ខេត្តបន្ទាយមានជ័យ បុរសជាប្តីមានចិត្តប្រច័ណ្ឌ ទៅផឹកស្រាស្រវឹងប្រើកាំបិតបុ័ងតោកាប់ចិញ្ច្រាំ និងអាករ ស្ត្រីម្នាក់ជាប្រពន្ធបណ្ដាលអោយ ស្លាប់ភ្លាមៗនៅក្នុងថ្លុកឈាមយ៉ាងអាណោចអាធម្ម កាលពីរសៀលម៉ោង ៤ និង ៣០នាទី ថ្ងៃទី ១៧ សីហា ២០១៥ នៅក្នុងភូមិដូនឡឹក ឃុំសំបួរ ស្រុកមង្គលបូរី ខេត្តបន្ទាយមានជ័យ ។
លោក ហោ សំណាត់ អធិការរងទទួលបន្ទុកព្រហ្មទ័ណ្ឌ នៃអធិការនគរបាលស្រុកមង្គលបូរីបានអោយដឹងថា ស្ត្រីរងគ្រោះឈ្មោះ ឆែម អ៊ឹង អាយុ៤២ឆ្នាំ មានកូន ៤នាក់ ចំណែកជនសង្ស័យឈ្មោះ អ៊ុយ ហឿត អាយុ៤៥ឆ្នាំ ត្រូវជាប្តីចុងរបស់ស្ត្រីរងគ្រោះ មានទីលំនៅភូមី ឃុំកើតហេតុខាងលើ ។
ក្រោយកើតហេតុសមត្ថកិច្ចបានចុះទៅដល់និងឃាត់ខ្លួនជនសង្ស័យជាប្តីបានភ្លាមៗនិងកន្លែងនោះដែរ។
ជាមួយករណីឃាតកម្មនេះបន្ទាប់ពីមានការសាក់សួរនិងពិនិត្យទីតាំងកើតហេតុក៍ដូចជាការពិនិត្យលើសពស្ត្រីរងគ្រោះគឺមានស្នាមកាំបិតកាប់ចំជាច្រើនកន្លែងនិងស្នាមអាករ។
សមត្ថកិច្ចបានធ្វើការសន្និដ្ឋានថាករណីឃាតកម្មនេះកើតឡើងដោយ សារបុរសជាប្តីប្រច័ណ្ឌប្រពន្ធ ដោយមានអ្នកលេបខាយ។បច្ចុប្បន្នជនសង្ស័យត្រូវបានកសាងសំណុំរឿងនិងបញ្ជូនខ្លួនទៅកាន់ស្នងការនគរបាលខេត្តដើម្បីចាក់ការបន្តទៅតុលាការ៕
