ភ្នំពេញ៖ បុរសម្នាក់ជិះម៉ូតូស្កូបពីមួយគ្រឿង ឌុបនារីម្នាក់ចេញពីធ្វើការ ត្រូវបានជនសង្ស័យមានគ្នា៤នាក់ ជិះម៉ូតូសេ១២៥ពីរគ្រឿង ប្រដាប់ដោយកាំភ្លើងខ្លី១ដើម បានបាញចំនួន១គ្រាប់ ប្លន់យកម៉ូតូតែមិនបានសម្រេច កាលពីវេលាម៉ោង២និង២០នាទីរំលងអាធ្រាត ឈានចូលថ្ងៃទី៦ ខែមិថុនា ឆ្នាំ២០១៥ នៅតាមបណ្តោយផ្លូវលេខ៤៩ កែងផ្លូវលេខ១៣០ ស្តិតក្នុងសង្កាត់ផ្សារថ្មី ទី៣ ខណ្ឌដូនពេញ ។
ជនរងគ្រោះឈ្មោះ ឆាយ សុផល ភេទប្រុស អាយុ២២ឆ្នាំ ចំណែកនារីដែលជិះជាមួយឈ្មោះ វី អាយុ២៦ឆ្នាំ មុខរបជាជាងអ៊ុតសក់ ជិះម៉ូតូម៉ាកស្កូបពី ពណ៌ក្រហម ពាក់ស្លាកលេខ ភ្នំពេញ 1CX-5115 សេរីឆ្នាំ២០១៥ ។
តាមសំដីជនរងគ្រោះ បានរៀបរាប់ថា មុនពេលកើតហេតុ ពួកគេបាននាំគ្នាមកពីហូបអី នៅមុខណាកា ហើយក្នុងបំណងជូនមិត្តស្រីទៅផ្ទះ ដោយធ្វើដំណើរតាមបណ្តោយផ្លូវលេខ១៣០ ក្នុងទិសដៅពីកើតទៅលិច ខណៈមកដល់ចំណុចកើតហេតុ ស្រាប់តែលេចមុខជនសង្ស័យ៤នាក់ ជិះម៉ូតូ២គ្រឿង ប្រដាប់ដោយកាំភ្លើងខ្លី មិនស្គាល់ម៉ាកមួយដើមបានជិះម៉ូតូមកក្បែរហើយដក់កាំភ្លើងភ្ជុង ដោយឃើញដូចនោះ រួបគេបានបន្ថែមល្បឿនទៅមុខទៀត ភ្លាមនោះស្រាប់តែជនសង្ស័យបាញ់ចំនួនមួយគ្រាប់តែមិនត្រូវ ធ្វើឲ្យរួបគេភ័យក៏បានជិះទៅបុកនិងបង្កោលភ្លើងរងរបួសធ្ងន់ ចំណែកក្រុមជនសង្ស័យ ដោយឃើញដូចនោះ ក៏បាននាំគ្នាជិះម៉ូតូគេចខ្លួនបាត់ស្រមោលតែម្តង ដោយមិនបានយកម៉ូតូជនរងគ្រោះទៅនោះទេ ។
ក្រោយពេលកើតហេតុ ជនរងគ្រោះបានមកដាក់ពាក្យបណ្តឹង នៅទីស្នាក់ការនគរបាលប៉ុស្តិ៍ រដ្ឋបាលផ្សារថ្មីទី៣ដើម្បីកំណត់មុខសញ្ញា ងាយស្រួលតាមចាប់ជនសង្ស័យ យកមកដាក់ទោសតាមច្បាប់ ៕