ខេត្តប៉ៃលិន៖ ប្រជាពលរដ្ឋក្រីក្រខ្វះស្បៀងអាហារចំនួន២០គ្រួសារ បានទទូលអំណោយពីលោកជំទាវ ជា លាប អភិបាលរងខេត្តប៉ៃលិន និងលោកជំទាវ គង់ ស្តី ក្នុងនាមឯកឧត្តម កើត សុធា អភិបាលនៃគណៈអភិបាលខេត្តប៉ៃលិន ដោយមានការសហការជាមួយមន្ទីរសង្គមកិច្ច និងអតីតៈយុទ្ធជនខេត្ត ។ ពិធីចែកអំណោយនេះ ធ្វើឡើងនាល្ងាចថ្ងៃទី២៤ ខែមិថុនា ឆ្នាំ២០១៥ នៅបរិវេណវត្តបេង ស្ថិតក្នុងភូមិអូរបេង ឃុំស្តឹងកាច់ ស្រុកសាសាក្រៅ ខេត្តប៉ៃលិន ។
លោកជំទាវ ជា លាប អភិបាលរងខេត្តប៉ៃលិន បានមានប្រសាសន៍ពាំនាំបណ្តាំផ្ញើរសាកសួរសុខទុក្ខពីសំណាក់ឯកឧត្តម កើតសុធា អភិបាលនៃគណៈអភិបាលខេត្តជូនចំពោះបងប្អូនប្រជាពលរដ្ឋ ដែលជានិច្ចកាលឯកឧត្តមតែងតែគិតគូរពីទុក្ខលំបាករបស់បងប្អូនប្រជាពលរដ្ឋទូទាំងខេត្តប៉ៃលិន ។ ជាក់ស្តែងពេលនេះគ្រាន់តែទទួលព័ត៌មានថាបងប្អូនប្រជាពលរដ្ឋខ្វះខាតស្បៀង ឯកឧត្តម ក៏បានឲ្យក្រុមការងារចុះសួរសុខទុក្ខនិងនាំស្បៀងអាហារនិងថវិកាមកផ្តល់ជូនបងប្អូនភ្លាមដើម្បីចូលរួមជួយរំលែកទុក្ខលំបាក បើទោះបីអំណោយទាំងនេះតិចតួច តែវាអាចយកទៅដោះស្រាយក្នុងងជីវភាពបានមួយកំរិតដែរ។
លោកជំទាវបានសំណូមពរដល់បងប្អូនប្រជាពលរដ្ឋត្រូវខិតខំបង្កបង្កើនផលដាំដំណាំផ្សេងៗឲ្យច្រើនដើម្បីដោះស្រាយជីវភាពឲ្យធូធាឡើង ព្រោះថាពេលនេះភ្លៀងបានធ្លាក់បណ្តើៗហើយ។ បងប្អូនប្រជាពលរដ្ឋដែលទទូលបានអំណាយចំនួន២០គ្រួសារមកពីភូមិស្ទឹងកាច់ ភូមិអូរបេង ភូមិស្លា ភូមិបុស្អំ ភូមិដូង និងភូមិអូររអិល ឃុំស្តឹងកាច់ ស្រុកសាសាក្រៅ ខេត្តប៉ៃលិន ,ដោយក្នុងមួយគ្រួសារៗទទួលបានថវិកា ១០០០០រៀល អង្ករ២៥គីឡូក្រាម ឆ្នាំង១ មីមួយកេះ ក្រម៉ា១ ទឹកត្រី៣ដប ទឹកស៊ីអ៊ីវ៣ដប ចានស្រាក់១ ធុងទឹកកក១ ត្រីខ៥កំប៉ុង ចំណែកលោកជំទាវ គង់ ស្តី ក៏បានឧបត្ថម្ភថវិកាបន្ថែមទៀតក្នុងមួយគ្រួសារ២០០០០រៀលផងដែរ ៕
