញវាយគ្នា តាមដងផ្លូវសាធារណៈយ៉ាងអាណាធិបតិយ្យ តាមបណ្តោយផ្លូវលេខ១៩៩ ក្នុងទិសដៅពីកើតទៅលិច ខណៈមកដល់ចំណុចកើតហេតុ ស្រាប់តែភាគីខាងម៉ូតូ៣គ្រឿង វាយភាគី៤គ្រឿង បណ្តាលឲ្យដួលទៅនិងថ្មល់ អូសជាង១០ម៉ែត្រ និងចូលក្រោមរថយន្តកុងតឺន័រ ដែលចតស្ងាមបណ្តាលឲ្យរងរបួសផងដែរ ។
សាក្សីដដែលបានបន្តថា បន្ទាប់មកក្រុមភាគីខាងម៉ូតូ៤គ្រឿង បានជិះគេចខ្លួនបានស្រមោលតែម្តង ។
តាមការៀបរាប់ពីជនរងគ្រោះ បានឲ្យដឹងថា មុនពេលកើតហេតុ ពូកគេជិះម៉ូតូ៤គ្រឿង មានគ្នានប្រមាណ៧ទៅ៨នាក់ ដែលទើបនាំគ្នាចេញពីក្លឹបហាយ ដោយស្រវឹងរៀងខ្លួន ទើបនាំគ្នាត្រលប់មកផ្ទះវិញ ពេលជិះម៉ូតូសុខៗ ស្រាប់តែមានម៉ូតូ៤គ្រឿង ប្រដាប់ដោយខ្សែរក្រវ៉ាត់ និងកាំភ្លើងមួយដើម បាននាំគ្នាដេញវាយពួកតែម្តង។
ក្រោយពេលកើតហេតុ សមត្ថកិច្ចបានចុះមកដល់ចំណុចកើតហេតុ តែដោយសាតែក្រុមបង្ក នាំគ្នាជិះម៉ូតូគេចខ្លួនបាត់អស់ ហើយក្រុមជនរងគ្រោះ ក៏មិនដាក់ពាក្យបណ្តឹង ទើបសមត្ថកិច្ចឲ្យជនរងគ្រោះ ត្រូលប់ទៅផ្ទះវិញ ៕
