ខេត្តប៉ៃលិន៖ ប្រជាពលរដ្ឋ ក៏ដូចជាមន្ត្រីរាជការទូទាំងខេត្តប៉ៃលិន មានការសោកស្តាយជាទីបំផុត ខណៈពេលដែលទទួលដំណឹងថា សម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភាជាតិ និងជាប្រធានគណបក្សប្រជាជនកម្ពុជា បានទទួលមរណៈភាព កាលពីថ្ងៃទី៨ ខែមិថុនា ឆ្នាំ២០១៥ ត្រួវនិងថ្ងៃចន្ទ័ ៧រោច ខែជេស្ឋ ឆ្នាំមមែ សក្ភស័ក ព.ស២៥៥៩ ក្នុងជន្នាយុ៨៣ឆ្នាំ ដោយរោគាពាធ ។
ក្នុងឪកាសប្រកបដោយសេចក្តីខ្សិកខ្សួលរំជួលចិត្តដ៏ ក្រៀមក្រំស្ទើរកទីបំផុតគ្មាននេះដែរ អ្នកមីងដែលកំពុងរៀបចំធ្វើទឹកនំបញ្ចុក ហើយបម្រុងយកទៅលក់ឈ្មោះ សុន សាំង អាយុ៥២ឆ្នាំ រស់នៅភូមិសួនអំពៅលិន សង្កាត់ប៉ៃលិន ក្រុងប៉ៃលិន បានរៀបរាប់ប្រាប់អ្នកយកព័ត៌មានកម្ពុជាថ្មីដឹងថា៖រូបគាត់ក៏ដូចជាអ្នកក្នុងភូមិ មានការសោកស្តាយយ៉ាងខ្លាំងបំផុត ចំពោះការបាត់បង់សម្តេច ជា ស៊ីម ប្រធានព្រឹទ្ឋសភាជាតិ និង ជាប្រធានគណបក្សប្រជាជនកម្ពុជា ដូចជាបាត់បង់នូវវរ:ជនដ៏ឆ្នើមនៃជាតិមាតុភូមិកម្ពុជា ,ជាមួយនិងការរូបគាត់សូមលំឱនកាយ ចូលរួមមរណ:ទុក្ខយ៉ាងក្តុកក្តួល និង អាឡោះអាល័យបំផុត ចំពោះការបាត់បង់សម្តេចប្រធាននេះ ។ អ្នកមីងបន្តទៀតថា៖ សម្តេចប្រធានមានស្នាដៃក្នុងការកសាងប្រទេសតាំងពីបាតដៃទទេរ រហូតដ៏មានការរើកចំរើនដល់សព្វថ្ងៃ, បើនិយាយឲ្យចំទៅគឺចាប់តាំងពីថ្ងៃទី៧ ខែមករា ឆ្នាំ១៩៧៩ ដោយក្រោមការដឹកនាំរបស់សម្តេចប្រធានគណៈបក្សប្រជាជនកម្ពុជា ទើបប្រទេសកម្ពុជាមានការរើកចំរើន ។ ដូច្នោះការបាត់បង់នូវសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា និងជាប្រធានគណៈបក្សប្រជាជនកម្ពុជានេះ ជាការបាត់បង់នូវឥស្សជនជាន់ខ្ពស់ខ្មែរ១ រូប ជាអ្នកធ្លាប់បំពេញនូវបូជនីយកិច្ចដ៍ថ្លៃថ្លា ដើម្បីជាតិមាតុភូមិយើង។ ជាមួយការបាត់បង់នេះដែរ សូមវិញ្ញាណក្ខ័ន្ឋសម្តេចបានសោយសុខនៅឋានសុគតិភពកុំបីឃ្លៀងឃ្លាតឡើយ , ដោយចងចាំជានិច្ច ចំពោះការតស៊ូ និងពលីកម្មគ្រប់យ៉ាង ដែលសម្តេចបានលះបង់ចំពោះជាតិ និងមាតុភូមិ កម្ពុជា ។
មន្ត្រីសាលាខេត្តប៉ៃលិនម្នាក់ បានរៀបរាប់ប្រាប់អ្នកយកព័ត៌មានកម្ពុជាថ្មីថា៖ គាត់មានការសោកស្តាយជាទីបំផុតចំពោះការបាត់បង់ នូវសម្តេចអគ្គមហាធម្មពោធិសាលគតិបណ្ឌិត ជា ស៊ីម ប្រធានគណបក្សប្រជាជនកម្ពុជា និងជាប្រធានព្រឹទ្ធសភាជាតិ ដែលបានទទួលមរណភាពនៅរសៀលថ្ងៃទី០៨ ខែមិថុនា ឆ្នាំ២០១៥ នេះ ។ គាត់បន្តថា៖ សម្តេចបានលះបង់គ្រប់បែបយ៉ាងគឺធ្វើយ៉ាងណា ឲ្យប្រទេសរីចំរើន ចាប់តាំងថ្ងៃទី៧ ខែមករា ឆ្នាំ១៩៧៩ មកម្លេះ ហើយប្រទេសកម្ពុជាទាំងមូលបើពុំមានគណៈបក្សប្រជាជនកម្ពុជាទេ ក៏យើងមិនមានថ្ងៃនេះដែរ ។ រូបគាត់ឲ្យដឹងទៀតថា៖ សម្តេច បានតស៊ូ ប្រឆាំងនូវរបរប្រល័យពួជសាសន៏ ប៉ុល ពត រហូតធ្វើឲ្យប្រទេសជាតិរួចផុតពីរបរប្រល័យពយជសាសន៏មួយនេះដែរ , ការតស៊ូរបស់សម្តេចត្រួវបានព្រះករុណា ព្រះបាទសម្ដេចព្រះ នរោត្ដម សីហនុ ដាក់ងារជា«សម្តេច» កាលពីឆ្នាំ១៩៩៣ ហើយបន្ទាប់មកក៏បានទទួលងារជា “សម្ដេចអគ្គមហាធម្មពោធិសាល”កាលពីខែតុលា ឆ្នាំ២០០៧ ពីសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា ។ ដូច្នោះការបាត់បង់សម្តេចអគ្គមហាធម្មពោធិសាល ជា ស៊ីម ដូចជាការបាត់បង់ឥស្សជនជាន់ខ្ពស់ខ្មែរ១ រូប ដែលជាអ្នកធ្លាប់បំពេញនូវបូជនីយកិច្ចដ៍ថ្លៃថ្លា ដើម្បីជាតិមាតុភូមិកម្ពុជាយើង។ យើងខ្ញុំទាំងអស់គ្នាសូមបួងសួងឲ្យដួងវិញ្ញាណក្ខន្ធរបស់សម្តេច បានសោយសុខក្នុងសុកតិភព កុំបីឃ្លៀងឃ្លាតឡើយ ។
