ខេត្តប៉ៃលិន៖ ជនជាតិវៀតណាម០៣នាក់ ត្រូវបានកម្លាំងស្នងការនគរបាលខេត្ត ដឹកនាំដោយលោកវរសេនីយ៍ឯក សាញ់ ណាំ ស្នងការរង ទទួលបន្ទុកការងារអន្តោប្រវេសន៍ ដឹកនាំក្រុមការងារ ដោយសហការជាមួយ កងកម្លាំងអាវុធហត្ថខេត្តប៉ៃលិន ចុះបង្ក្រាប និងឃាត់ខ្លួន ជនបរទេសដែលជាជនជាតិវៀតណាម ពីបទចូលមក និងស្នាក់នៅ ក្នុងប្រទេសកម្ពុជា ដោយខុសច្បាប់ ។ ហេតុការណ៏ចុះបង្ក្រាប និងឃាត់ខ្លួននេះ ធ្វើឡើងកាលពីរសៀលថ្ងៃទី១៧ ខែសីហា ឆ្នាំ២០១៥ នៅត្រង់ចំណុច ភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ជនបរទេសដែលជាជនជាតិវៀតណាម ដែលសមត្ថកិច្ចឃាត់ខ្លួនទាំង ០៣ នាក់ មាន ទី០១- ឈ្មោះ អេន ជី ភេទស្រី អាយុ២០ឆ្នាំ មុខរបរ អ៊ុតសក់, ទី០២- ឈ្មោះ លាង គីម ភេទស្រី អាយុ១៩ឆ្នាំ មុខរបរ អ៊ុតសក់ ,ទី០៣- ឈ្មោះ សុខ រក្សា ភេទស្រី អាយុ២១ឆ្នាំ មុខរបរ អ៊ុតសក់ បច្ចុប្បន្នទាំង០៣នាក់ស្នាក់នៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
តាមប្រភពព័ត៌មានពីប្រជាពលរដ្ឋដែលរស់នៅកន្លែងកើតហេតុ បានឲ្យដឹងថា៖ ស្ត្រីជនជាតិវៀតណាមខាងលើ បានមករស់នៅចំណុចកើតហេតុជាយូរមកហើយ ប៉ុន្តែពុំដែលមានអាជ្ញាធរ ឬសមត្ថកិច្ចជំនាញណាមកសួរនាំនោះទេ ដោយពួកគាត់នឹកស្មានថាជនជាតិវៀតណាមទាំងនោះ គេមានច្បាប់ត្រឹមត្រូវ មកស្នាក់នៅទីនេះ ។
ប្រភពព័ត៌មានបន្តទៀតថា៖ ទើបតែថ្ងៃកើតហេតុនេះ បានដឹងថាជាជនជាតិវៀតណាមទាំង០៣នាក់នេះ ជាជនអន្តោវេសន៏ខុសច្បាប់ទៅវិញ ពួកគាត់បញ្ជាក់ថាសព្វថ្ងៃជនជាតិវៀតណាមរស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ មានចំនួនច្រើន ហេតុនេះ សូមសមត្ថកិច្ចជំនាញ មេត្តាចុះពិនិត្យមើលផង ។
បច្ចុប្បន្នមន្ត្រីនៃការិយាល័យជំនាញ ស្នងការនគរបាលខេត្តកំពុងសាកសួរ និងអនុវត្តតាមនីតិវិធី ច្បាប់នៃព្រះរាជាណាចក្រកម្ពុជា ៕អត្ថបទ សេងសុវណ្ណារិទ្ធ
