ខេត្តកំពង់ឆ្នាំង៖ជម្ងឺគ្រុនក្តៅ គ្រុនពោះវៀន គ្រុនឈាមបានកើតមាននៅក្នុងភូមិកោះក្អែក ឃុំពាមឆ្កោក ស្រុកជលគីរី រាប់រយនាក់មានទាំងក្មេងទាំងចាស់ ស្ទើរតែគ្រប់ក្រុមគ្រួសារ នៅព្រឹកថ្ងៃទី១៥ ខែសីហាឆ្នាំ២០១៥នេះ លោកមេភូមិកោះក្អែក បានសំណូមពរតាមអ្នកសារព័ត៌មានយើង ស្នើសុំដល់លោកប្រធានមន្ទីរសុខាភិបាលខេត្តកំពង់ឆ្នាំង មេត្តាជួយបញ្ជូនគ្រូពេទ្យខេត្តមកអន្តរាគមន៍ ពិនិត្យជម្ងឺជូនប្រជាពលរដ្ឋក្នុងភូមិកោះក្អែកផង។
លោក រី គា មេភូមិកោះក្អែកបាននិយាយអោយអ្នកយកព៍ត៌មានយើងដឹង នៅព្រឹកថ្ងៃទី១៥ ខែសី ហា ឆ្នាំ២០១៥ នៅក្នុងភូមិកោះក្អែកថា៖ ប្រជាពលរដ្ឋនៅក្នុងភូមិកោះក្អែកមានចំនួនសរុប ២២៧គ្រួសារស្នើនិងចំនួនមនុ ស្ស ១.១៥១នាក់។នៅក្នុងរយះពេល១ខែនេះ នៅតាមគ្រួសារនិមួយៗក្នុងភូមិកើតមានជម្ងឺ គ្រុនក្តៅ គ្រុនពោះវៀន និងគ្រុនឈាម ពី២នាក់ទៅ៣នាក់ ស្ទើរតែគ្រប់ក្រុមគ្រួសារ បើបូកសរុបទៅមានអ្នកជម្អឺ រាប់រយនាក់កំពុងឈឺជាបន្តបន្ទាប់រៀងរាល់ថ្ងៃ។តាមការសន្និដ្ឋានរបស់លោកមេភូមិថា៖ជម្ងឺទាំងនោះបណ្តាលមកពីការប្រែប្រួលអាកាសធាតុ ពីរាំងមកភ្លៀង និងកើតមានមូសខាំច្រើន។
លោកមេភូមិបានពញ្ជាក់អោយដឹងថា៖ដោយឡែកនៅក្នុងគ្រួសារលោក មានកូននិងចៅៗនៅក្នុងបន្ទុកជាមួយ ឈឺចំនួន៧នាក់ និងបានទៅព្យាបាលជម្ងឺ នៅក្លីនិចឯកជនអស់ប្រាក់ជាង៧លានរៀល ដែលរូបលោកផ្ទាល់ក៏មានជម្ងឺគ្រុនឈាមដែរ ហើយកូនប្រុសម្នាក់ក៏កំពុងមានជម្ងឺគ្រុនក្តៅ និងសង្ស័យថាគ្រុនឈាមកំពុងព្យា
បាលនៅក្នុងផ្ទះជាមួយគ្រូពេទ្យឯកជនផងដែរ។
ចំណែកស្ត្រីឈ្មោះ ឡុង សុភ័ន្ត អាយុ៣៣ឆ្នាំ មានផ្ទះនៅទុលមុខផ្ទះលោកមេភូមិ បានអោយដឹងថា៖នាងមានកូន៤នាក់ មានជម្ងឺគ្រុនក្តៅ និងសង្ស័យថាជាជម្ងឺគ្រុនឈាមទាំង៤នាក់ កំពុងព្យាបាលជាមួយគ្រូពេទ្យឯកជនក្នុងភូមិមិនទាន់ជានៅឡើយ ដោយគ្រូពេទ្យបានចាក់ស៊ីរ៉ូម១ដប យកថ្លៃ៣៥.០០០រៀល។ ស្ត្រីឈ្មោះ គី ចាន់ធូរ អាយុ៣៣ឆ្នាំ រស់នៅក្នុងភូមិកោះក្អែកបានអោយដឹងដែរថា៖រូបនាងមានកូន៣នាក់ ឈឺទាំង៣នាក់ រីឯអ្នកស្រុកនៅក្នុងភូមិគ្រប់គ្រួសារមានកូនឈឺដូចៗគ្នាពេញភូមិ អ្នកខ្លះឈឺធ្ងន់ក៍យកកូនទៅមណ្ឌលសុខភាពកំពង់ហៅ ខ្លះយកទៅពេទ្យខេត្ត ខ្លះយកទៅក្លីនិចឯកជនក្នុងខេត្ត។
