ភ្នំពេញ៖ បុរស២នាក់បានរងរបួសធ្ងន់ ត្រូវបានរថយន្តសង្គ្រោះ ដឹកទៅសង្គ្រោះនៅមន្ទីរពេទ្រភ្លាមៗ ដោយសារតែពួកគេបានបើករថយន្តកូរ៉េ ដឹកទឹកកកមួយគ្រឿង ហើយជ្រុលបុកជាមួយរថន្តកុងតឺន័រ ចំពីមុខពេញទំហឹង កាលពីវេលាម៉ោង ២និង១០នាទីយប់ រំលងអធ្រាត្រ ឈានចូលថ្ងៃទី៧ ខែមិថុនា ឆ្នាំ២០១៥ នៅលើកំណាត់ផ្លូវ(វេងស្រេង) ដែលកំពុងកសាង(ចាក់បេតុង) ក្នុងភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ ក្រុងភ្នំពេញ ។
ជនរងគ្រោះទី១ឈ្មោះ រ៉ា អាយុ២៥ឆ្នាំ មុខរបអ្នកបើកបររថយន្តដឹកទឹកកក ស្នាក់នៅនិងផ្ទះថៅកែ ក្នុងសង្កាត់ដង្កោ ខណ្ឌដង្កោ (របួសធ្ងន់) និងបុរសមា្នក់ទៀតឈ្មោះ ហេង ឆាន អាយុ២១ឆ្នាំ ជាកម្មករអ្នកលើកទឺកកក ស្នាក់នៅជាមួយគ្នារបួសស្រាល ។
តាមសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តមួយគ្រឿង ម៉ាកកូរ៉េដឹកទឹកកក ពណ៌ស ពាក់ស្លាកលេខ ភ្នំពេញ 2N-1804 បើកបរដោយបុរសម្នាក់ និងព្រួម្នាក់ទៀត រួមដំណើរជាមួយធ្វើដំណើរតាមបណ្តោយផ្លូវវេងស្រេង ក្នុងទិសដៅពីកើតទៅលិច ក្នុងល្បឿនលឿន ខណៈមកដល់ចំណុចកើតហេតុ ស្រាប់តែមានរថយន្តកុងតឺន័រមួយគ្រឿងទៀត ពណ៌លឿង ពាក់ស្លាកលេខ ភ្នំពេញ 3BC-2874 ធ្វើដំណើរបញ្ច្រាស់ទិសគ្នា ក្នុងល្បឿនលឿនដូចគ្នា ហើយបានជ្រុលបុកគ្នាចំពីមុខពេញទំហឹង បណ្តាលឲ្យរថយន្តកូរ៉េដឹកទឹកកក ខ្ទៀតចំងាយ៤០ម៉ែត្រ គាប់ជាប់តៃកុងនៅកាបិន រងរបួសធ្ងន់ ចំណែករថយន្តកុងតឺន័រ រងការខូចខាតផងដែរ ។
ក្រោយពេលកើតហេតុ តៃកុងរថយន្តកុងតឺន័រ បានចុះគេចខ្លួនបាត់ស្រោមោលតែម្តង បន្សល់រថយន្តនៅកន្លែងកើតហេតុ ចំណែកនាក់រងរបួស ត្រូវបានរថយន្តសង្គ្រោះ ដឹកទៅសង្គ្រោះនៅមន្ទីរពេទ្យភ្លាមៗ រីឯរថយន្តត្រូវបានសមត្ថកិច្ចធ្វើការវាស់វែង យកទៅអធិការដ្ឋាននគរបាល ខណ្ឌមានជ័យ ដើម្បីរងចាំដោះស្រាយតាមច្បាប់ ៕