ខេត្តកំពង់ឆ្នាំង៖ដោយសារតែផឹកស្រាវង្វេងស្មារតីកូនស្រីអាយុ១០ឆ្នាំម្នាក់បានរងរបួសមុតដែកគោលនៅលើខ្នង ដោយត្រូវឪពុកបានយកបន្ទះក្តារមានជាប់ដែកគោល ទៅវាយខ្នងកូនស្រីដោយអចេតនាពេលស្រវឹងស្រា។ហេតុការណ៍បានកើតឡើងនៅវេលម៉ោង៥និង៣០នាទីល្ងាចថ្ងៃទី១៦ ខែកក្កដា ឆ្នាំ២០១៥ ចំណុច ក្រញ៉ាន ភូមិកំពង់ព្រះ ឃុំឆ្នុកទ្រូ ស្រុកបរិបូរណ៌។
សមត្ថកិច្ចនគរបាលមូលដ្ឋានបាននិយាយអោយដឹងថា៖បុរសជាឪពុកមាន ឈ្មោះ ដូង រ៉ា អាយុ៣១ឆ្នាំ មានប្រពន្ឋឈ្មោះ តុល ស្រីស្រស់ អាយុ២៥ឆ្នាំ ចំណែកកូនស្រីរងគ្រោះមានឈ្មោះ ដូង ណែត អាយុ១០ឆ្នាំ។គ្រួសារខាងលើនេះជាគ្រួសារក្រីក្រមានទីលំនៅ ស្រុកកំពង់លែង តែបានមកស្នាក់នៅកន្លែងខាងលើដើម្បី ប្រកបរបរនេសាទត្រីចិញ្ចឹមជីវិត។
នៅថ្ងៃកើតហេតុស្ត្រីជាប្រពន្ឋបានទៅរាយសន្ទូច ពេលនោះបុរសជាឪពុកបាន ត្រឡប់មកពីផឹកស្រាស្រវឹងជោគជាំវិញ បានប្រើកូនស្រីអាយុ១០ឆ្នាំអោយបាចទឹកទូក ដែលមានបណ្តោយ១០ម៉ែត្រ និងបានអោយមើលប្អូនផងដែរ តែពេលនោះកុមារីបាចទឹកទូកបណ្តើរមើលប្អូនបណ្តើរ លួងប្អូនមិនយំធ្វើអោយបុរសជាឪពុកខឹង ក៏ស្រវ៉ាយកបន្ទះក្តារដែលមិនដឹងថាមានដែក គោលជាប់នៅខាងចុង មកវាយខ្នងកូនបណ្តាលអោយរងរបួសពេញខ្នង។ពេលឃើញបែបនេះ អនុប្រធានភូមិ ឈ្មោះ ផែន ចាន់ធី បានរាយការណ៍ដល់សមត្ថកិច្ច និងបានហៅបុរសជាឪពុកទៅសាកសួរ ហើយបានធ្វើកំណត់ហេតុអប់រំណែនាំរួចអោយត្រឡប់ទៅផ្ទះវិញ ដោយឪពុកបានដឹងកំហុសនិងមិនបានដឹងថានៅលើបន្ទះក្តារដែលខ្លួនយកមកវាយកូននោះមានដែកគោលឡើយ។ រឿងខាងលើនេះគឺជាការពញ្ញាក់ស្មារតីដល់អាណាព្យាបាល មាតា បិតា គ្រប់រូបសូមកុំច្រឡោតខឹងគ្រប់គ្រងកំហឹងមិនបានធ្វើរឿងដែលមិនគួរអោយកើតបែបនេះ ដែលការវាយនេះចំខ្នងកូនចុះបើវាយចំភ្នែក ចំសរសៃកញ្ចឹងកវិញ មិនស្លាប់ទេឬ ហើយនឹងមានវិប្បដិសារីក្នុងជិវិតយ៉ាងណាទៅ។ ចំណែកសមត្ថកិច្ច និងអាជ្ញាធរមូលដ្ឋានយល់ថាជាកំហុសអចេតនា ព្រោះតែគ្រួសារនេះក្រីក្រលំបាកផង គឺបានត្រឹមតែអប់រំណែនាំប៉ុណ្ណោះ តែបើគិតតាមច្បាបើវិញគឺត្រូតែមានទោសព្រោះនេះគឺជាអំពើទារុណកម្មលើកុមារ ដែលមិនគួរអោយកើតឡើយ៕