លោក រី គា មេភូមិកោះក្អែកបានសំណូមពរដល់លោកប្រធានមន្ទីរសុខាភិបាលខេត្ត មេត្តាជួយបញ្ជូនគ្រូពេទ្យខេត្ត ចុះមកជួយពិនិត្យព្យាបាលប្រជាពលរដ្ឋក្នុងភូមិកោះក្អែកផង ព្រោះប្រជាពលរដ្ឋមួយចំនួនក្រីក្រ ពុំមានប្រាក់ព្យាបាលកូនចៅឡើយ។
ដោយឡែកនៅក្នុងមន្ទីរពេទ្យកុមារខេត្តកំពង់ឆ្នាំងវិញ នៅព្រឹកថ្ងៃទី១៧ ខែសីហា ឆ្នាំ២០១៥នេះលោកវេជ្ជបណ្ឌិត សុខ គង់ ប្រធានពេទ្យផ្នែកកុមារ និងជាអនុប្រធានមន្ទីរពេទ្យបង្អែកខេត្តកំពង់ឆ្នាំងបានអោយអ្នកយកព័ត៌
មានយើងដឹងថា៖ កុមារនៅសំរាកព្យាបាលជម្ងឺក្នុងពេទ្យកុមារខេត្ត ក្នុងថ្ងៃទី១៧ ខែសីហានេះ មានចំនួន ៥០នាក់ ក្នុងនោះមានអ្នកគ្រុនឈាមចំនួន១៣នាក់ ក្រៅពីនេះមានជម្ងឺគ្រុនក្តៅ និងជម្ងឺផ្សេងៗទៀត។ ចំណែកក្នុងថ្ងៃនេះដែរ អ្នកមានជម្ងឺគ្រុនឈាមជាសះស្បើយចេញទៅផ្ទះចំនួន៦នាក់។
លោក ម៉ម ម៉ាល័យ អនុប្រធានមន្ទីរសុខាភិបាលខេត្តបានអោយដឹងថា៖ក្រោយពីទទួលបានព័ត៌មានខាងនេះ នៅព្រឹកថ្ងៃទី១៦ ខែសីហា លោកបានដឹកនាំក្រុមការងារចុះពិនិត្យស្ថានភាពជម្ងឺជាក់ស្តែងនៅក្នុងភូមិកោះក្អែក ហើយស្រាវជ្រាវដឹងថា៖អ្នកជម្ងឺនៅក្នុងកោះក្អែកនៅថ្ងៃទី១៦ ខែសីហា សរុបមានចំនួន១៥៣នាក់ ដោយឡែកអ្នកជម្ងឺគ្រុនឈាមដែលបានបញ្ជូនមកពេទ្យខេត្តមានចំនួនតែ៦នាក់ប៉ុណ្ណោះ។ចំណែកភូមិសាស្ត្រក្នុងភូមិកោះក្អែក មានបណ្តោយតែ២គីឡូម៉ែត្រ និងទទឹងភូមិតែ១៥០ម៉ែត្រ គឺពុំមានជម្ងឺឆ្លងឡើយ។
លោក ម៉ម ម៉ាល័យ បានបញ្ជាក់អោយដឹងទៀតថា៖នៅពេលខាងមុខឆាប់ៗនេះមន្ទីរ និងបញ្ជូនគ្រូពេទ្យខេត្តចុះបាញ់ថ្នាំសម្លាប់មូសតាមផ្ទះប្រជាពលរដ្ឋក្នុងភូមិកោះក្អែក ដើម្បីទប់ស្កាត់ជម្ងឺគ្រុនឈាម។ ទន្ទឹមនេះដែរនឹងចាត់តាំងអោយប្រធានមណ្ឌលសុខភាពឃុំពាមឆ្កោក ត្រៀមគ្រូពេទ្យចល័តចុះដាក់ប៉ុសសុខភាព ក្នុងភូមិកោះក្អែកដើម្បីជួយព្យាលបាលជម្ងឺប្រជាពលរដ្ឋបើសិនមានជម្ងឺកើតឡើងច្រើន៕
