ខេត្តកំពង់ឆ្នាំង៖ យុវសិស្សរងគ្រោះ ម្នាក់រងរបួសបែកក្បាលដេរចំនួន២ថ្នេរ និងយុវសិស្សម្នាក់ទៀតជាជនដៃដល់ត្រូវបានសមត្ថកិច្ចនគរបាល ក្រុងកំពង់ឆ្នាំង ធ្វើការចាប់ឃាត់ខ្លួន ក្នុងជម្លោះប្រើអំពើហឹង្សាដោយចេតនាមួយ បានកើតឡើងនៅវេលាម៉ោង ៩និង៣០នាទីព្រឹកថ្ងៃទី០៤ ខែកក្កដា ឆ្នាំ២០១៥ នៅក្នុងវិទ្យាល័យព្រះបាទសុរាម្រឹត ស្ថិតក្នុង ភូមិត្រពាំងចឹកសារ សង្កាត់កំពង់ឆ្នាំង ក្រុងកំពង់ឆ្នាំង ខណៈដែលពួកគេមានទំនាស់វាយគ្នាក្នុងពេលលេងបាល់ក្នុងវិទ្យាល័យ។លោក ញ៉ោក ប៊ុនធី អធិការរងនគរបាលក្រុងកំពង់ឆ្នាំង បាននិយាយអោយដឹងថា៖ជនសង្ស័យ ជា យុវសិស្សដែលបានប្រព្រឹត្តអំពើហឹង្សាដោយចេតនានោះ មានឈ្មោះ វ៉ាន់ សុបញ្ញាវី អាយុ១៧ ឆ្នាំ ជា សិស្សថ្នាក់ទី ១១ F មានទីលំនៅភូមិទី៨សង្កាត់ខ្សាម ក្រុងកំពង់ឆ្នាំង ។ ចំណែកយុវសិស្សរងគ្រោះមានឈ្មោះ ឈឺន សុភក្តី អាយុ ១៨ ឆ្នាំ រៀនថ្នាក់ទី១១ B មានទីលំនៅ ភូមិឡទឹកត្រី សង្កាត់កំពង់ឆ្នាំង ក្រុង កំពង់ឆ្នាំង ទាំង២នាក់ជាសិស្សរៀននៅវិទ្យាល័យព្រះបាទសុរាម្រឹតដូចគ្នា។លោកបានបនិយាយអោយដឹងទៀតថា៖ មុនពេលកើតហេតុមានសិស្ស២ក្រុមលេងបាល់ទាត់ នៅកន្លែងផ្សេងគ្នា តែក្នុងបរិវេណតារាងបាល់ទាត់
តែមួយ ពេលនោះក៏កើតមានទំនាស់គ្នា រវាងយុវសិស្សរងគ្រោះ និងសិស្សផ្សេងទៀត ប៉ុន្តែក្នុងពេលនោះយុវសិស្សជាជនដៃដល់ បានទៅជួយមិត្តភ័ក្រដែលនៅក្នុងទំនាស់នោះ ដោយបានយកខ្យែក្រវ៉ាត់ដែលមានក្បាលដែក វាយទៅលើសិស្សរងគ្រោះបណ្តាលអោយបែកក្បាលឈាមហូរស្រោចខ្លួន ភ្លាមៗនោះដែរគ្រូបង្រៀនបានទូរស័ព្ទហៅសមត្ថកិច្ចនគរបាល ទើបសមត្ថកិច្ចចាប់ខ្លួនយុវសិស្សជាជនដៃដល់ ចំណែកយុវសិស្សរងគ្រោះត្រូវបាននាំមកមន្ទីរពេទ្យខេត្តដើម្បីព្យាបាលរបួស ដោយដេរចំនួន២ថ្នេរ ។ ចំពោះមុខសមត្ថកិច្ចយុវសិស្សជាជនដៃដល់បានសារភាពថា៖ ក្នុងទំនាស់រឿងលេងបាល់នោះ បើខ្ញុំមិនវ៉ៃគេ ក៏គេវ៉ៃខ្ញុំដែរ ទើបខ្ញុំវ៉ៃគេមុន ដើម្បីការពារខ្លួន។ ទោះបីបែបនេះក្តី សមត្ថកិច្ចនគរ បាលក្រុងកំពង់ឆ្នាំង បានកសាងសំណុំបញ្ជូនជនសង្ស័យទៅស្នងការដ្ឋាននគរបាលខេត្ត ដើម្បីចាត់ការបន្តតាមនិតិវិធីបញ្ជូនខ្លួនជនដៃដល់ទៅតុលាការខេត្ត សួរនាំបន្តនិងចាត់ការតាមផ្លូវច្បាប់៕
