ហេតុការដែលមិនគួរនិងកើតឡើងមួយរវាងអ្នកទិញនិងអ្នកលក់មិនស្គាល់គ្នាច្បាស់លាស់បានកើតឡើងនៅថ្ងៃទី១២ខែកក្កដាឆ្នាំ២០១៥កន្លងទៅនេះនៅក្រុមហ៊ុនអគ្គិសនីអ៊ូចគាដែលមានស្នាក់ការនៅភូមិផ្សារជ្រៃអង្កាញ់ស ស្រុកព្រៃកប្បាស ខេត្តតាកែវ។ បើតាមរបាយការណ៍របស់អធិការនគរបាលស្រុកព្រៃកប្បាសបានឲ្យដឹងថា នៅវេលាម៉ោង១៩និង៣០នាទី ថ្ងៃទី១២កន្លងទៅនេះ មានការប្តិងផ្តល់គ្នាមួយរវាងក្រុមហ៊ុនអគ្គិសនីអានកូ ដោយប្តឹងក្រុមហ៊ុនអគ្គិសនីអ៊ូចគាថាបានទិញបង្គោលភ្លើងរបស់ខ្លួនពីក្រុមចោរ។ បង្គោលភ្លើងដែលក្រុមចោរនាំយកមកលក់នេះមានចំនួន១២ដើម ហើយក្នុងមួយដើម១២ម៉ែត្រ ត្រូវបានលួចដឹកមកពីភូមិព្រែកអំបិល ឃុំព្រែកអំបិល ស្រុកស្អាង ខេត្តកណ្តាលតាមរយៈរថយន្តស្ទូចរបស់លោក លី គឹមឡេង ភេទប្រុស អាយុ៥៣ឆ្នាំ មុខរបរជាអាជីវករ រស់នៅសង្កាត់កាកាប ខណ្ឌពោធិសែនជ័យ រាជធានីភ្នំពេញ។ របាយការណ៍ដដែលបានឲ្យដឹងទៀតថា ក្រុមហ៊ុនអគ្គិសនីអ៊ូចគារទិញបង្គោលភ្លើងខាងលើនេះក្នុង១ដើម១០០ដុល្លារ ហើយក្រោយពេលទិញរួចក្រុមចោរបានយកលុយរត់បាត់ដោយបន្សល់ទុកនៅតែ រថយន្ដ និងបង្គោលភ្លើងនៅចំណុចខាងលើ។ ក្រោយមកក៏មានខាងតំណាងក្រុមហ៊ុនអគ្គិសនីអានកូ ឈ្មោះខៀវ សំអ៊ុយ ភេទប្រុស អាយុ៣៣ឆ្នាំបានមកដាក់ពាក្យប្ដឹងនៅអធិការនគរបាលស្រុកព្រៃកប្បាសថា ក្រុមហ៊ុនអគ្គិសនីអ៊ូចគាបានលួចបង្គោលភ្លើងរបស់ខ្លួនចំនួន១២ដើម ហើយសមត្ថកិច្ចស្រុកព្រៃកប្បាសក៏បានកោះហៅអ្នកពាក់ព័ន្ធមកសាកសួរ។ក្រោយពេលសាកសួរទើបដឹងថា ក្រុមហ៊ុនអគ្គិសនីអ៊ូចគាគឺជាអ្នករងគ្រោះ រួមជាមួយថៅកែរថយន្ដស្ទូចផងដែរ។ លោកជុំ ឈឿន អធិការស្រុកព្រៃកប្បាសបានឲ្យដឹងថា តាមពិតក្រុមចោរបានជួលរថយន្ដពីឈ្មោះលី គឹមឡេង ឲ្យដឹកបង្គោលភ្លើង១២ដើមខាងលើដោយអះអាងថា ដឹកយកទៅដាក់ឲ្យក្រុមហ៊ុនអគ្គិសនីអ៊ូចគាហើយក្រុមហ៊ុនអ៊ូចគា បាននិយាយថ្លៃជាមួយក្រុមចោរតាមទូរស័ព្ទដោយស្មានថាជាម្ចាស់បង្គោល លុះដល់ពេលក្រុមចោរដឹងបង្គោលមកដល់ភាគីខាងអ្នកទិញក៏គិតគូរលុយឲ្យដល់ក្រុមចោរនោះទៅ។ក្រោយពេលទទួលលុយគ្រប់ហើយក្រុមចោរកបានគេចខ្លួនបាត់ដោយបន្សល់ទុករថយន្តនិងបង្គោលភ្លើងនៅនិងស្នាក់ការក្រុមហ៊ុនអ៊ូចគានេះតែម្តងទៅ ។ ចំណែងខាងថៅកែរថយន្ដក៏ទូរស័ព្ទមកយកលុយពីម្ចាស់បង្គោលដែលជាក្រុមចោរដែលជួលរថយន្តខ្លួន ស្រាប់តែក្រុមចោរនោះបិទទូរស័ព្ទអស់ ដោយសង្ស័យទាំងក្រុមហ៊ុនអគ្គិសនី អ៊ូចគាទាំងថៅកែរថយន្ដក៏បាននាំគ្នាទៅដាក់ពាក្យបណ្ដឹងនៅអធីការ នគរបាលស្រុកព្រៃកប្បាសក្រែងថា ចាញ់បោកគេ ហើយភ្លាមៗនោះដែរ ស្រាប់តែម្ចាស់បង្គោលភ្លើងពិតប្រាកដក៏មកដាក់ពាក្យប្ដឹងដែរ។បច្ចុប្បន្នសំណុំរឿងខាងលើ រួមទាំងវត្ថុតាងត្រូវបានបញ្ជូនទៅសាលាដំបូងខេត្តតាកែវដើម្បីចាត់ការតាមនិតិវធីច្បាប់ ៕