ខេត្តសៀមរាប វត្តចំនួន ៤៥ ក្នុងក្រុងសៀមរាបខេត្តសៀមរាប ត្រូវបានទទួលទៀនព្រះវស្សា និង ទ័យវត្ថុចំនួន១២មុខពីលោកឃឹមប៊ុនសុងសមាជិកគណៈកម្មាធិការកណ្តាលនិង ជាប្រធានគណៈកម្មាធិការគណបក្សប្រជាជនខេត្ត និង ជា អភិបាលនៃគណៈអភិបាលខេត្ត និង លោក នូ ផល្លា សមាជិកគណៈកម្មាធិការកណ្តាលនិងជាអនុប្រធានគណៈកម្មាធិការគណបក្សប្រជាជនខេត្ត និងជាប្រធានក្រុមប្រឹក្សាខេត្ត និង លោកជំទាវ អមដំណើរដោយឯកឧត្តម លោកឧកញ៉ា លោកជំទាវ គណៈអភិបាលខេត្ត ក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាព មន្ត្រីរាជការជុំវិញខេត្ត និង ក្រុមការងារខេត្តចុះជួយក្រុង បានដង្ហែនាំយកទៅវេរប្រគេនព្រះសង្ឃគង់ចាំព្រះវស្សានៅតាមវត្តទាំង៤៥ កាលពីព្រឹកថ្ងៃទី ២៦ កក្កដា ឆ្នាំ២០១៥ នៅក្នុងទីវត្តព្រះឥន្ធកោសីយ៍ សង្កាត់ស្លក្រាម ក្រុង ខេត្តសៀមរាប ។
បន្ទាប់ពីព្រះសង្ឃចម្រើនព្រះបរឹត្តនិងការធ្វើកិច្ចទៅកម្មវិធីរបស់លោកតាអាចារ្យ ក៏បានប្រារព្វធ្វើពិធីវេរប្រគេនទៀនព្រះវស្សាទៅតាមគន្លងប្រពៃណីព្រះពុទ្ធសាសនានៃយើង ដើម្បីឧទ្ទិសកុសលផលបុណ្យដល់បុព្វការីជន សាច់សាលោកហិត កម្មាភិបាល យុទ្ធជន យុទ្ធនារី ដែលបានពលី មរណៈ ក្នុងបុព្វហេតុជាតិមាតុភូមិ ក្នុងការអភិវឌ្ឍន៍ប្រទេស ឲ្យមានការរីកចម្រើន ដែលបានចែកឋានទៅកាន់ លោកខាងមុខផងដែរ។សម្ភារៈបរិក្ខាដែលបានប្រគេនព្រះសង្ឃទាំង៤៥វត្តដោយក្នុងមួយៗវត្ត ទទួលបានទៀនវស្សា ០១គូ គ្រឿងឧបភោគបរិភោគ និង ទេយ្យទាន ចំនួន១២មុខ ។ ម្យ៉ាងទៀតការប្រគេនទៀតព្រះវស្សានេះ គឺជាការប្រារឰធ្វើទៅតាមទំនៀមទំលាប់ប្រពៃណីព្រះពុទ្ធសាសនា ដែលមាននាសម័យកាលយូលង់មកហើយ នៅជារៀងរាល់ឆ្នាំ និង ដើម្បីប្រគេនព្រះសង្ឃដែលគង់ចាំព្រះវស្សាក្នុងរយៈពេលមួយត្រីមាស ដែលចាប់ចូលពីថ្ងៃទី ១រោជ ខែអាសាឍរហូតដល់ថ្ងៃ១៥កើតខែអស្សុជ ។
