សៀមរាប ថ្ងៃទី០៩ ខែមិថុនា ឆ្នាំ២០១៥ ក្រោមវត្តមានរបស់ឯកឧត្តម ប៊ុន ណារិទ្ធិ អគ្គនាយកអាជ្ញាធរជាតិអប្សរា ព្រមជាមួយនឹងវត្តមានរបស់ឯកឧត្តមអគ្គនាយករង ទទួលបន្ទុកជំនាញសំខាន់ៗ និងបណ្តាមន្ត្រីថ្នាក់ដឹកនាំនៃនាយកដ្ឋាននានា មួយចំនួនទៀត បានទទួលស្វាគមន៍ និងជួបពិភាគ្សាការងារ ជាមួយប្រតិភូមកពីប្រទេសឥណ្ឌូណេស៊ី ដែលដឹកនាំដោយលោកស្រី Lailly Prihatiningtyas ) ប្រធានអគ្គនាយក វិទ្យាស្ថាន Taman Wisata Candi ដែលជាស្ថាប័នគ្រប់គ្រងតំបន់រមណីយដ្ឋានបេតិកភ័ណ្ឌពិភពលោក រួមមានតំបន់ប្រាសាទ Borobodur Prambanan និង Ratuboko ដែលស្ថិតនៅក្រុងចាវ៉ា នៃកោះជ្វា ។
លោកស្រី ឡាយលី ព្រីហានិញទីយ៉ាស់ មានប្រសាសន៍ថា វិទ្យាស្ថាន តាម៉ាន់ វីសាតា ខានឌី មានទំនាក់ទំនងច្រើនជាមួយដៃគូផ្សេងៗ តែលោកស្រីគិតថា មិនអាចខ្វះបានទេ កិច្ចទំនាក់ទំនង សហប្រតិបត្តិការ ជាមួយអាជ្ញាធរជាតិអប្សរានៃប្រទេសកម្ពុជា ពីព្រោះអាជ្ញាធរអប្សរា មានបទពិសោធន៍ និងទទួលបានជោគជ័យជាច្រើន ដែលអាចនិយាយបានថា ជាគំរូដ៏ល្អទូទាំងសាកលលោក ក្នុងការគ្រប់គ្រង រៀបចំ តំបន់បេតិកភ័ណ្ឌពិភពលោក ។ លោកស្រីបានបន្តថា រចនាសម្ព័ន្ធការងារគ្រប់គ្រង រៀបចំតំបន់បេតិកភណ្ឌ នៃប្រាសាទទាំង៣ នៅក្រុងចាវ៉ា ឬ កោះជ្វា នៃប្រទេសឥណ្ឌូណេស៊ី គឺមានលក្ខណៈស្មុគស្មាញច្រើន មិនដូចអាជ្ញាធរអប្សរានៃប្រទេសកម្ពុជានោះទេ ដែលជាស្ថាប័នគ្រឹះស្ថានសាធារណរដ្ឋបាលតែមួយគត់របស់ជាតិ ដើម្បីដំណើរការកិច្ចការថែរក្សា អភិរក្ស អភិវឌ្ឍន៍ និងរៀបចំតំបន់បេតិភណ្ឌ ប្រកបដោយតម្លាភាព ។
យោងតាមអ្វីដែលលោកស្រីបានលើកឡើង លោកស្រីបានសំណូមពរឲ្យអាជ្ញាធរជាតិអប្សរា ចែករំលែកនូវបទពិសោធន៍ លើ៣ចំណុចសំខាន់ ។ ចំណុចទី១ អ្វីដែលជាការលំបាកខ្លាំង គឺការកសាងប្រាសាទទាំង៣ របស់ឥណ្ឌូណេស៊ី គឺត្រូវបានឆ្លងកាត់ប្រវត្តិសាស្ត្រនៃការទទួលយកសាសនាជាច្រើន ហើយនៅលើប្រាសាទទាំង៣ គឺមានច្រើនណាស់ព្រះពុទ្ធបដិមា តែបច្ចុប្បន្ន ប្រជាពលរដ្ឋឥណ្ឌូណេស៊ី គឺសាសនិកម៉ូស្លីម ដូច្នេះនាបច្ចុប្បន្ននេះ ប្រាសាទបេតិកភណ្ឌទាំងនោះ គឺមានតែរូប តែគ្មានព្រលឹងនោះឡើយ តើត្រូវធ្វើយ៉ាងដូចម្តេច ដើម្បីនាំយកព្រលឹងនៃប្រាសាទទាំងនោះមកវិញបាន រួមទាំងការបាត់បង់បេតិកភ័ណ្ឌអរូបី ផងដែរ ។
ការស្នើសុំចែករំលែកបទពិសោធន៍ទី២ គឺការគ្រប់គ្រង រៀបចំ និងបង្កើនប្រសិទ្ធិភាពវិស័យ ទេសចរណ៍ ព្រោះថានៅតំបន់រមណីយដ្ឋានប្រវត្តិសាស្ត្រអង្គរ មានកំណើនភ្ញៀវទេសចរចូលមកទស្សនា ជារៀងរាល់ឆ្នាំ និង សំណូមពរចែករំលែកបទពិសោធន៍ទី៣ ស្តីអំពីវិធីសាស្ត្រការងារ ដើម្បីលើកកម្ពស់ ការចូលរួមពីសំណាក់ប្រជាសហគមន៍ដែលរស់នៅក្នុងតំបន់ឧទ្យានប្រវត្តិសាស្ត្រ លើការអនុវត្តកិច្ចការថែរក្សា អភិរក្ស រៀបចំកិច្ចការអភិវឌ្ឍន៍តំបន់បេតិកភ័ណ្ឌ ប្រកបដោយចិរភាព ៕ ដោយគឿនវ៉េត
