ភ្នំពេញ៖ យុវជន២ក្រុម មានគ្នាប្រមាណជិត១០នាក់ ផឹកស៊ីនៅក្នុងហាងយីហោ ការ៉េបី (៣៣៣៣) អង្គុយតុជាប់គ្នា លុះដល់ពេលស្រវឹងបានទាក់ពាក្យសម្តី រហូតឈានដល់ភាគីម្ខាងដែលអាងខ្លួនថា ជាអង្គរក្សអ្នកធំ ស្រែកឡូរឡា និងដកកាំភ្លើងខ្លី ភ្ជង់ក្បាលគូបដិបក្ស បង្កឱ្យមានការភ្ញាក់ផ្អើល ដល់ភ្ញៀវនៅក្នុងហាង កាលពីវេលាម៉ោង៩នឹង៤០នាទីយប់ថ្ងៃទី៥ ខែមិថុនា ឆ្នាំ២០១៥ ស្ថិតក្នុងសង្កាត់មនោរម្យ ខណ្ឌ៧មករា ប៉ុន្តែសមត្ថកិច្ចបានត្រឹមទៅសួរនាំម្ចាស់ហាងប៉ុណ្ណោះ ដោយភាគីដកកាំភ្លើង បាននាំគ្នាជិះចេញបាត់អស់ ។
យោងប្រភពពត៌មានពីសាក្សីដែលជាភ្ញៀវ ចូលទៅពិសារអាហារក្នុងហាងការ៉េបី (៣៣៣៣) ខាងលើ បានឱ្យដឹងថា នៅមុនពេលកើតហេតុ គេបានឃើញយុវជន២ក្រុម មានគ្នាប្រមាណជិត១០នាក់ បានចូលមកផឹកស៊ីនៅក្នុងហាងនេះ ដោយអង្គុយតុជាប់គ្នា លុះផឹកស៊ីយូរមានស្ថានភាពស្រវឹងស្រានោះ ក៏បានទាស់ទែងពាក្យសម្តីជាមួយគ្នា រហូតដល់ភាគីម្ខាង បានដកកាំភ្លើងខ្លីមិនចាំម៉ាកមួយដើម ភ្ជង់ទៅគូបដិបក្សរបស់ខ្លួន និងបានស្រែកឡូឡារថា ខ្លួនគឺជាអង្គរក្សរបស់អ្នកធំថែមទៀតផង បង្កឱ្យមានការភ្ញាក់ផ្អើលភ្ញៀវនៅក្នុងហាង ។
ប្រភពបន្តថា ដោយមានសភាពតឹងតែងដូច្នេះ ម្ចាស់ហាងបានចូលមកឃាត់ និងទំនាក់ទំនងទៅសមត្ថកិច្ចមូលដ្ឋាន ឱ្យចុះមកអន្តរាគន៍ ដើម្បីឱ្យមានភាពប្រសើរឡើង ប៉ុន្តែប៉ុស្តិ៍នគរបាលរដ្ឋបាលមនោរម្យ នៅជិតកន្លែងកើតហេតុសោះ មានការយឹតយ៉ាវបន្តិច បានត្រឹមតែដើរទៅមក នៅមុខហាងតែប៉ុណ្ណោះ ព្រោះពួកគេនាំគ្នាជិះម៉ូតូចេញបាត់អស់ទៅហើយ តែក៏មិនមានការប្រើអំពើហិង្សាកើតឡើងដែរ ។
ប្រជាពលរដ្ឋដែលរស់នៅជិតកន្លែងកើតហេតុ បាននាំគ្នារអ៊ូរទាំថា នៅក្នុងហាងផឹកស៊ីយីហោការ៉េបី (៣៣៣៣) ខាងលើនេះ តែងតែកើតមានការឈ្លោះគ្នាជាញឹកញាប់ ដោយម្នាក់ៗអាងខ្លួនថា ជាអ្នកនេះ អ្នកនោះ ជាក់ស្តែងលើកនេះ មានការឈ្លោះប្រកែកគ្នា រហូតមានការដកកាំភ្លើងភ្ជង់ក្បាលគ្នាថែមទៀតផង ប៉ុន្តែមិនដែល ឃើញមានសមត្ថកិច្ចមូលដ្ឋានណា មកអន្តរាគមន៍ទាន់ពេលវេលានោះទេ បើទោះបីជាបុស្តិ៍នៅជិតទីនោះក៏ដោយ ។
ហើយប្រជាពលរដ្ឋដែលរស់នៅជិតទីនោះ មានការភ័យខ្លាចយ៉ាងខ្លាំង លើកនេះមិនទាន់មានរឿងធំ ចុះបើលើកក្រោយមានហេតុការណ៍ចៃដនណាមួយកើតឡើងនោះ តើសុខសុវត្ថិភាពរបស់ពួកគាត់ ទៅជាយ៉ាងណា ? និងបានសំពូមពរដល់សមត្ថកិច្ចល្បាតនៅក្នុងមូលដ្ឋាន ចុះល្បាតឱ្យបានញឹកញាប់ ដើម្បីស្របតាមការអនុវត្តន៍នូវភូមិ ឃុំ មានសុវត្ថិភាពទាំង៩ចំណុច របស់ប្រមុខរាជរដ្ឋាភិបាល ៕