មានប្រសាសន៍ នៅក្នុងឱកាសនោះ លោក ឃឹម ប៊ុនសុង ក៏បានលើកឡើងថា កាលពី៣៦ឆ្នាំមុន របប កម្ពុជាប្រជាធិបតេយ្យ បានបំបាត់ចោលទាំងស្រុង រាល់ហេដ្ឋារចនាសម្ព័ន្ធសង្គម សិទ្ធសេរីភាពខាងជំនឿសាសនា ។ ក្រោយជ័យជំនះថ្ងៃ៧មករា១៩៧៩ក្រោមមាគ៌ាដឹកនាំដ៏ត្រឹមត្រូវរបស់សម្តេចតេជោហ៊ុនសែន ដែលជាវរៈកុលបុត្រដ៏ឆ្នើម បានដឹកនាំប្រទេសឲ្យមានការអភិវឌ្ឍន៍រីកចម្រើនលើគ្រប់វិស័យ ។ លោកក៏បានបញ្ជាក់ប្រគេនជូនព្រះសង្ឃ និង ពុទ្ធបរិស័ទនៅទីនោះថាក្នុងរយៈពេល៣៦ឆ្នាំកន្លងមកនេះ ក្រោមកិច្ចដឹកនាំរបស់គណបក្សប្រជាជនកម្ពុជា សម្ខាន់សម្តេចតេជោ ហ៊ុន សែន ជាប្រមុខដឹកនាំប្រទេសជាតិនោះ តែងតែរៀបចំធ្វើពិធីបុណ្យទានផ្សេងៗ តាមទំនៀមទំលាប់ប្រពៃណីសាសនាជាតិរបស់យើង និងមានការអភិវឌ្ឍន៍ រីកចម្រើននៅគ្រប់ទីកន្លែងទូទាំងប្រទេស ដូចជាផ្លូវថ្នល់ ស្ពាន ប្រឡាយទឹក 
សាលារៀន មន្ទីរពេទ្យ វត្តអារាមមាននៅគ្រប់ក្រុង ស្រុក គ្រប់ឃុំ សង្កាត់ទូទាំងប្រទេសដែលផ្តល់នូវទំនុកចិត្តពីប្រជាពលរដ្ឋ។ក្នុងនោះលោក ក៏បានលើកឡើងពីការយកចិត្តទុកដាក់របស់គណបក្សប្រជាជនកម្ពុជាគ្រប់ជាន់ថ្នាក់ ហើយកាលពេលកន្លងមកនេះនៅក្រុងសៀមរាបក្រោមការយកចិត្តទុកដាក់របស់សម្តេចតេជោ បានធ្វើការកាត់ឆ្វៀលដីពីតំបន់បុរីសណ្ឋាគារអង្គរ ជូនប្រជាពលរដ្ឋ ព្រមទាំងបានផ្តល់នូវហេដ្ឋារចនាសម្ព័ន្ធផ្លូវថ្នល់ និង ការធ្វើប័ណ្ណកម្មសិទ្ធិជូនទៀតផង ក្នុងឱកាសសម្តេចទាំងពីរ អញ្ជើញចូលរួមក្នុងពិធីបើកព្រឹត្តិការណ៍អង្គរសង្គ្រាន្ត ឆ្នាំ២០១៥នេះ ។ លោក ឃឹម ប៊ុនសុង បានថ្លែងអំណរគុណចំពោះក្រុមការងារទាំងអស់ចុះជួយក្រុងសៀមរាប ដែលបានឧបត្ថម្ភជាថវិកា និងសំភារៈសម្រាប់ជួយដល់គណបក្សប្រជាជនកម្ពុជា ក្នុងការរៀបចំកម្មវិធីនេះឡើង ព្រមទាំងបានផ្តាំផ្ញើដល់សីលវ័ន្តសីលវតីពុទ្ធបរិស័ទនិងប្រជាពលរដ្ឋ ដើម្បីបន្តនូវនិរន្តរភាពបានយូរអង្វែងតទៅទៀត ក្នុងការអភិវឌ្ឍន៍ភូមិសង្កាត់របស់ខ្លួន គឺត្រូវបន្តការគាំទ្រគណបក្សប្រជាជន កម្ពុជា ដែលមានសម្តេចតេជោ ហ៊ុន សែន ជាប្រធានគណបក្ស និង ជានាយករដ្ឋមន្ត្រី ក្នុងការដឹកនាំនាវាកម្ពុជា ឆ្ពោះទៅរកនូវត្រើយសុភមង្គល នៃការអភិវឌ្ឍន៍រីកចម្រើន ទាំងវិស័យអាណាចក្រ និង ពុទ្ធចក្រផងដែរ ៕
