សៀមរាប ៖ វីតាល់ បានធ្វើដំណើរ ដោយនាំយកថវិកា១លានរៀល និងទឹកពិសាវីតាល់ មួយចំនួន របស់ មូលនិធិ២៥រៀល ទៅប្រគល់ជូនលោក ផាត់ ផល ដែលជាកម្មករសំណង់ ក្រីក្រ ជួបឧបទ្ទវហេតុ ឆក់ចរន្តអគ្គិសនី កាលពីថ្ងៃទី២៧ ខែមេសា ឆ្នាំ២០១៥ កន្លងទៅនេះ
បច្ចុប្បន្នលោកផាត់ ផល ត្រូវបានក្រុមគ្រូពេទ្យ កាត់ជើងស្តាំ និងស្បែកក្បាល ដើម្បីសង្គ្រោះជីវិត ប៉ុន្តែលោកនៅត្រូវការ ជំនួយជាថវិកា ព្យាបាលបន្ថែមទៀត ដើម្បីវះកាត់ សាច់ភ្លៅ មកដាក់លើក្បាល ដែលគ្រួសារ របស់គាត់ បានអះអាងថា ការវះកាត់នឹងចំណាយអស់ ថវិកា ប្រមាណជាង២៤លានរៀល រឺជាង៦ពាន់ដុល្លារ អាមេរិកឯណោះ ។
ក្រោយពីទទួលព័ត៌មាន ពីសោកនាដកម្មនេះ ក្រុមហ៊ុនទឹកវីតាល់ បានរៀបចំក្រុមការងារ ដើម្បីយកអំណោយ សប្បុរស ទៅជូនជនរងគ្រោះ និងក្រុមគ្រួសារភ្លាមៗ កាលពីរសៀលថ្ងៃទី៦ ខែសីហា ឆ្នាំ២០១៥នៅឯខេត្ត សៀមរាប ស្រុកកំណើតរបស់លោក ។
តំណាងក្រុមហ៊ុនទឹកសុទ្ធវីតាល់ លោកជាង សុភាព បានឲ្យដឹងថា នេះមិនមែនជាលើកទី១ទេ ដែលវីតាល់ បាននាំយកអំណោយ ជាថវិកាទៅជួយ ជនរងគ្រោះដោយផ្ទាល់នោះ ។
លោកបានបន្តថា កាលពីពេលថ្មីៗមុននេះ វីតាល់ បានយកថវិការ ចំនួន១លានរៀល ទៅជូនជនរងគ្រោះឈ្មោះចឹក ភី ដោយផ្ទាល់ នៅមន្ទីរពេទ្យព្រះកុសុមៈ ដែលបានឆក់ខ្សែភ្លើងយ៉ាងធ្ងន់ធ្ងរ ហើយត្រូវបង្ខំ ចិត្តកាត់ដៃទាំងសងខាង ដើម្បីសង្គ្រោះជីវិត ។ លោកបានបន្ថែមថា ជាការពិតណាស់ ថវិកាមូលនិធិ២៥៛ របស់វីតាល់ ដែលបានមកពីការគាំទ្ររបស់អតិថិជន តែងតែត្រូវបានយកទៅជួយ លើការងារសង្គម បរិស្ថាន សប្បុរសធម៌ ពិសេសគឺការចុះជួយជនរងគ្រោះ ដោយផ្ទាល់ផងដែរ ដូចជាលោកតា ប្រាជ្ញ ឈួន ភិរម្យវោហារចាប៉ីដងវែង លោកហោ ម៉ៅ សន្តិសុខគំរូ ជាដើម ។
គួរបញ្ជាក់ផងដែរថា លោក ផាត់ ផល អាយុ៣៤ឆ្នាំ ជាកម្មករសំណង់ មានប្រពន្ធជាអ្នកលក់ដូរបន្តិចបន្តួច និងមានកូនស្រីម្នាក់អាយុ៥ឆ្នាំ ដែលគ្រួសារទាំងមូលស្ថិតក្នុងបន្ទុករបស់សុផលតែម្តង ។ ក្រោយពេលគ្រោះថ្នាក់ លោកត្រូវបានមេការបស់ខ្លួន បានយកទៅមន្ទីរពេទ្យបង្អែកខេត្តសៀមរាប តែពេទ្យបានប្រាប់ថា អស់សង្ឃឹម ហើយ ព្រោះសភាពរងគ្រោះធ្ងន់ធ្ងរពេក ។ ដោយប្រពន្ធរបស់ជនរងគ្រោះមិនអស់ចិត្ត ក៏បានបញ្ជូនទៅព្យាបាល នៅមន្ទីរពេទ្យខេត្តសុរិន្ទ ប្រទេសថៃ ។
ដើម្បីជួយដល់លោកផាត់ ផល វីតាល់ក៏បានដែរបញ្ជាក់ថា ក្រុមការងារស្វាគមន៍ រាល់សប្បុរសជន ផ្សេងៗទៀត ដែលមានចិត្តអាណិត និងចង់ជួយសំរាលបន្ទុក ថ្លៃព្យាបាលរបស់សុផល ។ សប្បុរសជន អាចទំនាក់ទំនង លេខទូរស័ព្ទ ខាងគ្រួសារលោកផាត់ ផល បានតាមរយៈ 012899386 ៕