សៀមរាប សមិទ្ធិផលអណ្តូងទឹកស្នប់ចំនួន ១៧ និង បង្គន់អនាម័យចំនួន៤០ ដែលជាអំណោយរបស់ រ៉ូតារីអាំងទែណា ស្យូណាល់ អាយឈិជប៉ុន ដែលបានផ្តល់ជូនប្រជាពលរដ្ឋក្រីក្រ ឃុំចំនួន៣ របស់ស្រុកបន្ទាយស្រី ប្រាសាទបាគងនិងស្រុកសូទ្រនិគមតាមរយៈសាខាកាកបាទក្រហកម្ពុជាខេត្ត ត្រូវបានបើកសម្ពោធដាក់ឲ្យប្រើប្រាស់ជាផ្លូវការ កាល ពីព្រឹកថ្ងៃទី០៨ ខែ មិថុនា ឆ្នាំ២០១៥ ក្រោមអធិបតីភាពរបស់ លោកស្រីគួយណាលីនអនុគណៈកម្មាធិកាសាខាកាកបាទក្រហមកម្ពុជាខេត្តសៀមរាប ដោយមានការអញ្ជើញចូលរួមពីសំណាក់លោកប្រធាន រ៉ូតារីអាំងទែណាស្យូណាល់ អាយឈិជប៉ុន និង សហការី ព្រមទាំងអស់លោកលោកស្រីជាសមាជិកគណៈកម្មាធិការ សាខាកាកបាទក្រហមខេត្ត អាជ្ញាធរស្រុកទាំង៣ និង មេឃុំ លោកគ្រូ អ្នកគ្រូ សិស្សានុសិស្ស និង ប្រជាពលរដ្ឋ ដែលត្រូវបានប្រារព្វធ្វើនៅសាលាបឋមសិក្សាល្វា ឃុំត្រពាំងធំ ស្រុកប្រាសាទបាគង ខេត្តសៀមរាប ។បន្ទាប់ពីកិច្ចស្វាគមន៍របស់លោក ភូ សំអាត អភិបាលនៃគណៈអភិបាលស្រុកប្រាសាទបាគង និង សេចក្តី រាយការណ៍ពីការសាងសង់អណ្តូងទឹកស្នប់ និង បង្គន់អនាម័យ របស់តំណាងក្លូបលហេរីតេចទូរ ស្តីពីលើ
ការចំណាយ និង ការរកនូវមូលនិធិ ក្នុងការទ្រទ្រង់លើគម្រោង សម្រាប់ជួយដល់ប្រជាពលរដ្ឋក្រីក្រ នៅតាមជនបទខេត្តសៀមរាបព្រមទាំងបានលើកនូវគម្រោងមួយចំនួន ក្នុងការបន្តធ្វើនៅតាមបណ្តាស្រុកផ្សេងៗទៀតផងដែរ ។មានប្រសាសន៍នោះដែរលោក យ៉ូស៊ិហិសា កាហ្គោហាស៊ិ ប្រធានរ៉ូតារីអាំងទែណាស្យូណាល់ អាយឈិជប៉ុន ក៏បានធ្វើការគូសបញ្ជាក់ផងដែរថា អង្គការរ៉ូតារីអាំងទែណាស្យូណាល់ អាយឈិជប៉ុននិង ធ្វើការជួយដល់ជីវភាពរស់ នៅរបស់ប្រជាពលរដ្ឋ ប្រកបដោយសុភមង្គល និង ភាពសុខសាន្ត ។ លោកក៏បានលើកឡើងផងដែរ អំពីបញ្ហាទឹក គឺជាកត្តាសំខាន់សម្រាប់មនុស្សរុក្ខជាតិនិងសត្វក្នុងការចិញ្ចឹមជីវិត ហើយក៏ត្រូវមានអនាម័យឲ្យបានត្រឹមត្រូវផងដែរ។មានប្រសាសន៍សំណេះសំណាលនោះដែរ លោកស្រីគួយ ណាលីន ក៏បានធ្វើការថ្លែង អំណរគុណ ចំពោះកាយវិការសកម្មភាពរបស់រ៉ូតារីអាំងទែណាស្យូណាល់ អាយឈិជប៉ុន ដែលបានចូលរួមចំណែង កាត់បន្ថយភាពក្រីក្រនៅកម្ពុជា ក្នុងការលើកកម្ពស់សុខភាព និង សុខមាលភាពរបស់ប្រជាពលរដ្ឋងាយរងគ្រោះ នៅ ក្នុងសហគមន៍ ។ លោកជំទាវក៏បានគូសបញ្ជាក់ផងដែរថា ក្រោមការដឹកនាំរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែនប្រធានកាកបាទក្រហមកម្ពុជាលើកឡើងនូវទស្សនៈវិស័យ២០២០គឺ ក្នុងការពន្លឿនការកាត់បន្ថយភាពក្រីក្រការពារសេចក្តីថ្លៃថ្នូររបស់មនុស្សជាតិនិង តម្លៃមនុស្សធម៌របស់ជនងាយរងគ្រោះ ។ លោកស្រី គួយ ណាលីន ក៏បានលើកនូវវិស័យស្នូលទី២ នៃទស្សនៈវិស័យនេះគឺសុខភាពនិងការថែទាំសុខភាពក្នុងសហគម ហើយត្រូវបានសាខាកាកបាទក្រហមកម្ពុជាខេត្តសៀមរាប បានសហការជាមួយដៃគូសមាគមជាតិ កាក បាទក្រហម និង បណ្តាប្រទេសជាមិត្ត និងស្ថាប័នជំនាញ ក្នុងគម្រោងអភិវឌ្ឍន៍សុខភាពសហគមន៍មូលដ្ឋាន ដោយឈរលើផែ្នក ទាំង៤គឺការអប់រំពីអនាម័យសុខភាពការប្រើប្រាស់ទឹកស្អាតការប្រើបង្គន់អនាម័យនិង ការអប់រំផ្តល់អាហាររូបត្ថម្ភចំពោះកុមារនៅក្នុងសហគមន៍ហើយត្រូវបានផ្តោត
សំខាន់ លើក្រុមគោលដៅងាយរងគ្រោះជនចាស់ជរាគ្មានទីពឹងកុមារកំព្រាជនពិការអ្នកជម្ងឺអេដស៍ ស្ត្រីមេម៉ាយមានកូនច្រើនក្នុងបន្ទុកនិងគ្រួសារក្រីក្រ។លោកស្រីក៏បានបន្តទៀតថា តាមរយៈនៃសមិទ្ធិផលអណ្តូងទឹកស្នប់ និង បង្គន់អនាម័យ ដែលបានបើកសម្ពោធដាក់ឲ្យប្រើប្រាស់នាពេល នេះ គឺជាគុណយ៉ាងជ្រាលជ្រៅរបស់រ៉ូតារីអាំងទែណាស្យូណាល់ អាយឈិជប៉ុន ដែលមានសណ្តានចិត្តសប្បុរសធម៌ ដោយការមើលឃើញនូវរាល់កង្វះខាតសុខភាពអនាម័យទឹកស្អាត ហើយបានឧបត្ថម្ភជាអណ្តូងទឹកស្នប់ និង បង្គន់ អនាម័យ ជូនដល់ប្រជាជនក្រីក្រ ។ លោកស្រី គួយ ណាលីន ក៏មានសង្ឃឹមជឿជាក់ថា រ៉ូតារី អាំងទែណាស្យូណាល់ អាយឈិជប៉ុន និង ក្លូបលហេរីតេចទូរ នឹងបន្តជួយឧបត្ថម្ភគាំទ្រ លើវិស័យសុខភាព និង សុខមាលភាពជូនដល់ប្រជាពលរដ្ឋក្រីក្រនៅតាមបណ្តាស្រុកផ្សេងៗទៀត ព្រមទាំងបានផ្តាំផ្ញើដល់បងប្អូនក្រុមគ្រួសារដែលទទួលបានអណ្តូងទឹកនិងបង្គន់អនាម័យ របស់រ៉ូតារីអាំងទែណាស្យូណាល់ អាយឈិជប៉ុន ដែលជាអំណោយ មនុស្សធម៌ដ៏សប្បុរសរបស់ប្រជាជនជប៉ុន ដែលបានបរិច្ចាកថវិកាជួយដល់ប្រជាជនក្រីក្រនៅកម្ពុជាហើយបងប្អូន ត្រូវធ្វើការថែរក្សាក្នុងការប្រើប្រាស់ឲ្យបានយូអង្វែង និង ត្រូវប្រកាន់ខ្ជាប់នូវអនាម័យភូមិដ្ឋាន ប្រើប្រាស់ទឹកស្អាត ដើម្បីសុខភាពល្អ ក៏ដូចការកសាងសុភមង្គលក្នុងគ្រួសារតទៅអនាគតផងដែរ ៕
