ខេត្តបន្ទាយមានជ័យ៖ជនសង្ស័យជួញគ្រឿងញៀនចំនួន១៤នាក់ត្រូវបាននគរបាល ខេត្តបន្ទាយមានជ័យចុះបង្ក្រាបនិងឃាត់ខ្លួនបានជាបន្តបន្ទាប់ធ្វើឡើងក្នុងរយៈពេល២ថ្ងៃ គឺថ្ងៃទី២១ និង២២ ខែកក្កដា ឆ្នាំ២០១៥ នៅចំណុច៣កន្លែងផ្សេងគ្នា ក្នុងក្រុងប៉ោយប៉ែត ក្រុងសិរីសោភ័ណ និងស្រុកម៉ាឡៃ ។ក្នុងការចុះបង្ក្រាបនោះសមត្ថកិច្ចឆែកឆេរនិងដកហូតថ្នាំញៀនមេតំហ្វេតាមីនទឹកកកសរុប១៧កូនថង់ ថ្នាំញៀនមេតំហ្វេតាមីន WY ១៨គ្រាប់ ដាវសាំម៉ូរ៉ៃ២ដើម និងកាំភ្លើង ខ្យល់បាញ់ គ្រាប់កង់ចំនួន១ដើម ។ ជនសង្ស័យទាំងអស់ត្រូវបានគេបញ្ជូនមកកាន់ស្នងការដ្ឋាននគរបាលខេត្តបន្ទាយមានជ័យ ដើម្បីយកមកចាត់ការតាមនីតិវិធីច្បាប់នៅល្ងាចថ្ងៃទី២៣ ខែកក្កដា ឆ្នាំ២០១៥ ។លោកវរសេនីយ៍ទោធិនស៊ិនដេតនាយការិយាល័យនគរបាលប្រឆាំងគ្រឿងញៀនខេត្តបានប្រាប់ឱ្យដឹងថាកម្លាំងនគរបាលខេត្តបន្ទាយមានជ័យចុះបង្ក្រាបជនសង្ស័យជួញគ្រឿងញៀនខាងលើដោយមានការចង្អុលបង្ហាញនិងដាក់វិធានការបង្ក្រាបនិងទប់ស្កាត់គ្រឿងញៀននេះជាប្រចាំក្រោមបទបញ្ជារបស់លោកឧត្តមសេនីយ៍ត្រី អាត់ខែមស្នងការនគរបាលខេត្ត។លោកដេតបានប្រាប់ឱ្យដឹងទៀតថា ជនសង្ស័យគ្រឿងញៀនទាំង១៤នាក់ ក្នុងនោះនគរបាលក្រុងប៉ោយប៉ែតសហការជាមួយកម្លាំង
ការិយាល័យជំនាញឃាត់ខ្លួនមុខ សញ្ញាលក់ចែកចាយ និងប្រើប្រាស់ថ្នាំញៀនបានចំនួន៧នាក់ ដកហូតថ្នាំញៀនមេតំហ្វេតាមីនទឹកក១៦កូនថង់ ថ្នាំញៀនមេតំហ្វេតាមីន WY ១៨គ្រាប់ និងដាវសាំម៉ូរ៉ៃ២ដើម។នគរបាលស្រុកម៉ាឡៃចាប់ឃាត់ខ្លួនចំនួន៥នាក់ជាមុខសញ្ញាប្រើប្រាស់ថ្នាំញៀនហើយថែមបង្កអំពើហិង្សាវាយគេបណ្តាលឱ្យរងរបួសទៀតផង ជាប់ពាក់ព័ន្ធនិងបទល្មើសព្រហ្មទណ្ឌ១ករណីទៀត ដកហូតកាំភ្លើងខ្យល់១ដើម។នគរបាលការិយាល័យជំនាញសហការជាមួយនគរបាលក្រុងសិរីសោភ័ណចាប់ឃាត់ខ្លួនមុខសញ្ញាលក់ចែកចាយ និងប្រើប្រាស់ថ្នាំញៀន ២នាក់ ដកហូតថ្នាំញៀនមេតំហ្វេតាមីនទឹកកក១កុនថង់ និងឧបករណ៍សម្រាប់ ប្រើប្រាស់ថ្នាំញៀនមួយចំនួនធំផងដែរ ។លោកនាយការិយាល័យបញ្ជាក់ឱ្យដឹងទៀតថា ក្រោយពីសមត្ថកិច្ចបង្ក្រាបជនសង្ស័យ គ្រឿងញៀនខាងលើសមត្ថកិច្ចកំពុងតែស្រាវជ្រាស្វែងរកបង្ក្រាបចាប់ឃាត់ខ្លួនមេខ្លោងនៅ ខាងក្រោយខ្នងជនសង្ស័យគ្រឿងញៀនទាំងនោះដើម្បីយកមកចាត់ការតាមផ្លូវច្បាប់បន្តទៀត៕
