កំពង់ធំៈ បន្ទាយវរៈសេនាតូចរៀបរយលេខ១ ត្រូវបានផ្លាស់ប្តូរមុខមាត់ថ្មី ចាប់តាំងពីទិដ្ឋភាពព្រៃដុះជុំជិត បានក្លាយទៅ ជាទីតាំងអភិវឌ្ឍន៍សម្រាប់ លេនដ្ឋានកងទ័ពដ៏រ៉ឹងមាំសម្រាប់ប្រចាំការចល័តទ័ពទៅសរភូមិមុខក្រោមការបញ្ជាពីថ្នាក់លើប្រកបដោយ អាគាប្រជុំ អាគាប្រចាំការ ឃ្លាំងសម្រាប់ទុកដាក់សម្ភារៈសឹក និងគ្រោងសាងសង់អាគារផ្សេងៗ បន្ថែមទៀត ដោយមាន
ជ្រោមជ្រែងយ៉ាងយកចិត្តទុកដាក់ពីឯកឧត្តម អ៊ុត សំអន អភិបាលខេត្តកំពង់ធំ និងជាប្រធាន គណៈបញ្ជាការឯកភាព រួមទាំងឯកឧត្តម ហ៊ុន ម៉ាណែត និង សម្បុរជនជាច្រើននាក់ទៀត បានធ្វើឲ្យទីតាំងបានក្លាយជាទីតាំងសម្រាប់បណ្តុះបណ្តាលយុទ្ធជនសម័យថ្មី ក្នុងវិស័យកងទ័ព ស្ថិតនៅភូមិតាឡែកថ្មី ឃុំសាលាវិស័យ ស្រុកប្រាសាទបាល្ល័ង ខេត្តកំពង់ធំ ។
ជាក់ស្តែងនៅព្រឹកថ្ងៃទី ១៧ ខែ សីហា ឆ្នាំ ២០១៥ ឯកឧត្តម សោម ស៊ុន បានពាំនាំអំណោយដែលទទួលបានពីលោក ឧកញ៉ា គឹម ផារ៉ា មានស៊ីម៉ង់ត៍ចំនួន១០តោន និងអំណោយរបស់ឯកឧត្តម សោម ស៊ុន ព្រមទាំងលោកជំទាវ មាន ឥដ្ឋចំនួន ៥០០០ដុំ បានប្រគល់ជូនវរៈសេនាតូចរៀបរយលេខ១ ដើម្បីកសាងជម្រកស្នាក់នៅរបស់កងទ័ព និងកសាងហេដ្ឋារចនាសម្ព័ន្ឋផ្សេងៗ ក្នុងវរៈសេនាតូចរៀបរយលេខ១។
លោក វរៈសេនីយ៍ទោ ថន ស៊ីសក្តា មេបញ្ជាការសេនាតូចរៀបរយលេខ១ និងតំណាងឲ្យ នាយទាហាន នាយទាហានរង និងពលទាហាន បានថ្លែងអំណរគុណចំពោះ លោក ឧកញ៉ា គឹម ផារ៉ា និងឯកឧត្តម សោម ស៊ុន មេបញ្ជាការតំបន់ សឹករងកំពង់ធំ ដែលបានផ្តល់នូវសម្ភារៈ គ្រឿងសំណង់ដល់អង្គភាពយើងខ្ញុំ ដើម្បីឲ្យមានលទ្ធភាពក្នុងការ កសាងជម្រកស្នាក់នៅជូនទ័ព និងគ្រួសារទ័ពដែលកំពុងតែជួបការខ្វះខាត ដែលសម្តែងឲ្យឃើញពីការយកចិត្តទុកដាក់ដល់ អង្គភាពទ័ព ។
ឯកឧត្តម សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានថ្លែងអំណរគុណចំពោះ លោក ឧកញ៉ា គឹម ផារ៉ា និងលោកជំទាវ ដែលបានឆ្លើយតបតាមសំណូមពរ តាមតំម្រូវការរបស់អង្គភាព ក្នុងការស្នាក់នៅរបស់ទ័ព និងសំណូមពរឲ្យថ្នាក់ដឹកនាំ ទាំងអស់រួមគ្នាកសាងជម្រកស្នាក់នៅ របស់គ្រួសារទ័ព និងសំណង់ផ្សេងៗសម្រាប់អង្គភាព ប្រើប្រាស់ ឆ្លៀតពេលក្នុងឪកាសនោះ ឯកឧត្តម បានសុំឲ្យមានការសាមគ្គីគ្នា សហការ រក្សាមិត្តភាពរវាងគ្នានិងគ្នា ចៀសវាងកុំឲ្យមានការបែកបាក់ផ្ទៃក្នុង ។
ដោយ ប៊ុន រដ្ឋា
