ខេត្តប៉ៃលិន៖ ក្រុមយុវជន និងប្រជាពលរដ្ឋទូទាំងខេត្តប៉ៃលិន មានការចាប់អារម្មណ៏ខ្លាំងចំពោះកីឡាស៊ីហ្គេម លើកទី២៨ ឆ្នាំ២០១៥នេះ ពិសេសកីឡាបាល់ទាត់ ដែលកម្ពុជាយើងមានកីឡាករជើងខ្លាំងជាច្រើននាក់ ដោយក្នុងនោះកីឡាករជម្រើសជាតិU23 បានធ្វើឲ្យប្រទេសកម្ពុជា មានឈ្មោះបោះសំឡេងលើឆាកអន្តរជាតិផ្នែកកីឡាបាលទាត់ ។ ជាក់ស្តែងនារាត្រីថ្ងៃទី១០ ខែមិថុនា ឆ្នាំ២០១៥ ក្រោមជំនោរខ្យល់បក់ដ៏ត្រជាក់ លើសួនកុមារទល់មុខសាលាខេត្តប៉ៃលិន មានយុវជន និងប្រជាពលរដ្ឋជាច្រើននាក់ បានអង្គុយទស្សនាមើលការប្រកូតបាលទាត់រវាង កម្ពុជា និង មីយ៉ាន់មា ,ហើយពួកគេទាំងនោះបានសារទនូវជោគជ័យ ដែលកម្ពុជាទទូលបានលើដៃគូរផងដែរ ។លោក រិន វាសនា រស់នៅភូមិប៉ាហ៊ីជើង សង្កាត់ប៉ៃលិន ដែលបានមកទស្សនាការប្រកូតកីឡាបាលទាត់ លើសួនកុមារទល់មុខសាលាខេត្តប៉ៃលិន
បានរៀបរាប់ប្រាប់ថា៖ សព្វថ្ងៃនេះ ប្រទេសជាតិមានការរីកចំរើនច្រើនគួរឲ្យគាត់សំគាល់ ពិសេសផ្នែកកីឡា មិនថាកីឡាប្រដាល់ កីឡាបាលទាត់ ឬវាយស៊ី គឺកម្ពុជាយើងមានកីឡាករជើងខ្លាំងជាច្រើន ហើយកីឡាទាំងនេះតែងតែធ្វើឲ្យប្រទេសកម្ពុជា មានឈ្មោះបោះសំលេងលើឆាក់អន្តរជាតិផងដែរ ។ លោកបន្តថា៖ ក្នុងការដែលលោកមកទស្សនានារាត្រីនេះ គឺដើម្បីលើកទឹកចិត្តឲ្យកីឡាករបាលទាត់ខែ្មរយើងទទូលបានជោគជ័យ បើទោះបីលោកមិនបានទៅមើលការប្រកូតផ្ទាល់ក៏ដោយ ។ចំណែកលោក យ៉េត ម៉ាប់ រស់នៅភូមិដីក្រហម សង្កាត់អូរតាវ៉ៅ ដែលបានមកទស្សនាការប្រកូតកីឡាបាលទាត់ លើសួនកុមារទល់មុខសាលាខេត្តនេះ បានឲ្យដឹងថា៖ក្រុមកីឡាករជម្រើសជាតិកម្ពុជាU23 ពិតជាធ្វើឲ្យប្រជាជនកម្ពុជា មានការចាប់អារម្មណ៏ខ្លាំង ហើយនៅឯភូមិរបស់លោក មិនថាផ្ទះមួយណានោះទេ ឲ្យតែដល់ម៉ោងការផ្សាយកីឡាបាលទាត់នេះ តែងតែរងចំអង្គុយមើល ស្ទើរភ្លេចបាយភ្លេចទឹក ធ្វើគឺដើម្បីលើកទឹកចិត្តកីឡាករកម្ពុជាយើង ។ លោកបន្តទៀតថា៖ ហើយនៅរាត្រីនេះដែរគឺជាការប្រកូតរវាងកីឡាករកម្ពុជា ជាមួយកីឡាករប្រទេសមីយ៉ាន់មា (ភូមា) ពិតជាធ្វើឲ្យអ្នកទស្សនាមានការចាប់អារម្មណ៏ច្រើនផងដែរ ។មន្ត្រីសាលាខេត្តប៉ៃលិន ម្នាក់បានរៀបរាប់ប្រាប់អ្នកយកព័ត៌មានកម្ពុជាថ្មី ថា៖ ការដាក់បញ្ចាំស្លាយពាក់ព័ន្ធនិងកីឡាបាលទាត់នេះ គឺដើម្បីលើកស្ទួយកីឡា
កម្ពុជាយើង និងដើម្បីឲ្យប្រជាពលរដ្ឋក្នុងខេត្តប៉ៃលិន ពិសេសក្រុមយុវជន ត្រួវមានការចាប់អារម្មណ៏ចំពោះកីឡានេះ ,ហើយម្យ៉ាងវិញទៀតនោះ គឺ ដើម្បីជាការលើកទឹកចិត្តដល់ក្រុមកីឡាករបាល់ទាត់កម្ពុជា ដែលមានអាយុក្រោម ២៣ឆ្នាំ (U23) របស់ព្រះរាជាណាចក្រកម្ពុជាយើង ។ លោកក៏សំណូមពរធ្វើយ៉ាងណាចូលរួមទស្សនាទាំងអស់គ្នា គឺដើម្បីលើកទឹកចិត្តកីឡាករកម្ពុជាយើង ហើយកីឡាករកម្ពុជាយើងទាំងនេះ ក៏កំពុងធ្វើឲ្យពិភពលោកមានការចាប់អារម្មណ៏ផងដែរ ៕ ប៊ុន វាសនា