ខេត្តកំពង់ឆ្នាំង៖កូនឈើព្រៃលិចទឹក៦ប្រភេទចំនួន៣៥០០ដើម ត្រូវបានអាជ្ញាធរ ជលផល និងប្រជាពលរដ្ឋដាយកទៅដាំនៅក្នុងដីព្រៃសហគមន៍សំរិទ្ធជ័យ ស្ថិតក្នុងភូមិសំរិទ្ធជ័យ ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង ដើម្បីបង្កើនព្រៃជាជំរកសំរាប់ត្រីពងកូន។ពិធីនេះបានធ្វើឡើងព្រឹកថ្ងៃទី០២ ខែកក្កដា ឆ្នាំ២០១៥ ដោយមានការចូលរួមពីលោកជំទាវ តុង ណារី សមាជឹកក្រុមប្រឹក្សាខេត្ត លោកអភិបាលស្រុកកំពង់ត្រឡាច នាយ នាយរង មន្ត្រីរដ្ឋបាលជលផលកំពង់ឆ្នាំង សប្បុរសជន និងប្រជាពលរដ្ឋចូលរួម ប្រមាណជិត៥០០នាក់។
លោក សោម ភិរុណ នាយខ័ណ្ឌរដ្ឋបាលជលផលកំពង់ឆ្នាំងបានថ្លែងថា៖ ក្រោយពីកំណែរទម្រង់វិស័យជលផល ខេត្តកំពង់ឆ្នាំងបានបង្កើតសហគមន៍នេសាទបានចំនួន៦១សហគមន៍ ដែលបច្ចុប្បន្នកន្លែងអភិរក្សត្រីមេពូជមានចំនួន៤០កន្លែង និងព្រៃសហគមន៍បាន១០កន្លែង។នៅឆ្នាំ២០១៤រហូតមកដល់បច្ចុប្បន្ន ខ័ណ្ឌរដ្ឋបាលេជលផលបានដាំកូនឈើព្រៃលិចទឹកបានចំនួន៧លើក នៅតាមបណ្តាសហគមន៍នេសាទ លើផ្ទៃដីទំហំសរុប១២ហិកតា និងប្រើប្រាស់កូនឈើប្រភេទព្រៃលិចទឹកចំនួនជាង៣ម៉ឺនដើម។ក្នុងទិសដៅបន្តខ័ណ្ឌរដ្ឋបាលជលផលកំពង់ឆ្នាំង នឹងដាំព្រៃលិចទឹកនៅសហគមន៍នេសាទសំរិទ្ធជ័យទំហំ២ហិកតាថែមទៀត។ចំណែកនៅក្នុងថ្ងៃនេះយើងបានធ្វើពិធីដាំកូនឈើបន្ថែនចំនួន៣៥០០ដើមទៀតនៅក្នុងសហគមន៍សំរិទ្ធជ័យ។
លោក ឈឹម វុទ្ធា អភិបាលស្រុកកំពង់ត្រឡាចបានលើកឡើងថា៖ បច្ចុប្បន្នប្រភពធនធានជលផលរបស់យើងកំពុងមានការប្រឈមទៅនឹងការបំផ្លិចបំផ្លាញពីមួយថ្ងៃទៅមួយថ្ងៃឥតឈប់ឈរ ដែលបង្កឡើងដោយជនល្មើសនេសាទអនាធិបតេយ្យមួយចំនួន ធ្វើការនេសាទដោយខុសច្បាប់ដូចជា ការប្រើប្រាស់ឧបករណ៍ឆក់ របាំងលូស្បៃមុង របាំងលបលូសាច់អួន បូមបាចពង្រីកបឹងបួរ ដាក់សម្រាស់ កាប់ឆ្ការទន្ទ្រានយកព្រៃលិចទឹក ឈូសឆាយដុតបំផ្លាញព្រៃលិចទឹក យកដីធ្វើជាកម្មសិទ្ធជាដើម។ទង្វើបែបនេះ ធ្វើអោយធនធានជលផលថយចុះជាបន្តបន្ទាប់ស្ទើររៀងរាល់ឆ្នាំគួរអោយបារម្ភ។លោកសុំសំណូមពរដល់ប្រជាពលរដ្ឋ អាជ្ញាធរ សមត្ថកិច្ចគ្រប់ជាន់ថ្នាក់ សហគមន៍នេសាទ រួមគ្នាបង្ការនិងទប់ស្កាត់ បង្ក្រាបបទល្មើសជលផលគ្រប់ប្រភេទ ការពារកន្លែងអភិរក្សធនធានជលផលអោយបាន ដើម្បីរួមចំណែកជួយថែរក្សា ការពារធនធានជលផលប្រកបដោយនិរន្តរភាពដើម្បីធានានូវសន្តិសុខ និងសុវត្ថិភាពស្បៀង។
ដោយឡែកលោកជំទាវ តុង ណារី សមាជឹកក្រុមប្រឹក្សាខេត្តកំពង់ឆ្នាំងក៍បានថ្លែងទៅកាន់អង្គពិធីថា៖នាឱកាសនេះ យើងរួមគ្នាដាំកូនឈើព្រៃលិចទឹកនៅក្នុងដែនគ្រប់គ្រងដោយសហគមន៍នេសាទ បានបង្ហាញអោយឃើញពីសក្ខីភាពនៃកិច្ចការពារថែរក្សាគ្រប់គ្រងធនធានជលផលអោយបានស្ថិតស្ថេរគង់វង្ស និងប្រកបដោយនិរន្តរភាព រក្សាបាននូវសក្តានុពលធម្មជាតិ បំពេញបន្ថែមនូវព្រៃដែលរចរឹល ត្រូវដាស់តឿនក្រើនរំលឹកដល់ស្មារតីប្រជាពលរដ្ឋ និងអ្នកនេសាទគ្រប់រូប ត្រូវបញ្ជៀសអោយបាននូវទង្វើខុសច្បាប់នេសាទគ្រប់ប្រភេទ។
លោកជំទាវក៍បាន សំណូមពរដល់អាជ្ញាធរឃុំស្រុក និងអ្នកពាក់ព័ន្ធទាំងអស់មេត្តាចូលរួមជួយគាំទ្រ និងសុំចាត់បញ្ចូលផែនការអភិវឌ្ឍន៍៥ឆ្នាំរំកិល និងកម្មវីធីវិនិយោគ៣ឆ្នាំរំកិល ដែលផ្តល់មូលនិធិរបស់ឃុំស្រុក និងជួយសហការណ៍ល្អជាមួយសហគមន៍នេសាទ ដើម្បីរួមចំណែកអនុវត្តនូវយុទ្ធសាស្ត្រចតុកោណរបស់រាជរដ្ឋាភិបាលកម្ពុជាដំណាក់កាលទី៣ ក្នុងអណត្តិទី៥ ពិសេសការកំណែទម្រង់វិស័យជលផលអោយមានការរីកចំរើន និងគង់វង្សជានិរន្ត រហូតតទៅសំរាប់កូនចៅជំនាន់ក្រោយរបស់យើង៕
