ខេត្តកំពង់ឆ្នាំង៖ យុវជនជាជាងធ្វើដំបូលស័ង្កសីម្នាក់ បានរងរបួសរលាកខ្លួនយា់ងធ្ងន់ធ្ងរ ដោយសារឆក់ចរន្តអគ្គីសនីមានកម្លាំងរាប់ពាន់វ៉ុល ខណៈកំពុងធ្វើដំបូលស្ថានីយ៏ប្រេងមួយកន្លែង បានក្រោកឈរឡើងសក់ក្បាលប៉ះខ្សែកាបអគ្គីសនី។ហេតុការណីបានកើតឡើងនៅវេលាម៉ោង៤និង៣០នាទី ល្ងាចថ្ងៃទី១៨ ខែកក្កដា ឆ្នាំ ២០ ១៥ នៅចំណុចមុខវត្តផ្សារ ស្ថិតក្នុងភូមិផ្សារ ឃុំផ្សារ ស្រុកបរិបូរណ៌។ ប្រភពពីប្រជាពលរដ្ឋនៅកន្លែងកើតហេតុបាននិយាយអោយដឹងថា៖ កូនជាងធ្វើដំបូលនោះ មានឈ្មោះ ឃឹម បៀន អាយុ១៩ឆ្នាំ មានទីលំនៅ ភូមិដើមជ្រែ ឃុំខុនរ៉ង ស្រុកបរិបូរណ៌ រូបគេបានមកធ្វើ ដំបូ លស្ថានីយប្រេងដែលកំពង់សាងសង់ថ្មី ៤-៥ថ្ងៃមកហើយ។
តែនៅថ្ងៃកើតហេតុជនរងគ្រោះនៅពេលកំពុងអង្គុយធ្វើដំបូល មិនបានប្រយ័ត្នបានក្រោកឈរឡើងប៉ះសក់ក្បាលជាមួយខ្យែកាបភ្លើងដែលមានតង់ស្យុងខ្ពស់ បណ្តាលអោយទុស្សេចេញជាអណ្តាតភ្លើងឆក់ជនរងគ្រោះដួលអុកគូថលើដំបូលស្ថានីយនោះតែម្តង នៅក្នុងពេលនោះដែរ ក៏មានអ្នកធ្វើការជា មួយគ្នាបានឡើងយកជនរងគ្រោះចុះមកដីវិញ ហើយបានប្រញាប់ដឹក ទៅកាន់មណ្ឌលសុខភាពស្រុកបរិបូរណ៌ តែដោយសារស្ថានភាពធ្ងន់ពេក ដោយបានរងការរលាកពេញដងខ្លួន ក៏ដឹកមកមន្ទីរពេទ្យខេត្តកំពង់ឆ្នាំងដើម្បីជួយសង្គ្រោះជាបន្តទៀត។
មន្ត្រីក្រុមហ៊ុនអគ្គីសនីខេត្តបាននិយាយអោយដឹងថា៖តាមច្បាប់ការសាងសង់ស្ថានីយប្រេង ត្រូវធ្វើចម្ងាយ៤៥ម៉ែត្រពីអាក់ថ្នល់ តែស្ថានីយប្រេងខាងលើបានសាងសង់រំលោភលើដីចំណីផ្លូវ ទើបបានជាសាងសង់នៅក្រោម ខ្យែកាបអគ្គីសនីបែបនេះ។ករណីខាងលើនេះម្ចាស់ស្ថានីយប្រេងដែលទើបសាងសង់ថ្មី និងម្ចាស់សិប្បកម្មធ្វើដំបូលស័ង្កសី ត្រូវតែទទួលខុសត្រូវចំពោះយុវជនជនរងគ្រោះ ដែលមានគ្រោះថ្នាក់ដោយសារការងារខាងលើនេះ៕